Psa 128 | XteSC | STEP | Ware nesala do yuma, Allahdi, “Angeda kunkamrume, angeda pio men kunkamrume. Telep kuna ngeda ake. Atep, sunda ukupra-ukupra kunkamrume,” pepra deiamseu upu, moupra gekepmengedi, angepu talepra kunge nesalada, Allahdi telep kupra deiprepa, sunda kange deipra, pio teleppu kunkamenge.

Psalms 128

Israel yala nesalada, ‘Allah er si eremkamep’ tenen, Yerusalem mutu welerbarami taru, perami upu mut tep seku upu

1 Ware nesala do yuma, Allahdi, “Angeda kunkamrume, angeda pio men kunkamrume. Telep kuna ngeda ake. Atep, sunda ukupra-ukupra kunkamrume,” pepra deiamseu upu, moupra gekepmengedi, angepu talepra kunge nesalada, Allahdi telep kupra deiprepa, sunda kange deipra, pio teleppu kunkamenge.
2 Tonda, sun buru di pel dopra kuramrumnyanen, amenda taruda, sun pel domumnge deiki di, telep keca doproprumudi, telep kunkamrume. Tonda, sun yumada, kange deipra, teleppu kunkamrume. Tonda, sun pel dopra, kunkamrumnge yumada, telep kupbankamre.
3 Tonda ukupmantoda, anggur tapu du, ila di nepbaramyanen, du pio weik mouramretopu, sun dopkamrum nerapu yumada, nyapu weik derinkamenge. Tonda, sun nyapu weik kupbankamenga cadi, ukupmanto ngeda, zaitun du mouramre co, er yaten deiki di bolokredi, yambul co ton weika di telep kupra paramretopu, kunkamenge.
Ada, sun nerapu yumada, nyapu weika di deriramengepa, anyapu telep kupra nepbaramengedi, sun ati pumbon kikiman bukra, jen jenkamrume. Anengda konum ukupmengopda, kange deipra kunkamrume.
4 Ware nesala do yuma, sundi Allah Yahweh tep, kware kuprepa, er amutarapu kununge. Tonda, Allahdi, “Angeda kunkamrume, angeda pio men kunkamrume,” pepra deiamseu upu, anengdi aupu moupra gekengedi, angepu talepra kununge. Ukupmengopda, Allahdi anesala yuma tep, arup konum pepmasentopu, pio telep kupra deipserepa, sunda kange deipra pio teleppu kunkamenge.
5 Allah Yahwehdi, sun tep, pio telep kupra deipkamser’ tenen, nedi sun tep Allah moronkamsene. Tonda, Allahdi Yerusalem mutu neitamai kunge nesala, sun Israel yala nesala yuma tep, pio telep kupra deiprepa, sundi kunkameng keca yumada, pio teleppu kupyopda, sun amut pengepa gekepmum nesalada, sun gam kunkamrum taru neitamai yumada, akeca yuma epra kael kepkamrum’ tenen, sun tep Allah morosenune.
6 Tonda, ‘Allahdi puto karepserepa, sunda pio keteng tamun weikanun ton cap gam kuramrumnyanen, sundi konum deiamrum nyapudi derinkameng nyapu peda, sundi epkamrum’ tenen, sun tep Allah moronkamsene.
Tonda, ‘Allahdi nun Israel yala nesala yuma tep, pio melipra kalengserura cadi, nun cap, yuk mutu nesala cap, podana pio gum dipapu, tali kange deipra, pio teleppu kunkamep’ tenen, Allah moronkamne.