Psa 132 | XteSC | STEP | Israel nesaladi, ila tumi kupnepa, ‘Allah er si eremkamep’ tenen, Yerusalem mutu neitamai welerbarami taru yumada, aMazmur upu mut perami. Sundi perami upuda ake. Nun nai Allah Yahweh, nun deiyo ngebo Daud tep, ‘Bicau teneptumdi, telep kweipkamrem’ tenen, moropkepe. Daud er deikida, ila ikin keca pio weika di kwamupa, kange mun kange douamu ngeda, kandi kange di ton cap tenepkurume, nun nai Allah.

Psalms 132

“Allahda, keana taru tep, Sion mutu kurure,” pepu upu

1 Israel nesaladi, ila tumi kupnepa, ‘Allah er si eremkamep’ tenen, Yerusalem mutu neitamai welerbarami taru yumada, aMazmur upu mut ^{▼▼mut – Amutda, sun Israel yala nesaladi, nun nimi deiyo ngebo, Raja Daud, erepra derina tep taru konum kupupa, amut penmaidi, Yerusalem mut welepi.} perami. Sundi perami upuda ake.
Nun nai Allah Yahweh, nun deiyo ngebo Daud tep, ‘Bicau teneptumdi, telep kweipkamrem’ tenen, moropkepe.
Daud er deikida, ila ikin keca pio weika di kwamupa, kange mun kange douamu ngeda, kandi kange di ton cap tenepkurume, nun nai Allah.
2 Tonda, Raja Dauddi, kanda Allah Yahweh tep, pedina upu ton peipkeu.
Ada, kanda Allah, akeca-keca yuma deiki tara talepra kumemdi, ila puto weik ^{▼▼puto weik ngebo – Ayat 2 cap, ayat 5 cap neitamaida, Ibrani upu deiki di, Allah tep, aupu ‘Abir Yakub’ seki. Ada Allahdi Yakub tep, pio kalekra melimamnga tep aupu pepra seki. Dinino, aupu ‘Abir’ deiyoda, Israel nesaladi, ‘Akeca-keca yuma deiki tara kuredi, ila puto weik ngebo,’ tenena tep ‘Abir’ perami. Atep, sun kael kemna tep, nundi aupu deiyonge jenek kupra sekmepu.} kurume. Tonda, kandi nun apu bo Yakub tep, pio melimamum ngebo kuruma tep, Dauddi, “Ukupkamne,” pepra, pedina upu peiamkeu. Upepra, Dauddi peipkeu upuda ake.
3 Uo ne nai Allah, tek sisi ne pe atida akwapmaner dinin, akati ton cap men wengkamne.
Tonda, ne pe mana tep ati peda akwapmaner dinin, akati pumbon neitamai ton cap weknedi, men mapkamne.
4 Tonda, neda tali lupra men mapkamne.
Udungna weik kapnetua peda, ne tali lupra ne mana ati neitamai weknedi, pio men mapkamne.
5 Deiyoda ake. Ada, ‘Menmenada, ne nai Allah Yahweh, ^{▼▼Yahweh – Allah er pe si sisada, ‘Yahweh’ kurure. Alkitab Indonesia neitamaida, ‘Tuhan’ pepra sengnung dinin, nundi, Ibrani nengdi peramitopu, jenek kupra sekmepu.} er si eremna ati ketenepra doptene’ tenen, pio putapnere. Atep akati dopkamne ja. Akati konum dopnyopda, ataruda kange deipnedi, ne pe ati ton, kange di ton cap wektenedi, ne pe ati neitamai maptene.
Ada, kanda Allah, akeca-keca yuma talepra, pio deiki tara kumemdi, ila puto weik kurum ngeboda, nun apu bo Yakub tep, pio melimamume. Atep, ne kangeda, kan si eremna ati menmena doptenyopda, amenda taru ne pe ati neitamaida, wengna telepe pua. Gum dingeda, gume tenenune.
6 Nun Israel yala nesaladi, pio telep upu ton konum gekepmupu. Ada, Efrata mutu kunge nesaladi gekepidi pepseipa, nun ton gekepmupu.
Tonda, Yaar ^{▼▼Yaar – Allahdi, “Angeda kunkamrume, angeda pio men kunkamrume,” pepra deiamu mem upuda, gel pala deiki sekudi Musa karepupa, Musadi akeca dopra, co bekin pumbon dongopu. Amenda taruda, Israel nesala cap, yuk mutu neng cap, podanapu kurami taruda, ‘Abekinda, nun pona tep nengdi upula dopropsenung’ tenen, akeca dopra, Yaar mutu keana taru tep deipi. Ange kael kemna tep, 1 Samuel 4:1-6:16 cap, 7.1–2 cap, tonda, 2 Sam 6.2–15 cap, 1 Tawarikh 13.5–8 cap dinkurume.} mutu neitamai kunge nesaladi aupu ton pepipa, gekepmupu.
7 Amutu-mutu neitamai kunge nesaladi upepsei. “Nun kayapu neng, sun yuma gekepseso! Nun yumadi kikiman bepedi, Allah er keana taru tep kururai, Yerusalem mutu benkamepe!
Yerusalem mutu bepe dingeda, Allah er si eremna tep, nun yumadi, nun giso tu deiki dipra genepdongopmepedi, Allah er sipu eremkamepe. Ukupmantoda, Yerusalem mutu, Allah er keana ^{▼▼keana taru – Allahda, tek sisi im deikipu kurur dinin, keana taru tep nengeda, “Yerusalem mutu neitamai dinin, ne si eremna ati pumbon kunkamne,” pepka tep, aupuda pepra seki.} tep, beipe peingamre mutu neitamai kurura cadi, Yerusalem mutu bepedi, er sipu eremkamepe.
8 Atep, ‘Nun nai Allah Yahweh, kanda adipapu bukromemdi, kan keana taru tep beipe peingkamrumai, Yerusalem mutu bena kunkamrume’ tenen, moropkepe.
Ada, kan Allahdi, “Angeda kunkamrume, angeda pio men kunkamrume,” pepra deiamsemum upuda, gel pala deiki sekeiamumpa, Musadi, akeca dopra, co bekin pumbon dongopu keca, er sida Pedina Upu Co Bekin, tonda ‘Peti Perjanjian’ ngeda, ‘Akeca dopropmemdi, Yerusalem mutu duyankamrume’ tenen, moropkepe naio.
9 Uo nun nai Allah, kan si eremna ati pumbon pel dona deiyo neng, sun imam-iman nengdi, pio dumsisipu kunge nengda, sun cap yankamenge.
Tonda, kan Allahdi, ‘Ne mawa’ tenen, konum weiamsemum nesalada, kange deipmepedi, ila upu deiki di kan sipu pio eremkamkepe.
10 Nun nai Allah, kandi nun deiyo ngebo Raja Daud tep, pio bicau teneruma cadi, ‘Er Daud tep pio men tamkamrum’ tenen, moropkepe. Ada, kandi Daud tep, ‘Angebo Israel nesala yuma talenkamre. Erda nimi deiyo kepra, Raja Israel kunkamre’ tenen, konum wepra deiamuma tepa.
11 Menop taruda, kanda Allah Yahwehdi, nun deiyo ngebo Daud tep, pedina upu deiki di, “Pio tek sisi nimi deiyo talepra kuna ngeda, karepkenedi, ereipkamkene,” pepra, pedina upu deiki di konum peipmume.
Allah kandi, apedina upu deiki di konum peipmuma cadi, angeda pio men tamkamrume. Allah kandi aupu ton peipmume. “Daud kandi deipkamrem nyapu kankan neitamai di, Israel yala nesala sun nimi deiyo ngebo Raja kemna tep, nimi ton pio wepra ereipkamne ja.
Tonda, kan Dauddi, Israel yala nesala deiyo ngebo kemna tep, ila telep bungna keca, er sida takhta deiki, kandi deipkamrem nyapu kankan di, tenpu ngebo ton wepra deipnepa, atakhta deiki bukredi, Israel yala nesala yuma talenkamre ja.
12 Tonda, kandi derinkamrem nyapu yumada, ne Allahdi, “Angeda kunkamrume, angeda pio men kunkamrume,” pepra, pedina upu deiki konum peipkesi upu, kan nyapudi moupra talepmengedi, pio dumsisipu kupmengopda, aneng peda tupa erepra derinkamne. Sun ton Israel nesala yuma talenkamenge.
Tonda nedi, “Telep kuna tep, angeda kunkamrume. Dumsisi kunange tep, ukupra-ukupra kunkamrume,” pepra, deiamsisi upuda, kan Dauddi derinkamrum nyapu tep peterepnepanen, sun gekepmengedi, angepu talepra teleppu kupmengopda, sun cap, tonda sundi derinkameng nyapu capda, Israel yala nesala talepmengedi, ila nimi deiyo neng, Raja-Raja kunkamenge. Raja kepmengedi, Daud kan nimi deiyo kemna tep bungna keca, er sida takhta deiki bukmengedi, Israel nesala talenkamenge.
13 Allah er si Yahwehdi, er keana taru kunkamrai tep, Sion ^{▼▼Sion – Pumun taruda, Yerusalem mutu tep, er sida Sion mutu perami. Akati arum tep, si butene perami dinin, amutuda tenpua.} mutu konum wepra deipu.
Allahdi, “Teka, Yerusalem mutu neitamaida, ‘Ne pio akunkamne’ tenen, putapnera tep, acapu kunkamne ja!” pepu.
14 Tonda, ange utopu, Allahdi, “Amutu neitamaida, ne beipe peingna mutuda, acapu pio akunkamne,” pepu.
Tonda, “Sion mutu pio putapnera cadi, amutu neitamaipu pio akunkamne ja!” pepu.
15 Tonda, Allahdi pepu, “Amutu neitamai kunkameng nesala, sun putan keca yala-yala yumada, ne dipapu weika di karenkamne.
Tonda, amutu neitamai kunkameng nesala kan-kan peda, sun putapkamre jen keca ton karenkamsene.
16 Tonda, nimi lyemna tep upu, Sion mutu kunge imam-imam neng tep peterepnepa, kael kepmengopda, sundi yuk Israel yala nesala yuma tep, peterepmengepa, gekepra kael kepbankamenge.
Tonda, Yerusalem mutu neitamai kunkameng nesala tep, nedi, “Ukunkamrume,” pemsisi upu moupra talenkameng nesala yumada, nedi telep kweipnepa, sun pingping kange doupmengedi, ila upu deiki di ‘Telepe,’ pepra penkamenge.
17 Sion mutu neitamaida, ne puto karepnedi, go karepnepa, Dauddi deiprepa, dadeipdanen bankameng nengpu, wepra deipnepa, Israel nesala talenkamre nimi deiyo ngebo ^{▼▼deiyo ngebo – Ibrani upu deiki di, akayat neitamaida, ‘tanduk’ seki. Dinino, ada domon upu deiki di seki. Aupu ‘tanduk’ deiyo neitamai ngeda, nimi deiyo ngebo, Raja tenena tep perami. Atep, aupu deiyo ngeda katuai kupra sekmupu.} kunkamre!
Ne Allahdi, Israel nesala talepra, nimi deiyo ngebo kurur Raja Daud tep, ‘Angeboda, tek sisi Israel nesala sun nimi deiyo ngebo kunkamre’ tenen, konum wepra deipsa tep, amutu yumada, tek sisi talenkamre ja!
18 Daud tep, ‘Angebo nun song’ tenen, mar poryakankameng neng yuma tep, ne Allahdi, wenepra, sun aneng yumada amutarapu kepra deipne pangeda, sun pio ali weik dangkamenge.
Dinino, nedi wepra deipsi ngebo Daudda, er nimi deiyo ngebo kemna tep, petenkemna keca, er si mahkotada, nimidi ange dopra, Daud er giso deiki deipmengopda, er mahkota deikida, ila dirinda pio weik kupkamre!