Psalms 135

Nun nai bo Allah Yahweh tep, “Kanda pio teleppu kurume,” pepra er sipu eremnupe. Yuk neng cap, nimidi yuk keca tep si eremenge nge cap yumada, sun si pio men ereptepe,” pepu upu

1Nun yumadi, nun nai bo Allah Yahweh tep, “Kanda pio teleppu kurume,” pepra er sipu eremkamepe! Tonda, nundi Allah tep, ‘Uo kan si Yahwehda, pio mambul telep si kukerure,’ pepra, er si eremkamepe!
Tonda, Allah Yahweh er amutara kumumdi, er pelpu dorum nesala peda, sundi Allah er si eremkamrume!
2Ada, Allah Yahweh er si eremna ati pumbon tekmumdi, ‘Allahdi nun mali kun keca kaukepkamser’ tenen, er karena tep, gam keca popnedi, yapi karerum deiyo neng, sun imam-imam nengda, sun pedi Allah er si eremkamrume!
Teka, nun si eremnup Allah tep, nun yumadi er tep, “Allah kanda pio telep ngebo kurume,” pepra, er sipu eremkamepe!
3Allah Yahwehda, pio teleppu kurura cadi, nun yumadi, “Kanda pio telep ngebo kurume,” pepra, er sipu eremkamepe.
Tonda, Allah er si erepmepedi, mut deiki di er si eremkamepe. Deiyoda, Allah er kange dipapu, ila di bicau teneseredi, melimserure.
4Ada, Yakubdi deiamupa, dadeipdanen yakanup nesala yumada, Yahwehdi, ‘Ayala nesalada, ne mawa nesala kunkamenge,’ tenepseudi, wepra deipseu. Teka, nun Israel yala nesala yumada, konum wepra ereipseua tep, “Sun yumada nengepu kuruma cadi, pio tep talenkamsene,” peserure.
5Ne kaele. Nun nai bo Allah Yahweh, erda puto weik kuredi, ila mambul weik ngebo kurure.
Teka, nun nai bo Yahweh, akeca-keca yuma deiki tara erepra kurure. Nimidi tali keca tep si eremnung nge yumada, Allah er amutarapu kununge. Yahwehda er tenpu Allah kurure. Nimidi yuk keca tep si eremnung keca yumada, tali kecapu kurure.
6Allah Yahwehdi, ‘Ukunkamne,’ tenerur keca yumada, adipapu tali lupra kurure. Ada, im deiki cap, im neitamai cap, tuai mutu ban-ban yuma neitamai yuma cap, ila laut mokon pumbon cap, ila kauryai, ada nundi men eptepe mutu neitamai yuma peda, Allahdi tenerurtopu, er pel dopra kurure.
7Ukupmanto ngeda, ake. Tuai mutu sirikai di, erdi kareprepa, ila dua welerure. Tonda, erdi kareprepa, ila perenglang penange, perenglang perure.
8Tonda, pumun taruda, Mesir mutu neitamai kurami nesaladi derirami weni sal nyapu yumada, popra gawal daku. Sun yuma depi. Ada, nimidi deiami sal nyapu, sun weni nyapu yuma cap, nimidi peirami gam keca yumadi derirami jem nge nyapu yuma cap tep, popupa, akeca yuma ataru dipu depi.
9Angetopu, sun Mesir mutu kurum nesalada moupra tenepso! Menop taruda, Allahdi, nimi men kupmanto keca cap, ila puto kunupsek pen pel cap, sun kan-kan neitamai di doramnga deiki di, ‘Amutu nesala yumadi, uo nun mutu neitamai pio mambul pel donmaser ngeboda, tek sisi Allah tepa,’ tenepkameng tenena tep, Allahdi apel doramu.
Ukupra kuramnga deiyoda ake. Ada, ‘Mesir mutu ila nimi deiyo ngebo Firaun cap, er amutara deiyo-deiyo neng yuma cap tep, ‘Popnedi, amutarapu deipkamne,’ tenepudi, sun nong deiki ila kange mun keca kareamu.
10Tonda, Yahwehdi, er mawa nesala makuna tep, sun dana-dana tara kurami nesala, yuk nesala yala-yala yumada, popra gawal dangamu. Tonda, amutu-amutu yuma talerami deiyo neng, sun ila nimi deiyo-deiyo neng kepra, ila puto weik Raja neng kurami dinin, Allahdi aRaja neng yuma popra sikke buktamamu.
11Ukupmantoda, sun Amori yala nesala taleramu deiyo ngebo Raja Sihon cap, tonda, Basan yala neng taleramu deiyo ngebo Raja Og cap, tonda Kanaan tara neitamai yuk-yuk nesala talerami Raja-Raja neng weikanun cap, popra gawal dangamu.
12Allahdi animi deiyo neng poramunge deiyoda ake. Ada, erdi, ‘Ne mawa nesala kunkameng’ tenen, wepra deiamsi nesala, sun Israel nesalada, pio tep nengepu kunkamenga cadi, amutu-amutu yuma dalupra dopropnedi, sun Israel yala nesala yuma tep bokra karepkamna cadi, atara mutu tu yumada, sun ngepu pio kunkamre.
13Uo, nun nai bo Yahweh, kan ila mambul telep sida, pio tep akunkamre. Kan sida nimidi tupa tenenapu kunkamenge.
Teka, tuai mutu ban-ban yuma neitamai kunge nesaladi, kan tep, “Uo, Allah Yahwehda, pio puto weik kuredi, ila mambul kunupsek pen pel dorur ngebo kurure,” pepra, yuk neng gekenai tep lap penapu kunkamenge. Ataru di dipra, dorkunkamre taru neitamai yumada, pio penapu kunkamenge. Tuai nesala yumadi, kan si men lumdongonkamenge.
14Ada tali tep gum dinin, deiyoda ake. Yahwehdi, ‘Sunda ne mawa nesala kunkameng’ tenen, wepra ereipu nesala, sun Israel nesalada, ikin weik tupa kunung dinin, amenda sirya taruda, sun yuma tep melipra lyepredi, kange di tamupra telep kudinkamre. Ukupre pangeda, yuk nesala yala-yala yumadi, ‘Uo’ tenen, “Sun Israel nesalada, tek sisi Allah er mawa neng kununge,” pepra gispal donkamenge.
Allahdi ukupkamra deiki di, er mawa nesala, sun Israel nesala yuma tep, ila di bicau tenepredi, melipra lyepredi, pio telep kweipkamre.
15Nun kaele. Tuai mutu ban-ban yuma neitamai kunge nesaladi, tali keca tep, isok si eremnung dinin, akecada tek sisi gam kure keca gume. Sundi si eremnung keca yumada, kunumna weik keca, er sida emas cap, perak cap dopropmengedi, sun pe buru di petupra derinunge.
16Atep nengda, sun buru di petupra deipmengedi, si eremnung keca yumada, sipyal akapmar dinin, upu tenpunge peda men peptenge. Akeca deikida, asuru ton petupra derinung dinin, akeca di pio men eptenge.
17Ange utopu, akeca petupra derinung ngeda, amul ton petupra derinung dinin, pio men gekeptenge. Sun petupra deipmengedi, si eremnung keca yumada, gam men kurura cadi, isin ton pio men kurure.
18Ange tep nengeda, ware nesala do yuma, sundi, ‘Isok si eremkamep’ tenen, sun pe buru di petupra derinung kecada, gam kuna gum keca kuretopu, sun akeca petumna deiyo neng cap, akeca petupra deipmengepa, ‘Nun nai bo ake,’ tenen, teka tenepra si eremnung nesala cap yumada, atali keca kuretopu kupra kunkamenge.
19Uo, sun Israel yala nesala yumada, ne pepkusen upu moupra gekepso! Nun nai bo Yahweh tep, “Naio, kanda tek sisi pio telep ngebo kurume,” pepra, Allah er sipu eremkamrume!
Tonda, Harundi deiamupa, dadeipdanen, yakaramrum nesala, Harun yala nesala yumada, sun pedi, nun nai bo Yahweh tep, “Naio, kanda tek sisi pio telep ngebo kurume,” pepra, Allah er sipu eremkamrume!
20Ange utopu, nun apu bo Lewidi deiamupa, dadeipdanen, yakaramrum nesala, Lewi yala nesala yumada, sun pedi, nun nai bo Yahweh tep, “Naio, kanda tek sisi pio telep ngebo kurume,” pepra, Allah er sipu eremkamrume!
Tonda, ware nesala do yala-yala yumada, Allah tep, teka tenepmumdi, ‘Allahdi peserur upu moupra talemepedi, angepu pio kunkamep’ tenen, er tep kware kusere nesala yumada, sun pedi, nun nai bo Yahweh tep, “Nun nai Yahweh, kanda tek sisi pio telep ngebo kurume,” pepra, Allah er sipu eremkamrume!
21Tonda, sun Sion mutu neitamai kurum nesala yumada, sun pedi, nun nai bo Yahweh tep, “Nun nai Yahweh, kanda tek sisi pio telep ngebo kurume,” pepra, Allah er sipu eremkamrume!
Ange utopu, nun tuai mutu neitamai kunup nesala yuma peda, nun nai bo Allah Yahweh tep, “Nun nai Yahweh, kanda tek sisi pio telep ngebo kurume,” pepra, Allah er sipu eremkamepe!