Psa 138 | XteSC | STEP | Raja Dauddi aMazmur upu mut seku. Sekudi, Dauddi pepu upuda ake. “Uo, ne nai Allah, ne kange dipru neitamai yuma di, kan tep, “Telepe,” pepkene. Teka, sun im deiki kunge malaikat yuma, sun gekenungai di, nedi amazmur upu mut deiki di kan tep, “Pio telepe,” pepra amut pekenune.

Psalms 138

Allah, ‘Telepe,’ pena tep, mazmur upu mut seku

1 Raja Dauddi aMazmur upu mut seku. Sekudi, Dauddi pepu upuda ake. “Uo, ne nai Allah, ne kange dipru neitamai yuma di, kan tep, “Telepe,” pepkene.
Teka, sun im deiki kunge malaikat yuma, sun gekenungai di, nedi amazmur upu mut deiki di kan tep, “Pio telepe,” pepra amut pekenune.
2 Tonda, Allah kan si eremna ati, pio telep lek ati kupka damai di, kan si eremna tep, tu deiki gutam dipdongopra akati epnedi, kan gekena tep, amut pena deiki di penune.
Ukununa deiyoda ake. Ada, kan Allah cap, kan si pio telep ngebo cap, kandi, “Ukupkamne,” perum upu utopu ngepu kupra kurumnge cap, ange yuma tep, “Telepe,” pepkene. Tonda, kanda pio ila di bicau tenesememdi, “Ukupra telep kudinkamsene,” pepra, pedina upu ^{▼▼pedina upu – Akayat neitamaida, Ibrani upu deiki di ‘hesed’ seku. Indonesia Alkitab neitamaida, ‘kasih-Nya kekal’ sengnunge. Ange telep dinin, nundi, ‘Ketengban nesaladi aupu deiyo neitamainge moupra kael kepkameng’ tenen, aupu ‘hesed’ deiyo ngeda, jenek kupra sekmepu.} deiki di peserumtopu, ange tupa-tupa kuserumnge tep, nedi, “Pio telepe,” pepkene naio.
Ange tep nengeda, Allah kan sipu pio eremkenune. Ada, akeca-keca yuma akapmare dinin, kandi yuk akwamre keca deiki tarada, kan pe si konum erepra deiamuma cadi, kan sida ila mambul si kurura tepa.
3 Uo ne nai Allah, nedi kan tep moropsi tumi dipapu, kandi ne moropsi upu gekepnemumdi, adipapu tamupra melipnerume.
Melipnerumada, tali gume. Ada, kandi ne tep, puto weika di tapakra karepnemuma deiki di, ne kange dipru neitamai yumada, puto weikanun ton kupneupa, ne pona tep neng tep tenipnedi, kware tenena gum dipapu, balila weik kunune.
4 Tuai mutu ban-ban yuma neitamai kunge nesala tep, talenge ila nimi deiyo neng, sun Raja-Raja neng yumada, kandi peserum upu konum gekenkamenga cadi, ange tep nengeda, sun yumadi kan Allah tep, ‘Kanda pio telepe,’ pepra, kan si tepapu pio eremkamkenge.
5 Kanda Allah Yahwehdi kurum keca cap, kandi pel dorum keca tep, tenepmengedi, kan tep, ‘Uo, Allahda pio telep kurure,’ pepra, mut pena deiki di, kan si tepapu eremkamkenge.
Sundi kan si eremkamkenga deiyoda, tali tep gume. Moupra gekepneso! Ange deiyoda, Allah kan ila puto cap, kan pio telep kurum keca cap, kan dirine capda, pio weik cadi, sun yumadi kan tepapu, kan si erepra, kange lon mut penkamkenge.
6 Ton deiyoda ake. Ada, kanda Allah Yahweh, tek sisi akeca-keca yuma talepra kumemdi, pio deiki tara, ila puto weik ngebo kurum dinin, kandi nun tuai mutu neitamai ikin weik kunup nesala tep, bicau tenepsememdi, tupa teneserume.
Dinino, sun pe dipru erepdangedi, salnong-nong kamnung neng yuma tep, karenai dipapu dirume. Aneng damai yana, sun tep men melimrume.
7 Ne kaele, pio ikin kunerepa, kange mun kange doupra kune taru peda, kandi ne tep kalekra melimnerume. Melimnememnya deiki di, ne pona tep nengdi, ila yu kuprepa, ‘Angebo nun songe cadi popkupe,’ tenepnetenga peda, sundi men poptapkamnenge.
Deiyoda ake. Allah kan dumsisi tara ila puto kukerur buru di, lortamnememdi, lyemdonerume. Atep, ne pona tep nengdi, men poptapnetenge.
8 Atep nengeda, ne kaele. Kanda Allah Yahwehdi ne tep, ‘Angebo nedi melipnepa ukunkamre. Tonda, apel dopkamre, akeca ton ukupbankamre,’ tenenemum keca yumada, melipnemuma deiki di, ange yuma tek sisi nong kepkamre.
Tonda, ange ton konum kael keamsi. Kandi nun tep, ila di bicau tenesememdi, ‘Ukupra pio telep kudinkamsene,’ pepra, pedina upu ^{▼▼pedina upu – Akayat neitamaida, Ibrani upu deiki di ‘hesed’ seku. Atep, aupu deiyo neitamainge moupra kael kepkamrum’ tenen, aupu ‘hesed’ deiyo ngeda, jenek kupra sekmepu.} deiki di peserum keca yumada, pio men tamrume. Ange yuma pel donapu kurume. Ila di bicau teneserum ngeda, pio kunkamra cadi, ange yumada tek sisi nong kepkamre.
Atep nun nai Allah morokenupe. ‘Kan puto buru dipapu ketekepra deiamsemum nesala yuma tep, tupa tenesememdi, pio men tamserume. Melimnapu kunkamserem’ tenen, morokenupe naio.