Psa 142 | XteSC | STEP | Raja Dauddi, ‘Yu nengdi popnenung’ tenen, ila gil imir pumbon neitamai inipu taru di, pepu upu. Aupuda, sun ‘Israel nesala peterepkamne’ tenen, seku mazmur upu mut. Tonda, Allah morona upu deiki di seku. Dauddi pepu upuda ake.

Psalms 142

’Ne pona tep nengdi popnenung’ tenen, “Ne nai Allah melipneo,” pepra, morona tep pepu upu

1 Raja Dauddi, ‘Yu nengdi popnenung’ tenen, ila gil imir pumbon neitamai inipu taru di, pepu upu. Aupuda, sun ‘Israel nesala peterepkamne’ tenen, seku mazmur upu mut.
Tonda, Allah morona upu deiki di seku. Dauddi pepu upuda ake.
2 Ne ila upu deiki di, “Ne nai bo Allah Yahweh tep, “Melipneo,” pepra moronune.
Moronedi nedi pepnun upu deiki di, “Uo, Yahweh kandi melipra lyepneo!” pepra moronune.
3 Ne ikin kunerepa, nedi Allah damai di, “Uo, uo,” pepra, engepnedi, weika di mali penune.
Teka, ne kange mun kange doupra kunun keca yumada, Allah er damai di lap pepnedi, moronune.
4 Ne nai Allah, ne kange dipru pio gum kupnerepa, puto pio bounpu kunerur taruda, ne kaele. Kan dipapu, ne ikin kunerepa kunun tarunge cap, amenda kupkamner keca yuma cap yumada, kan konum kael keamume.
Dinino, ne tep, ‘Angebo, nun song cadi, er tomopra popkupe,’ tenekenung nesaladi, ne embanun bisi neitamaida, nimi popmanto keca konum keteneipnei.
5 ‘Ware ngebodi yana melipkamner do?’ tenen, ne dumsisipu kunedi, kan tep pio dinapu kunune.
Ange yumada, putapnerepa, pio dinapu kunun dinin, ne melipmanto ngebo ton, ne damai pio men kurure.
‘Yu nengdi popnenung’ tenen, ne inipmantoi peda, pio men kurure. Tonda, ne tara neng pe, yuk mutu dakunge neng peda, ne tep, bicau tenepnengedi, men melimkamnenge.
6 Atep, ne nai bo Yahweh, kan tep, “Uo, kan dipapu melipra lyepneo!” pepra morokenune.
Nedi kan Allah tep, ‘Yu nengdi popnenung’ tenen, ne tep inipmantoida, kan damai pua. “Ne ipkamnereme,” pepra, morokenedi pepkenune, ne naio!
Ne gam tupa kunun taru neitamai yumada, yuk nengdi gum dinin, Allah kan dipapu pio bicau tenepnememdi, melimnerume. Kan Allah tenpu, ne tep melimnerume.
7 Uo, ne nai Allah, ne pio ikin kunerepa, pio amutara utopu konum kununa cadi, nedi kan tep moropken upuda, ‘Moupra gekepnetume’ tenen, moropkene naio!
Ne tep yanipnengedi, ikin keca weik karenenung nengdi, ‘Kange mun keca ton tapakra karepnenung’ tenen, ne nai Allah, kan dipapu ne loptapra melipneo!
Ayu nengda, puto weik neng kunung dinin, neda puto boun ngebopu kunune.
8 Uo ne nai Allah, ne wenemna ati pumbon neitamai dongopnei taru di, ‘Kan dipapu ne tep melipra loptapnememdi, telepaipu deipkamnerum’ tenen, moropkene.
Ukupnememnyopda, nedi kan tep, ‘Kanda pio telep kurume,” pepra, kan sipu eremkamkene.
Allahdi, “Angeda kunkamrume, angeda pio men kunkamrume,” pepra, deiamseu upu talepra, dumsisipu kunge nesalada, ne damai dana-dana tara yuma kikiman kunkamenge.
Ange deiyoda, ake. Ada, kandi pio telep kupra deipnememdi, telep keca weika di karenkamnerema tepa.