Psalms 145

Dauddi Allah er gispal dona tep, mut deiki di pepu upu

1Ne nai Allah, kanda ne ila nimi deiyo ngebo Raja kunerume. Atep, ‘Nedi kan si eremna tep mut penedi, pio tupa-tupa gispal donkamkene. Pio men tapkamne,’ tenenune.
2Tumi-tumi yuma, nedi Allah kan tepapu, “Kanda pio teleppu kurume,” penkamkene. Ukupnedi pio tep, “Kanda pio mambul ngebo kurume,” pepra, ‘Kan si tepapu eremkenedi gispal donkamkene,’ tenenune.
3Ada tali tep gume, ne nai Allah Yahweh, kanda ila mambul ngebo kumemnya tep, kan tepapu “Telepe,” pepra gispal donkamkene. Allah kan ila puto di tenepra pel dorumnge cap, ila mambul kuremnge capda, ayuma moupra men kael kepra gawal daktepe. Kan kumem keca yuma tep, nimi yumadi kange deipra kan sipu eremkamkenge.
4Ange tep nengeda, Allah kandi ketekepra deipmum keca yuma cap, ila mambul pel domumnge cap, nimidi epra lolomengedi, kan tepapu gispal dopbankamkenge. Atep, nimidi sun nyapu deipmengepa, dadeipdanen bankameng nesala yuma tep, wisi nengdi sun nyapu yuma kael kemna tep, kan sipu pio eremkamkenge.
Eremengedi, “Allahda ila puto deiki di nimi men kupmanto mambul pel dorure” pepra nukbangepa, amenda taru dakunkameng nesala yuma peda, gekenkamenge. Angeda, pio lap pepra pepdanen bankamenge.
5Ne kangeda, wisi nengdi, sun derinkameng nyapu tep, Allah kan ila mambul kuruma deiki di telep kupra pel doramumnge cap, pio telep kuramumnge cap tep, gispal dopra kan si eremengedi, lap penkamenge. Nedi, ‘Allah kanda mambul pel cap, nimidi men kupmanto keca cap, pel dorur ngebo kurure’ tenen, pio moupra tenenapu kunkamne.
6Allah kandi ila mambul pel, nimidi men kupmanto pel, ila puto deiki di dopra kurumnge yumada, nimi kael kepmengedi nukra lap pepembankamenge. Sundi yuk nesala tep pepmengepa gekepmengedi, aupu doupra yuk neng kori pepdanen bangedi, kan sipu pio weika di erepbankamkenge.
7Allah kandi akeca-keca yuma pio telep kupra pel dorumnge cap, nimi tep pio telep kupra melimserumnge cap, mali kuna pio gum dipapu, dumsisi kupra kurumnge cap tep, nukra lap pepembankamenge.
Ukunge pangeda, nimi yumadi, “Allahda ila mambul pel doredi, dumsisipu kurur ngeboda, erpu kurure,” pepra, kan gispal dona tep, kange deipra mut penkamenge.
8Allah Yahweh, kanda tuai nesala yuma tep, ila di dipru karekerepa bicau tenena ngebo kurume. Atep, nun mali kunup keca tep nengeda, adipapu wenepra poptapsetum dinino, kan adipapu menmena di tulum tenepra men portamserume.
‘Mali kunge nesaladi, sun mali kun keca tapmengedi, ne damaipu tamupra yatenge,’ teneserume. Kandi nun tuai nesala yuma tep bicau tenesememdi, pio tupa-tupa melimsemem ngeda, pio men tamserume. Kandi teneramsemumtopu, tumi-tumi yuma pio melimserume.
9Allah Yahweh, kandi nimi yuma tep dipru karekerure. Tonda, Allahdi ketekeiamu keca yuma tep, ‘Ne mawa kecapu kurure’ tenen, kan dipru boun kupra bicau tenesememdi, pio moupra kalengserume.
10Teka ne nai Allah Yahweh, kandi ketekeiamum keca yumadi, kan sipu eremkamkenge. Tonda, kan tep teka tenepidi, tamna pio gum di, kan upupu talepra dombanung nesala yumadi, kan tepapu telepe pepra, kan sipu eremkamkenge.
11Sun anesala yumadi yuk nesala tep, “Nun nai Allah er puto deiki di akeca-keca yuma talepra, ila ngebo kuryada, pio teleppu kurure,” penkamenge.
Tonda, “Kan tepapu nun ila nimi deiyo ngebo Raja kusurure,” pepra, telep upu pengedi, kan sipu eremkamkenge. Ukungedi, “Allah kanda ila puto deiki di, nimi men kupmanto mambul pel dorum ngebo,” pepra tumi-tumi yuma nungmengedi, kan si tepapu eremkamkenge.
12Kandi men kupmanto pel pumun taru di domumnge tepapu nungmengepa, mutu ban-ban yuma kunge nesala yumadi, ‘Uo, Allah erda ila puto ngebo kurure’ tenen, kael kemkamenge.
Ada, nimi men kupmanto keca kurumnge yuma sun epmengedi, kael kemkamenge. “Nun nai Allah er puto deiki di akeca-keca yuma talepra, ila mambul ngebo kurure. Erda Ila Eremna Ngebo kurura cadi, pio teleppu kurure,” pepra lap penkamenge.
13Allah kandi akeca-keca yuma talepra, ila deiyo ngebo kurum ngeda, ataru di dipra, doryankamre taru yumada, pio tep akunkamre. Ange yuma men gum kupkamre. Pio tep akapkamre.
Allah kandi akeca-keca yuma talepra kunkamrum ngeda, keteng tamun pio weika di kunkamre. Nimidi nyapu deipmengedi, dadeipdanen bankameng nesala peda, kan dipapu anesala cap, akunkamre keca yuma cap, talememdi, ila deiyo ngebo kunkamrume. Allah Yahweh kandi tenemem ngeda, tumi-tumi yuma pel telep kupra dopbankamrume.
Allah Yahweh kandi, “Ukupkamsene,” pepra, pedina upu deiki di peiamsemum upuda, pio kunupsek penkamre. Tenpunge peda men tamrume.
Ada Allah kandi ‘Ukunkamne,’ tenemumnge yumada, tek sisi kan teneamsemumtopu kunkamrume. Tuai nesala yuma cap, yuk gam kure keca yuma cap, Allah kandi ketekepra deiamum keca yala-yala yuma tep, Allah kandi pel dosememnge yumada, bicau tenesememdi, pio telep kupra melimserume.
14Ila ikin keca nimi sun nonge deiki yarepa, kange mun kange doupra kunung nesala yuma tep nengeda, Allah Yahweh kandi epsememdi adipapu melimserume.
Tonda, Allah kan dipapu nimi dipru pu jerepa kange mun kange doupra kunge nesalada, kan buru di talepra tengderiserume.
15Ange tep nengeda, nesala yuma cap, gam kure keca yuma capdi, Allah kan tep, ‘Jen keca karenkamaser ja. Tonda, nun putaserur keca tep, tek sisi pio melimkamser’ tenen, ketenepra dinmangepane, jen keca putan taru konum damai kupre pangeda, sun jen keca yala-yala yuma, kandi karerume. Tonda, sun ikin kange doupmenge nesala tep, telep kupra melimrume.
16Allah kan dipapu nimi cap, yuk gam kure keca yala-yala yuma cap, sun putan keca yumada, ketenepra kareserume. Kan buru deiki dipapu tuai nesala yuma cap, yuk gam kure keca yala-yala yuma cap, nun putan keca yumada, kan dipapu kareserume.
17Allah Yahweh, kandi tenepra kumem keca yumada, pio dumsisipu kurume. Mali kun keca tenpunge peda, pio men kurume. Nimi yuma sun kungetopu, moupra tenememdi, dumsisi upupu pepra bongdiserume.
Tonda, tuai nesala yuma cap, gam kure keca yuma cap, Allah kandi ketekepra deiamum keca yuma tep, Allah kandi pel doserume. Ukusememnge yumada, kandi pio bicau tenesememnya deiki di, telep kupra pel domemdi melimserume.
18Allah Yahweh tep, “Uo naio, nun tep melimkamserume,” pepra moronung nesala, sun damaida, Allah er tupa kurure.
Ada, sun dipru neitamai di, kange bongtona cap, mali tenena cap, upu tali pena gum dipapu, tek sisi telep kunga deiki di, Allah tep moronkameng nesalada, Allah sun damai kuredi, sun moronge upu gekepra pio melimkamre.
19Allah kan tep kware tenepra, bouna di dipru dakra kunung nesaladi, “Uo, nun nai melipseo,” pepra morokenung nesalada, sun tep melimrumdi, telep kupra derirume.
Anesaladi, “Uo, ware ngebodi melipsetu do? Gume, Allah er dipapu melipsetue,” pepra morokenge nesalada, kan gekememdi anesala yuma tep, melipra lyemdorume.
20Allah tep teka tenepmengedi, er tep kange deipra kunge nesala yuma tep nengeda, Allah Yahweh kandi melimempa, kan amutarapu dipru bouna dipu kunkamenge.
Dinino, mali kun kecapu talepra kunge nesala yumada, wenepra poptapmemdi, gawal dakamrume.
21Atep, neda tumi-tumi yuma Allah Yahweh, kan tepapu si eremkamkene. Ange utopu, Allah kandi ketekepra deiamumpa, gam kunge keca yala-yala yumadi, Allah Yahweh kan si tepapu tumi-tumi yuma, kan sipu pio eremkamkenge. Kan si eremkameng ngeda, pio men tamkamenge.
Raja Daud er mut pena deiki di peramu.