Psa 13 | XteSC | STEP | Mazmur upu deiki mut pena tep nengeda, Raja Dauddi seku. Ada, Allah upu mut pena deiyo ngebo karepkamnge tep, amut upu seku.

Psalms 13

Ikin weik kupu ngebodi, Allah tep moropu upu

1 Mazmur upu deiki mut pena tep nengeda, Raja Dauddi seku. Ada, Allah upu mut pena deiyo ngebo karepkamnge tep, amut upu seku.
2 Uo, ne nai Allah Yahweh, ware kuprap taru ton konum kupyopda, kandi ne damai yana lyepropkamnerem do? Ne ikin kange weika di doupra kunun dinin, kandi tupa lumdongonapu kunerum do?
Amenda dorkunkamre taruda, kange di bicau tenepnememdi, yana melipkamnerem do, naio? Uo ne nai Allaho, ware kuprap taru ton tupa men yana melipkamnerem do?
Ukupmantoda, kandi amnyo karikra yukai dinkamrem taruda, tek sisi ne tep men epnetuma tep pepkene naio.
3 Uo ne naio, ware kuprap taru ton cap, ne pe kange dipru neitamai dipapu, ‘Ne ikin kunere keca tep, ware kuptenepa, gum kupra deipnetum do? Ange kuptene do, gum do?’ tenen, ne pe dipapu tenimtonapu kunkamne do?
Ada ipna taru di dipra, keteng komuni neitamai yumada, ikin kange doupnedi, ne kange dipru neitamai di, pio engenapu kunkamne do?
4 Uo, ne nai bo Allah Yahweh, nedi kan tepapu kan si pio pe deipra eremkenune. Atep, kandi ne ikin kunerurnge yumada, epnememdi ne moropkenetopu, ‘Kandi yana melipnetum’ tenen, moropkene naio. Neda ikin weik kunerura cadi, kandi puto karepnetuma deiki di, ‘Kange di telep kupra kutenyopda, men depkamne’ tenen, moropkene. Kandi ne tep, kau men keptapkamnerum’ tenen, moropkene naio.
5 Naio, ne yana pona tep nengdi, ‘E, angebo nundi konum popra sikke buktapmape,’ pepnenung tenen, naio kan tep moropkene.
Tonda, ‘Sundi ne popnengedi, sun amutara deipnengepa, ikin weik kupnerur’ tenen, ‘Kandi melipra lyepnetume’ tenen, moropkene naio.
6 Dinino, ne nai Allah, nedi kan tep pio teka tenekenune. Atep kandi, “Bicau tenepsenedi, nedi, ‘Ukupkamsene,’ pepra, pedina upu deiki di peipsisi upu yumada, pio tek sisi kupkamne ja!” Apeiamsemum ngeda, pio teka tenekenune.
Ne kange dipru neitamai yumadi, kan deikipu deipkene. Atep nengeda, kandi lyepkamnerema cadi, ne kange deipkamne.
Nedi kan Allah Yahweh tep, gispal dopkenedi, mut penkamkene. Deiyoda, kandi pio telep-telep kupra meliamnemuma tep, mut penedi, kan sipu tupa-tupa pio eremkamkene.