Psa 125 | XteSC | STEP | ‘Ila ati arum Yerusalem mutu neitamai welepmepedi, ila mambul tumi tep, kailya kalepra kunkamepe’ tenen, kange lon mut penupe. Allah Yahweh tep, ‘Teka tenepra,’ sun kange dipru yuma, er deiki derinung nesala yumada, sunda, ila di buku mutu, er sida Sion mutu, pio men long-long perur utopu kupra, sun peda ila kange mun keca yatua peda, kange mun kange doupra men kunkamenge. Ange gum dinin, sunda pio-pio tep, kange deipra teleppu kunkamenge.

Psalms 125

‘Allah er si Yahwehdi, melipra kalengserepa, teleppu kunkamepe,’ pepra, mut perami upu

1 ‘Ila ati arum Yerusalem mutu neitamai welepmepedi, ila mambul tumi tep, kailya kalepra kunkamepe’ tenen, kange lon mut penupe.
Allah Yahweh tep, ‘Teka tenepra,’ sun kange dipru yuma, er deiki derinung nesala yumada, sunda, ila di buku mutu, er sida Sion mutu, pio men long-long perur utopu kupra, sun peda ila kange mun keca yatua peda, kange mun kange doupra men kunkamenge. Ange gum dinin, sunda pio-pio tep, kange deipra teleppu kunkamenge.
2 Yerusalem mutu dana-dana tara ila mutu-mutu ongopdongopra buku mutu dup kuramretopu, Allah er si Yahwehdi, ‘Ne nyapu sisa tep, ikin kupnung’ tenen, dana-dana tara yuma ongopdongopredi, pio tep melipra kalengrure.
Ada, ataru di dipra doryankamre taru neitamai peda, pio tep kalekra melimkamsere.
3 Tonda, sun nimi deiyo neng, ada sun pio mali kunge Raja-Raja neng yuma peda, pio acapu sun maca talepra men kunkamenge. Ada, Allahdi, “Ne upupu talepmengedi, pio dumsisipu kunge nesala tep, ‘Amutu tuda karenkamsene,’ pepra, pedina upu deiki di konum pepra karepseua tepa. Atep nengeda, nun dipapu amutu tu pio talenkamepe.
Amutu karenkamsera deiyoda, ‘Amutu dopra, sun dumsisi kunge nesala men karepnyopda, sundi telep kunange cap, ne upu cap yaniptapmengedi, ‘Mali kuna ngepu kunkamep’ tenen, sun buru bepekmengedi, ‘Mali kunangepu talepra kunkamepe,’ tenepnunga tep pepne.
4 Teka nun nai bo Allah Yahweh, kanda sun dumsisipu kunge nesala tep, kandi telep kupra kudinkamrume. ‘Ukupkamrum’ tenen, moropkepe.
Ada, sun kange dipru neitamaida, telep kun kecapu tenepra, dumsisi kunung nesala tep, telep kudinkamrume, nun naio.
5 Dinino, yuk nengdi, sun pe kange deiki di, ‘Mali kun kecapu talepra kunkamep’ tenen, telep kun bisida, tapmengedi, gwalin bisipu embanung nesala tep nengeda, Allah Yahwehdi, anesala yumada doprapredi, pio mali-mali keca weik kunge nesala cap, tapakra deipredi, pio karenai dubenkamre ja!
Dinino, nun Israel yala nesala tep nengeda, ‘Allahdi pio telep kweipseredi, antaipserepa, pio kange deipra, teleppu kunkamep’ tenen, Allah tep moronupe.