Psalms 14
Mut pena deiyo ngebo Dauddi, mali kunge nesaladi, sun mali kunge keca tep pepu upu
1Allah tep teka men tenenung neng dingeda, ‘Allah tek sisi men kurure,’ penung dinin, aupu penge nesalada, sun pio walwal nengdi penunge. Adeiki sundi kunge keca yala-yala yumada, mali kecapu kununge. Sun anengda tenpu ngebo peda, telep men kurure. Sun yuma malipu kununge. 2Allah er si Yahweh im deiki di, nimi tuai mutu kunung nesala tep, ‘Dumsisi telep kupra, ne tepapu enenung do? Ne kune keca cap, nedi pene upu cap tep, betapra kael kemnung do?’ tenen, diserure.
3Dinin, mutu ban-ban yuma kunge nesala yumada, pio ton dumsisi kupra, telep ton men kununge. Tenpu ngebo peda, telep men kurure. Nesala yumada, mali kecapu tenepra pel donunge. Allah tep amnyo karekra tapmengedi, yuk tali kecapu dombanunge.
4Nimi mali keca kunung neng yumada, men kael kepkameng do? Mali kecapu talepra kunge nengdi, jen keca er si roti jeramengtopu, ne nyapu yumada ponunge. Tonda, Allah er si Yahweh tep, ‘Naio melipra lyepserume,’ pepra, er tep men moronunge. 5Mali kecapu talepra kunung nesalada, amenda taru ila kwar dangkamenge. Ada, Allah tep teka tenepra dumsisipu kunung nesala tep, lyepropredi, sun kan-kan kunkamre dinin, Allah tep teka men tenenung nesalada, ila kwar dangkamenge.
6Ne Allah tep teka men tenepmengedi, mali kun kecapu talepra kunung nesaladi, ne tep teka tenepra amutara kunung nesaladi, ‘Ukunkamepe,’ tenenge ngeda, upu sengdongonunge. Dinino, Allah Yahwehdi, er tep teka tenenung nesala tep, pio kalekra melimkamre.
7Allah Sion mutu di yankamre ngeda, Israel yala nesala yuma yana lyepropkamre. ‘Menmena lyepropsetue’ tenen, Israel nesaladi pio moronunge. Ukutaruda, Israel nesala ikinpu kunung dinin, Allah Yahwehdi, kange di ton cap sun keca yuma telep kupra deipre pangeda, Israel nesala yumadi kange deipkamenge. Ange utopu, Yakubdi deipupa dadeipdanen, yakarami nesala yumadi, kange deipkamenge. Ada, sun Israel yala nesaladi kange deipkamenga tep pepne.
Copyright information for
XteSC