Psalms 139

“Allah erda, ila kael kemna cap, akeca-keca yuma kalekra dina cap, deiyo ngebo kurure,” pepu upu

1Raja Daud mut pena deiyo ngebodi pepu. Teka ne nai Allah Yahweh, kan dipapu ne talepra kunun keca yuma tep pio moupra dinememdi, kael kemnerume.
2Tonda, ne bukne taru do, mapne taru do, bukra embane taru do yuma? Ne kunun keca yala-yala peda, ne nai kan dipapu kael kemnerume.
Ada Allah kanda pio karenai kurum dinino, ne tenenmane kange cap, ne kange dipru neitamai tenenun keca capda, kan dipapu epra kael kemnerume.
3Ange utopu, ne pel done taru pe, beipye peingne taru pe, embanmane taru pe yumada, kan dipapu dinememdi kael kemnerume. Ne kunmane keca cap, pel donun keca yala-yala yumada, kan dipapu kael kemnerume.
4Uo, ne nai Allah Yahweh, kanda ne kapul tenepnedi upu men peipmane taru di ne, ‘Apepkaman’ tenepmane upu yumada menmena kandi gekepra epnememdi, kael kemnerume.
5Ange utopu, Allah kandi ne tep, atara-atara yuma, ‘Mali keca di ne mi tep mali kupra deiprur’ tenen, ongopra warekdongopnemumdi kalengnerume.
Tonda Allah kan ila puto deiki erepra kumemdi, ne melimna tep kan buru di ne nong deiki talepnemumpa, neda kan amutara telep kupra kunune.
6Allah kandi tenepra kael kemrum ngeda, nedi ange yuma men tenepra kael kepmanto. Allah kan tenerumnge ‘Kael keptene’ tenen, tenepeteptenya peda, tek sisi pio men kael keptene.
7Allah kan ila puto ngebo kumemdi, mutu ban-ban yuma diruma cadi, nedi, ‘Neda inipra yuk mutu benkune’ tenen, kan damai di tapra betenya peda, dan cei inipra betene do? Gume, angeda men kupmanto.
Tonda Allah kan damai di ‘Sepdaro yuk karenai benkune,’ teneptenedi, betenya peda, ware kuptene do? Gume. Kanda mutu-mutu yuma moupra dimem ngebo kuruma cadi, angeda pio men kupmanto.
8Ange utopu, ‘Im deiki tara welepra inimbenkune,’ teneptenedi betene mutu peda, Allah kan akunapu kurume. Tonda, nesala depmengedi banungai, ‘Ne depnyopda betenedi, inipra bena mapkamne,’ tenepra betene mutu peda, ne nai Allah kanda amutu neitamai akurume.
9Tonda, ne ma pol utopu keca deiki di lakraptenedi, keteng yakan tara mutu betenya pe, keteng dangban tara ila karen mutu dabetenya peda, amutu neitamai peda, kan pio akumemdi dinkamnereme.
10Amutu neitamai dabena kutenya peda, kan buru puto deiki dipapu melimkamnereme. Utopu kan dumsisi buru deiki dipapu talepnememdi, telep kupra derinkamnerume.
11Tonda ukupmanto, ikin keca ne damai yare taruda, nedi kange mun kange doupnedi, ‘Uo, kunungna di kepdongopnerur’ tenen, “Kware pio weik kunmanere,” peptene.
Tonda, ‘Ukutaruda ne dirinai kunun dinino, amenda taruda, ikin keca ne nong deiki yanerepa kange mun kupneryopda, kunungnaipu kunkamne,’ teneptene. Ange yuma teneptenya peda, kandi tupa melipnetume.
12Ada tali tep men pepne. Deiyoda, kan damai, kunungna keca ton pio men kurure. Tonda kunungna neitamai peda, kanda keteng komuni taru utopu kuprepa, betapra dirume. Akeca-keca yuma dirum ngebo cadi, lukunda neitamai peda, dirine utopu kukerur ngebo kurume.
13Tonda, Allah kan dipapu ne nong neitamai kupneu keca yumada, ketekepra deipnemume. Tonda, kan dipapu nanin kapul men mumun douamneu taru di, kandi menmena ketenepra deiamnemume.
14Atep nengeda, nedi Allah kan tep ila kange deipra gispal donkamkene. Ada, tali tep gume, ne nai Allah kandi ne nong deiki kapneunge yumada, ‘Ukupkamre’ tenen, pio telep kupra deiamnemuma tepa.
Tonda ne nai Allah kan pel domem keca yumada, nimidi men kupmanto pel doruma tep, nedi kan si tepapu mambule tenepra, nedi gispal donkamkene. Tonda kandi ne tep pel dopnemuma deiki di, ne betapra kael kepnedi, bouna di kan amutarapu kunkamne.
15Allah kandi ne yo yuma ketenepra deipnemum taruda, moupra dinmamumdi, dukdongopra deipembenamnemume. Ada nanin mumun neitamai men kwamsi taru di, apel domnemume.
Ukupra keteneiamnemumpa, nanin mumun pumbon dadipu inipra neramsi. Ne ainipra neramsaida, Allah kan dingeda men inipmanto kuramu. Adipapu epra kael keamnemumdi anuamnemume.
16Nanin mundu neitamai kuramsi taruda, kandi menmena epra kael keamnemumdi anuamnemume. Ukuamnemumdi, ‘Angebo er gam kunkamre taru neitamaida, ukupra-ukupra kunkamre,’ teneramnemumnge yumada, kan gam kuna buku deiki ne si sekra deiamnemume.
Tenpu tumi neitamai konum kupneunge cap, amenda taru kupkamnenge cap peda, kapul men gonga kepneu taru di, ataru-ataru kunkamsi keca yumada, pumun taru kandi konum tenepra kael keamnemume.
Tenpu pelda, kapul men gonga keamum taru di, ataru-ataru kupkamunge yuma tep nengeda, ne nai kandi pumun taru tenepra konum kael keamume.
17Allah Yahweh kandi tenenerum ngeda, nedi ayuma men kael kepmanto, pio ila mambul tenenune. Tonda ange yuma nedi nuktenya peda, pio weik cadi, ayuma nukra men gawal daktene.
18Tonda, me wenenga weik kapunge yumada, ne dipapu nukpeteptenya peda, pio men nukmanto kurure. Utopu, kandi tenenerum ngeda, pio men nukmantopu kurure.
Ne mapmanya bukrone taru peda, kan tepapu pio tupa tenekenuna tep, kan cap tonpa kikiman dukdongopra kunume.
19Ne nai Allah, ne putapnere ngeda, pepkukene. Ada, kandi tenepmemdi, mali kun kecapu talepra kunung nesala yumada popra tapkurume.
Tonda, sun nimi pon nengda, ‘Nimi weika di, ton cap tapakra poptepe,’ tenen, putarur nesala yumada, ne nai Allah kandi sun anengdi ‘Nimi popkamep,’ tenenung neng yumada, ne damai di doupra yuk tara pio karen mutu dadoupra dubenkamrume. ‘Uo, ne nai Allah erdi ukuptue’ tenen, pio putanerure.
20Sun amali kun kecapu talepra kunung neng yumadi, Allah kan si tep pio mali pedikenunge. Tonda, Allah kan kange deipmum mutu si deiki di, pio tek sisi mali pepra, mok upupu petamnunge.
21Teka ne nai Allah Yahweh, kan tep sundi kan nong deiki mali upu pepra derikenung neng yumada, nedi sun anesala tep yu tenenune.
Tonda, Allah kan damai mali upu pepra derikenung nesala, sundi, ‘Allahda nun songe’ tenen, yanirtamkenung neng tep nengeda, ‘Ware keca deiyo tep mali upu pepra, pio mali weik kunung do?’ tenen, ne dipru neitamai yumada, kange mun pu jenerure. Angeda, ne nai Allah kan kaele.
22Sun amali kun kecapu talepra kunung nesala yuma tep nengeda, nedi sun tep pio yu tenenune. Sun aneng tep nengeda, meteka dipu, ‘Sunda telep kununge,’ pio men tenenune. Tonda, sun aneng yumada, ne podan neng utopu kupra kununge.
23Ne nai Allah kan dipapu ne dipru neitamai tenenun kange yumada, wepra dipetepnememdi, kael kemnerume. Tonda, Allah kandi, ne tenene kange yuma tep, pio moupra dipetepmemdi, kael kepnerume.
24Mali kun keca yuma ton ne dipru neitamai mali tenenange akuamnerepa epnemem dingeda, ne nai Allah kandi amali kun keca yuma doupra, dumsisipu kupra deipkamnerume.
Tonda, ne embankamne bisi yuma peda, kandi ne tep, “Pio telep kun bisi, pio dumsisi gam kuna bisida ake,” pepra talepra dubenkamnerume.