Psa 144 | XteSC | STEP | Amazmur upu mutda, Raja Dauddi seku. Nimi deiyo ngebo Dauddi pepu upuda ake. Allah Yahwehda, ne puto karenerur ngebo kurura cadi, nimidi ila mutu bungne gel damai inimamengtopu, nedi Allah er damai benyopda, Allahdi pio melipra kalengnerure. Tonda, nimi mar porbana tep kael kemna keca tep nengeda, Allahdi ne tep peteremnerure. Teka, Allahdi ne buru puto kemdinerepa, ne pona tep nengda, ila kael deiki di porbanune.

Psalms 144

Allah melipka deiki di, Raja Dauddi, er pona tep neng popra gawal dakudi, Allah tep, “Telepe,” pepu upu

1 Amazmur upu mutda, Raja Dauddi seku. Nimi deiyo ngebo Dauddi pepu upuda ake.
Allah Yahwehda, ne puto karenerur ngebo kurura cadi, nimidi ila mutu bungne gel damai inimamengtopu, nedi Allah er damai benyopda, Allahdi pio melipra kalengnerure.
Tonda, nimi mar porbana tep kael kemna keca tep nengeda, Allahdi ne tep peteremnerure.
Teka, Allahdi ne buru puto kemdinerepa, ne pona tep nengda, ila kael deiki di porbanune.
2 Ila mutu bungne gel damai iniptepe do, tonda, ila lyom gel ati pumbon wektepepa, sun yu nengdi men popsetengetopu, nedi Allah er damai benyopda, Allahdi ne tep, pio melipra kalengnerure.
Tonda, ne pio puto kemdinerura cadi, ne pona tep nengdi poryakanenung taruda, Allahdi ne lyemdona deiyo ngebo kunerure. Lyom gel ati, er sida benteng pumbon neitamai weknepa, yu nengdi men popnetengai utopu, kunerure.
Jen talena nengda, ‘Sun yuk nengdi mar dokotepsengepa, popsenung’ tenen, sun nong lelimna keca, er sida perisai talerameng utopu, Allahdi ne tep melipra kalengnerure. ‘Yu nengdi ne damai yana popnenung’ tenen, Allah er damaipu bena kunune.
Tonda, Allah er puto deiki di, sun yuk mutu nesala yala-yala yumada, ne amutarapu deipneryopda, nedi sun anesala yuma tep, puto kunedi, talenune.
3 Uo, ne nai Allah Yahweh, tuai mutu kunup nesalada, tek sisi mambul gum neng kunupe. Dinino, kanda ware keca deiyo tep, ‘Anesala melimkamne’ tenen, nun tep, disememdi, melimserum do?
Ange utopu, nun tuai nesaladi deipmepe nyapu yumada, ware keca deiyo tep, ‘Aneng moupra kalengkamne’ tenen, tupa tenesememdi, melimserum do?
4 Ange ukupmantoda ake. Ada, kumanya puto, ue tenpu taru di pung peprepa yaredi, adipapu gum kudoramretopu, nun tuai mutu kunup nesala yumada, menmena dipapu denupe.
Tonda, keteng ukupu ipna taru doprepa, yaredi kukia, ue tenpu taru dipapu katuai kuapyanen, adipapu gum kuramretopu, nun tuai mutu kunup nesala yumada, menmena di denupe. Tupa gam men kunupe.
5 Uo, nun nai bo Yahweh, ‘Kanda im deiki buplan pakeipmemdi, menmena di tuai mutu kwerepmemdi, nun damai yana melisetume’ tenen, moropkepe.
Tonda, kandi ‘Ila lyom mutu dup talepmem pangeda, ila uku jeredi, ket ila di welepkamre. ‘Ukupkamrema’ tenena tep moropkene naio.
6 Tonda, kan puto deiki di, pereng lang penange dokotepmemnyopda, ‘Nun pona tep nengdi ange epmengedi, kware pio weik kuprepa, bendopkameng’ tenen, moropkepe.
Nimi pona tep taruda, mar weik dokotemamengtopu, ‘Kandi pereng lang penange, sun yu neng damai dokotepmempa, sun yuma kware weik kuprepa, sepdara bendopkameng’ tenen, moropkepe naio!
7 Ange utopu, ne nai Allaho, ‘Kanda, im deiki tara kurumai di, kan ila puto weik buru di, neda adipapu, loptapnememdi, lyepropkamnerum’ tenen, moropkene. Deiyoda, ‘Ne pona tep nengdi popnenung’ tenen, moropkene naio!
Teka, ne mutu sisa nengdi gum dinin, yuk karen mutu di, nimi bo neng, yu nengdi poryankamane neng, ‘Sun buru di poptapnenung’ tenen, nai kandi, “Lopra lyepropneo!” pepra, moropkene naio!
8 Sun animi bo neng, sun sipyal deiki di tali-tali upupu penenunge.
Sunda, nimi yuma gekenungai di, sun dumsisi tara buru erepmengedi, ‘Nunda tek sisi upupu penupe,’ pepra, pedina upu deiki di penung dinin, tek sisi ngeda, tali mok upupu pesenunge.
9 Sun mok upu penge nimi bo nengdi ukunung dinin, neda, ukupu kange lon mut penya deiki di, ne nai Allah kan tep, mut penedi, “Telepe,” penkamkene.
Amut penkamne taruda, mut lelim pena tep keca, er sida kecapi, tapu sepuluh kwamrenge deiki di, kan Allah tep, kange lon mut penkamkene.
10 Allah kan dipapu, mutu-mutu yuma talepra kunge nimi deiyo neng, Raja-Raja neng yuma tep, melimemnya deiki di, sun pona tep nengda, bisbisa kapmengedi, popra gawal dangnunge.
Ange utopu, kan dipapu, kan amutara pel donun ngebo, ne Daud tep, melipra lyemdonerume.
11 Ukuneruma tep nengeda, yu weik nengdi ne tep, ‘Parang ya dopmepepa, nimi deiyo ngebo Raja Daud tep, poptapkup,’ tenepnenge neng, sun damai di, ‘Kan dipapu loptapnememdi, lyepropkamnerum’ tenen, moropkene naio!
Sun ayu nimi bo nengda, sun sipyal deiki di tali upupu penunge.
Sunda, nimi yuma gekenungai di, sun dumsisi tara buru erepmengedi, ‘Nunda tek sisi upupu penupe,’ pepra, pedina upu deiki di penung dinin, tek sisi upu, pio men penunge. Tali mok upupu pesenunge.
12 Ne nai Allah, kan tep moropkene. Ada, ‘Nun Israel nesaladi deipmepepa, dadeipdanen bankameng neng yumada, menmena di nepbangedi ila puto weik du neng kupbankameng’ tenen, moropkepe.
Tonda, ‘Nun Israel yala nengdi derinkamep ner nyapu yumada, urasin pio telep kupbankameng’ tenen, moropkepe. Ukupmanto ngeda, sun nimi deiyo nengdi, sun pio telep kunge ati, er sida istana ati damai, ikra derirameng lyom co, urasin pio telep kuramretopu, ‘Nun ner nyapu yuma peda, urasin pio telep kupbankameng’ tenen, moropkepe naio!
13 Tonda, kan Allahdi melipsemempa, nun Israel yala nesala yumadi, wa pepmepedi, koun keca yala-yala yuma, kounkamepnge yumada, pio nong weika di kunkamre’ tenen, morokenupe.
‘Ukupsememnyopda, nun kin keca pio weika di kipmepedi, akeca yala-yala yuma dopra, mawa derina tep, ila ati pumbon neitamaipu dongopmepepa, akati yuma dinikamre’ tenen, moropkepe.
Ange utopu, ‘Nundi peinup gam keca, er sida domba ner bisam yumadi, nyapu denge pio weik, beribu-ribu, nyapu men nukmanto derinkameng’ tenen, morokenupe.
14 Tonda, ‘Kandi melipsemempa, nundi peinup ner sapi bisam yuma peda, mundu douamenganen, nyapuda denge pio weik, men nukmanto, derinkamseng’ tenen, moropkene naio!
Tonda, apeinup sapi bisamda, melipra kalengkamrema cadi, ‘Aner sapi bisam yumadi, lyun nyapu tenpunge peda, pio ton men derinkameng’ tenen, moropkepe.
Tonda, ‘Nun pona tep nengdi, men yana popkamseng’ tenen, moropkepe. Tonda, nun ila ati arum dopmepunge neitamai yumada, ‘Ikin weik kupserepa, nun Israel yala nesala yumadi engepra, men ngolongkamep’ tenen, moropkepe naio.
Naio, ‘Ange utopu, yu nengdi nun tep ton ukupsenung’ tenen, ‘Kandi melipra kalengkamserem,’ tenena tep moropkepe naio!
15 Teka nun nai, akeca-keca moropmapenge yumada, kan Allahdi, karepsememnyopda, akeca yala-yala yuma doronkame nesalada, pio telep kudinkamserume. Kandi melipsemempa, doronkamep nesalada, tek sisi pio kange deipra kunkamepe.
Teka, ware yala nesala do yuma, sundi kan Allah Yahweh tepapu, si eremnung nesalada, tek sisi pio pingping kange douprapmengedi kunkamenge. Kan Yahwehdi talerum nesala yumada, tek sisi kange deipra, pio teleppu kunkamenge.