Psa 141 | XteSC | STEP | Raja Dauddi aMazmur upu mut seku. Sekudi Dauddi pepu upuda ake. Uo ne nai Allah Yahweh, kan tep moropmakenada, ‘Menmena di gekepkunerum’ tenen, moropkene. Nedi kan tep, ‘Melipneo!’ pepra, morokenun taru yumada, ‘Kandi moupra gekepnememdi, melipkamnerem’ tenen, moropkene naio.

Psalms 141

Idona taruda, Dauddi aupu pepra, Allah tep moropu upu

1 Raja Dauddi aMazmur upu mut seku. Sekudi Dauddi pepu upuda ake.
Uo ne nai Allah Yahweh, kan tep moropmakenada, ‘Menmena di gekepkunerum’ tenen, moropkene. Nedi kan tep, ‘Melipneo!’ pepra, morokenun taru yumada, ‘Kandi moupra gekepnememdi, melipkamnerem’ tenen, moropkene naio.
2 Ukupmantoda, sun imam nengdi, nintong telep pen keca uku dongopmengepa, aketda kan damai weleramrepa gekememtopu, ‘Nedi moropmaken upu peda, kan damai yatupa, gekepnetum’ tenen, moropkene naio.
Tonda, ukupmantoda, nun Israel yala imam nengdi, ‘Nun mali kun keca kaukepseredi, ka di tamupra telep kweipkamser’ tenen, idona taru yuma, gam keca popmengedi, kan karena tep, uku dongoramengtopu, nedi ne buru erepnedi, kan tep moropkene naio.
3 Uo ne nai Yahweh, ‘Neda, mangkau di mali kupnun’ tenen, kandi moupra kaleknemempa, ‘Ne sipyal di mali upu tenpunge peda, tali lupra men penkamne’ tenen, moropkene.
Teka ne nai Allah, ‘Ne sipyal aknedi, mangkau di mali upu pepnun’ tenen, kandi kalekra melipkamnerume naio.
4 Ange utopu, kan melipnememnya deiki di, ne kange dipru neitamai peda, ‘Mali tenenange tenpunge peda, pio men tenenkamne’ tenen, “Melipneo!” pepra moropkene naio.
Tonda, ‘Ne cap, mali kun kecapu talepra kunge neng cap, kikiman embapedi, mali keca kupnup’ tenen, kandi kalekra melimkamnerume naio.
Tonda, sun mali kunge nengdi, ‘Nun nai bo ake’ tenen, isok-isok si eremna tep, karenung jen keca, nedi ton, ‘Aneng cap kikiman pio men jenkamne’ tenen, “Kalekra melipneo!” pepra, moropkene naio.
5 Allah Kandi, “Angeda kunkamrume, angeda pio men kunkamrume,” pepra deiamsemum upu, pio moupra talerur ngebodi, ne tep, “Kanda mali kupmareme,” pepra wenepnetua peda, angeda telepe pua. Ada, erdi bicau tenenerura cadi, apenerur upuda telepe pua.
Ange utopu, kan Allahdi, “Angeda kunkamrume, angeda pio men kunkamrume,” peserum upu, pio tamna gum di, tupa-tupa talepra kure ngebodi, ne tep, “Ukunmaremada, tapkurume. Angeda men kunkamrume,” pepra, wenepnetua peda, ange peda pio telepe pua.
Tonda, sun mali kun kecapu talepra kunge nengdi, ne tep, “E angeboda, nun kap sisa kurura cadi, er tep erepra, gispal donkamepe,” pepra, ‘Sundi ange pepnenung’ tenen, ‘Ne song,’ tenenuna cadi, ne kware kunmane.
Deiyoda ake. Ada, sun anengdi pio mali-malipu kununga cadi, nedi kan Allah tep, “Anengda, wenepra popmemdi, sun mali kunge keca yumada, gum kupra deipkamrume,” pepra, tupa-tupa morokenun nge tepa.
6 Sun upu bongdina deiyo nengdi, amali kun kecapu talepra kunge neng tomopmengedi, ‘Aneng wenepra popkamap,’ tenepra ketenepmenge taruda, sun mali kunge nengdi kael kepkamenge.
Ada, nimi upu bongdina taruda, sundi, ‘Uo, tek sisi, Allah Yahwehdi peserur upuda, pio dumsisipu kurure. Erdi perur upu yumada, tek sisi telepe pua,’ tenen, moupra kael kepkameng ja!
7 Ukupmantoda, nimidi besi keca doprapmengedi, gel bongopra tu deiki tapmengepa, agel copra, sikke buktamamengtopu, Allahdi sun mali kunge nesala tep, wenepra popredi, sikke buktapre pangeda, sun nong cap, yo cap, yuma copredi, Sheol mutu damaipu deiptapkamre.
Ada, konum deami nesala kunge mutu, er sida Sheol mutu wengban bisi damaida, ‘Allahdi anesala sun yo coptapkamre’ tenen, pepne.
8 Dinino, ne nai Allah Yahweh, ne kaele. Kanda akeca-keca yuma talepmemdi, pio deiki tara erepra, ila puto Deiyo Ngebo kuruma cadi, ‘Kan dipapu ne tep lyepropnetum’ tenen, ne asuru di, kan kumem tarapu tupa dinune.
Ada, ‘Yuk ngebodi lyepnetu’ tenen, pio men tenenune. Ne melipra lyemdonerur deiyo ngeboda, ne nai bo Allah kan tenpua. Atep, kan tepapu teka tenekenune. Atep ne naio, ‘Kandi men tapkamnerum’ tenen, moropkene.
9 Tonda, ‘Angebo nun songe,’ tenenenung nesaladi, ‘Angebo tomopra popkup’ tenen, konum keteneipi keca akapmara tep, naio, ‘Kan dipapu kalekra melimkamnerum’ tenen, moropkene.
Ada, sun mali kun kecapu talepra, pio mali-mali kunge nengdi, ‘Angebo tomopra popkup’ tenen, kentenepra deipi keca pumbon, ‘Mangkau kange di benedi, akeca pumbon neitamai saka weknun’ tenen, kandi kalekra melimkamnerume naio.
10 Ne kangeda, sun mali kun kecapu talepra, mali-mali kunge nengdi, sundi nimi pona tep keca keteneipnei ngeda, ‘Sun dipapu akeca pumbon saktengedi, popdatenge’ tenenune. Telep ngeda, kandi ne tep, lyepropnemempa, teleppu kunedi tali lupra embankamne. Utenena tep moropkene naio.