Psa 123 | XteSC | STEP | Israel yala nesaladi, ila kailya kalemna tumi konum kupyopda, ‘Allah tep er si erembenkamep’ tenen, Yerusalem mutu welerbarameng taru, mazmur upu mut penkamnga tep seku upu. Uo nun nai Allah, kan tep, ne urasin ereipnedi, kan kurumai cap, kan cap tep dirpetenkamakene. Dinino, kanda, ila puto ngebo, im deiki tara neitamaipu kumemdi, akeca-keca yuma talepra, ila deiyo ngebo kuruma cadi, ‘Ne nai bo Allah eptene’ tenen, ne urasin ereipnedi, kan tara dinkamane.

Psalms 123

‘Allahda bicau teneseredi, telep kupra melimsetue’ tenen, Allah tep morona upu

1 Israel yala nesaladi, ila kailya kalemna tumi konum kupyopda, ‘Allah tep er si erembenkamep’ tenen, Yerusalem mutu welerbarameng taru, mazmur upu mut penkamnga tep seku upu.
Uo nun nai Allah, kan tep, ne urasin ereipnedi, kan kurumai cap, kan cap tep dirpetenkamakene. Dinino, kanda, ila puto ngebo, im deiki tara neitamaipu kumemdi, akeca-keca yuma talepra, ila deiyo ngebo kuruma cadi, ‘Ne nai bo Allah eptene’ tenen, ne urasin ereipnedi, kan tara dinkamane.
2 Ada, nun ikin kunupa cadi, kandi nun tep dipetepra melipseso naio. Nun yumadi, ‘Nun nai Allah er dipapu melimkamser’ tenen, kan tepapu putapserpa, kan tep morokenupe. Ukupmantoda, isomka neng, sun amutara tali pelpu donge nengdi, ‘Ne deiyo ngebodi ware upu pepkamaner do?’ tenen, er damai dinapu kungetopu, nundi kan damai dina cap, gekena cappu kunupe. Teka ukupmantoda, tali pel doramre nerdi, er deiyo ner damai yana, ‘Ware upu pepkuner do?’ tenen, epetepra dina cap, gekena cappu kuretopu, nun peda, kan damai yana gekenapu kunkamape. Ange tep nengeda, nun urasin ereipmepedi, ‘Nun nai Allah, er si Yahwehda, dan cei kurur do? Dan taru yaseredi, telep upu pepseredi, melipra lyepkamaser do?’ tenenapu kunupe. Tonda, kan tep dipetepra gekenapu kunupe naio.
Ada, nunda mali kunge nengpu kunup dinin, Allahdi ange kau kepseredi, er kange dipapu bicau tenepseredi, telep kupra melimkamser taruda, kapul yare taru neitamai yumada, nundi er damaida yana dinapu kunkamepe.
3 Uo, nun nai bo Allah Yahweh, kan kange deiki dipapu, nun tep, bicau tenepsememdi, telep kupra lyepra melimkamserem’ tenen, moronapu kunkamkepe. Teka, nun tep, ‘Nun songe,’ tenepsenung nengdi, nun deiki pio mali upu weik pesenunga cadi, konum puto bounpu kunupa tep, nundi, “Uo, nun nai Allah, melipra lyepseo,’ pepra morokenupe.
Deiyoda, ataru-ataru yumada, nun tep, ‘Nun songe,’ tenesenung nengdi, nun tep, ‘Anesala dakwapye,’ tenesengedi, nyek-nyek pena cap, mali upu pena cappu kusenunge. Ange yuma tep, nunda konum dabale kuserure.
4 Ware kuprap taru neitamai di, nun kange dipru neitamaida, ‘Uo,’ tenen, dabale weik konum kuserure. Ue denge weik taru deiki di, ikinpu konum kuramupka cadi, angeda tupa men kutepe naio. Ange deiyoda, ikin men kuprepa, sun tali kange deipra, teleppu kunge nesaladi, nun tep, ‘Sunda mali nesalapu kununge,’ tenesengedi, nyek-nyek pepra, mali upupu pesenunge. Ange yuma tep, nunda konum dabale kuserure.
Teka, sun salnong-nong kamengedi, nun Israel nesala tep, ‘Nun songe, sunda mali nesala pua,’ tenesengedi, mali upupu pesenung neng tep, nun konum dabale tenenmape naio. Atep, kan dipapu, yana melipseo naio!