Psa 130 | XteSC | STEP | Uo, ne nai Allah Yahweh, ila ikin keca ne damai yanmanerpa, kange mun kange doupra kunmane. Atep, ‘Ne nai Allahdi, yana melipneo,’ pepra, ila upu deiki di ngolongmandi ne nai Allah Yahweh kan tep moropkene.

Psalms 130

Israel nesaladi, ‘Allah er si eremkamep’ tenen, Yerusalem mutu welerbarami taruda, amut perami.

“Kange mun kun keca nun damai yaryopda, Allahdi yana lyemdonkamser,” upepra mororami upu

1 Uo, ne nai Allah Yahweh, ila ikin keca ne damai yanmanerpa, kange mun kange doupra kunmane. Atep, ‘Ne nai Allahdi, yana melipneo,’ pepra, ila upu deiki di ngolongmandi ne nai Allah Yahweh kan tep moropkene.
2 Ne nai Allah, kanda akeca-keca yuma talememdi, ila puto weik ngebo kurume. Atep, ne kange mun kupmanera tep, “Melipneo,” pepra moropmaken ngeda, gekepneo. Ukupmantoda, nimidi ‘Nun kayapu neng wekameng’ tenen, ati buplan pakra deriramengtopu, nedi, “Melipneo,” pepra moronkamne upu yumada, kandi moupra gekenkamnereme. ‘Ne ikin kunere keca tep, moronmaken ngeda, moupra gekepnememdi diryankunerume. Ne moropnetopu melimkamnerum’ tenen, moropkene.
3 Utopu nun nai Allah Yahweh, ^{▼▼Yahweh – Allah er si, tek sisi ngeda, Yahweh kurure. Indonesia Alkitab neitamaida, Allah er si Yahweh kwamngaida, ‘TUHAN’ sengnunge. Aupu kael kemna tep, lap pena upu nomor 49 dirume.} nun mali weik kunup keca yuma tep, ‘Anesala wenepkamne do?’ tenen, tupa men tenenkamserume. Naio kanda akeca-keca yuma talememdi, ila puto weik ngebo kuruma cadi, nun mali kunup keca tupa tenepsememnyopda, ware ngebodi kan damai yana, tali kange doupra tektu do? Gume nun tuai nesala yumadi, ‘Uo, Allahdi wenepra popserur’ tenen, ali dakra inimnapu kutepe. Kan damai men yanmanto kutepe.
4 Uo nun naio, nun mali kunup keca tep, wenemnapu kuramsetum dinino, kanda ‘Sun mali kunge keca yumada, kaukepnedi, anesala lyepnyopda, sun mali kunge keca gum kupra derinkamne’ tenen, putakerepa, bicau teneserum ngebo kuruma cadi, nimi yumadi kan tep kware dangkamkepe. Ada, ‘Allah erda ila mambul ngebo kurure. Tonda, Allah erda pio telep ngebo kurure,’ tenen, kan sipu pio eremnapu kunkamkepe.
5 Ange utopu, ne nong cap, ne kange dipru cap yumada, kan tep keteneipnedi, ‘Allah Yahweh, ware taru yana melipra lyepropkamner do?’ tenen, dinapu kunkamkene. Ne nai Allah kan upuda, pio telep upu kurura cadi, Allahdi “Ukupkamsene,” pepra, pedina upu deiki di peipseunge tepapu, ‘Dan taru di kupkamner do?’ tenen, dinapu kunkamne. ‘Aupu moupra talepnedi, teleppu kunkamne’ tenen, kan upu deiki ne kange derinune.
6 Allahda, akeca-keca yuma taleredi, ila puto weik ngebo kurura cadi, ne dipru neitamai di, Allah tep, pio tupa tenenedi, kange derinune. Er tepapu pio putanerure. ‘Ne nai Allah, dan taru yana lyepropkamner do?’ tenen, ne kange dipru neitamaida, kan tep ketenepra dinapu kunkamkene.
Nimi ati arum kalengna deiyo nengdi, lukunda neitamai, ‘Yu nengdi yana popsengedi, nun talenup keca dalupra dopropsenung’ tenen, pio dinapu kuramenge.
Ange utopu, nedi, ‘Allah dan taru di yana lyepropkamner do?’ tenen, kan tep, pio ketenepra dinapu kunune.
Lukunda kalengna deiyo nengdi, ‘Uo, menmena berektue,’ teneramengtopu, sunda yambula dipapu tenenung dinino, Allah tep tenekenun ngeda, pio weika di putanerepa tupa tenenune.
Nedi kan tep pio moupra dinapu kukenune. Ipmarya, berekmarya yuma, kan tep, kan sipu eremnedi, pio keteneipra dinapu kukenune.
7 Uo, sun Israel nesala yuma peda, Allah er damaipu yakankamrume. ‘Nun nai Allah Yahwehdi, dan taru yana melipra lyepropkamser do?’ tenen, sun nai bo Allah Yahweh tep pio moupra dinapu kunkamrume. Ukuramum pangeda, Allahdi bicau teneseredi, tupa-tupa melipra lyemdonkamsere.
Allahdi nun tuai nesala yuma tep, pio bicau teneserura cadi, pio men tapkamsere. Allahdi, ‘Ne mawa nesala tep, melipra lyemdonkamne’ tenen, tupa-tupa ketenem diserure.
Tonda, Allah erda ila puto weik ngebo kurura tep, pio ikin keca neitamai kutepya peda, melipra lyemdoserure. Erda ikin men kuptue.
8 Allah er dipapu nun Israel nesaladi mali kunup keca yuma kaukepseredi, gum kupra deipseryopda, lyepropkamsere. Lyepra doropseredi, pio telep kupra derinkamsere.
Nun mali kunup keca tep, wenepra poptapsetu dinin, bicau teneseredi, amali kunup keca yuma tep, kaukemseredi, lyemdoserure.