Psa 143 | XteSC | STEP | Raja Dauddi, aMazmur upu deiki, amut seku. Amut sekra Dauddi pepu upuda ake. Uo, ne nai Allah Yahweh, ‘Nedi kan tep moropkene upuda, moupra gekepkunerume’ tenen, moropkene! Kandi men tamnememdi, pio melimnememnya deiki, ‘Nedi kan tep morokene upu yuma tep nengeda, kan dipapu gekepnememdi, melimkamnerum’ tenen, moropkene naio! Tonda, kanda pio telep, dumsisipu kuruma deiki di, ne moropkene keca gekepmemdi, kange di tamupra pepkamnerume naio!

Psalms 143

‘Ne pona tep nengdi, popnenung’ tenen, Allah tep, “Ne melipra lyepneo,” pepra moropsi, pepu upu

1 Raja Dauddi, aMazmur upu deiki, amut seku. Amut sekra Dauddi pepu upuda ake.
Uo, ne nai Allah Yahweh, ‘Nedi kan tep moropkene upuda, moupra gekepkunerume’ tenen, moropkene!
Kandi men tamnememdi, pio melimnememnya deiki, ‘Nedi kan tep morokene upu yuma tep nengeda, kan dipapu gekepnememdi, melimkamnerum’ tenen, moropkene naio!
Tonda, kanda pio telep, dumsisipu kuruma deiki di, ne moropkene keca gekepmemdi, kange di tamupra pepkamnerume naio!
2 Naio, tuai mutu neitamai gam tupa kunup nesala yumada, pio telep, dumsisipu men kunupa cadi, ware ngebodi, ‘Neda telep ngebo kunune,’ teneptudi, kan damai tali lupra yana tektu do? Gume, angeda men kupmanto.
Neda, kan amutara kunedi, kan pelpu donuna cadi, ‘Kandi ne mali kunun keca tep, kaukepnetumopda, amenda taruda, upu bokeipnememdi, men wenepkamnerum’ tenen, moropkene naio.
3 Naio, gekepneo! Ne tep, ‘Angeboda, nun songe,’ tenenenung nengda, ikin keca weik, ne deiki derinenunge naio. Ukunenunga deiki di, neda kange mun kange doupra, ikin weik kunune.
Ila kange mun kange doupra kununa cadi, ukupmantoda, tu deiki sakapmengedi, pio kunungnai kurameng utopu kunune.
Ada, menop taru konum deamipa, konum tu paliami neng utopu kununa tep pepne.
4 Ange tep nengeda, ne kange dipru neitamai yumada, pio puto bounpu kunedi, Men kupmanto kununa tepa.
Tonda, ne kange tenenange neitamai yumada, kware weik kunerepa, ikin kangeda, pio weika di doupra kunune.
5 Dinino, ikin kunere taruda, menop taru kuramum ngeda, kange di ton cap tenenapu kunune.
Ada, kandi konum mambul pel pio weika di doramum ngeda, tupa tenenune.
Tonda, kan buru puto deiki di pel doramumnge yuma tep, moupra tenenapu kunune.
6 Ne nai Allah, ‘Kan dipapu melimkamnerem’ tenen, ne buru erepnedi, kan tep morokenune.
Tonda, ne kange dipru neitamai yumada, kan tepapu pio putanerure. Ukupmantoda, mo cap, me cap, pio men kurur mutu neitamai kunge nesala, me ila di putaramrepa, ikin weik kuramengtopu, nedi kan tep ila di putanerure.
7 Ne nai Yahweh, ne kange dipru pio puto bounpu kunerepa, men kupmanto kununa cadi, nedi morokenun keca tep, kandi menmena gekepnememdi, melipkamnerume naio!
Naio, ikin kunere taru, nedi kan tep moropkene pangeda, ‘Kandi men kaukemtamnapu kunkamnerume’ tenen, moropkene naio.
Kanda men gekepnememdi, kaukepra tapnememnyopda, sun konum deami nesala kungetopu kupkamne ja naio!
8 Ange tep nengeda, ne putapner ngeda ake. Ada, kandi nun tep, “Ila di bicau tenepsenedi, pio telep kupra kudinkamsene,” pepra, pedina upu deiki konum peiamsemum ngeda, tek sisi ange yuma tupa kunkamserume.
Atep nengeda, nedi ipna taru yumada, angepu tupa-tupa tenenkamne. Ada tali tep gume. Deiyoda, ake. Ada, nedi kan tep, ‘Allah dipapu pio melimkamnere’ tenen, pio teka tenekenune.
Ne kange dipru neitamai yumada, kan deikipu derikenune. Ne nai Allah, ‘Kan dipapu melimkamnerem’ tenen, ne kange dipru yumada, kan deikipu derikenune.
Atep nengeda, kandi ne tep, “Telep bisi acapu benkamrume. Telep kuna ngeda, ake,” pepra, peterepnemempa, tek sisi telep ban bisi kael keptene dingeda, abisipu benkamne naio!
9 Ne nai Yahweh, ‘Ne pona tep yu nengdi, popnenung’ tenen, ‘Kan dipapu sun damai di lyepkamnerem’ tenen, morokenune naio!
Kan dipapu ne tep, ‘Kalekra lelipnememdi, telep kupra melimkamnerum’ tenen, kan damai adipapu konum sepra yanamsi.
10 Tonda, Allah kandi, ‘Angebodi kupkamre kecada, ake-ake,’ konum teneramnemum ngeda, ‘Kandi peterepnetumpa, kael keptenedi, angepu talepra kunkamtene’ tenen, moropkene naio.
Ange putapner ngeda, tali tep gume. Deiyoda, kanpuda ne nai bo Allah kurume. Kan tepapu si eremkenepa, kandi ne talenereme.
Atep, kan pio telep kurum Lek Sambaladi, er dipapu, “Ukupkurume-ukupkurume,” pepra, peterepnetudi, menepra embarepa, neda er amnyo tara yana, abisipu embankamne naio.
Erdi peterepnere pangeda, ikin kecada, ne damai men yankamre. Telep bisipu embankamne ja.
11 Ne nai Allah, kandi melipra kalengnememnyopda, tupa gam kunkamne. Ukunkamne taruda, yuk neng yumadi, ‘Kan si Yahweh tep, kael kepmengedi, kan sipu pio eremkamkeng’ tenen, moropkene naio!
Kanda, pio dumsisipu kumem ngebo cadi, kandi, “Pio kalekra melimkamsene,” pepra, pedina upu deiki di peiamsemumtopu, ne ikin kunerur keca neitamai di, lyepropkamnerume naio!
12 Tonda, kandi nun tep, “Ila di bicau tenesenedi, pio telep kudinkamsene,” pepra, pedina upu deiki peiamsemumtopu, adeiki di, nun pona tep nengda, popra gawal dankamrume.
Ada, ne tep, ‘Angeboda nun songe,’ tenenenung nesala yumada, ‘Kandi anesala popra sikke buktapkamrum’ tenen, moropkene naio! Ada, tali tep gum dinin, deiyoda ake. Neda, kan amutara kunedi, kan pelpu donuna cadi, kandi lyepropkamnerume naio!