Psa 146 | XteSC | STEP | Nun yumadi, nun nai bo Allah Yahweh tep, “Pio telepe,” pepra, er si eremkamepe. Ne kange dipru neitamai deiki di, nun nai Allah Yahweh tep, “Pio telepe,” pepra, er sipu eremnune.

Psalms 146

Allah er dipapu melipra lyemdoserura tep, ‘Telepe’ pepedi, er sipu eremkamepe

1 Nun yumadi, nun nai bo Allah Yahweh tep, “Pio telepe,” pepra, er si eremkamepe. Ne kange dipru neitamai deiki di, nun nai Allah Yahweh tep, “Pio telepe,” pepra, er sipu eremnune.
2 Tonda, ne gam kunkamne taru yuma neitamai di, nun nai Allah Yahweh tep, “Pio telepe,” pepra, er sipu pio eremkamne.
Tonda, ne nai bo Allah er gispal dona tep, mut pena cap, bung-bung pena lelim pena cap deiki di, Allah er si eremna tep, ne gam kunkamne taru yumada, tupa mut penkamne ja!
3 Ne kayapu neng, sun yumada gekepneso! Sundi yuk tuai neng tep, ‘Angebo lyepnetue’ tenen, pio men tenenkamrume.
Ada, tali tuai mutu nesaladi, nun yuma tep, tek sisi men lyepsetenge. Atep, ware ngebo do yuma, tali tuai mutu nesala tep, ‘Uo, aneng dipapu lyepsetenge’ tenen, sun kange dipru, aneng deiki men derinkamrume.
4 Uda, ware tuai nesala do yuma, depmengopda, gam kuna deiyo keca ada, sun sambala konum beryopda, konum denunge. Depmenge pangeda, sun nong dopra, tu palipmengedi peipmengepa, amenda taru tupu danunge.
Tuai mutu nesala depmenge taruda, sun adepmenge nengdi, ‘Angeda ukupkamne-ukupkamne,’ teneramenge keca yumada, gum kuprepa, nong men kupkamre.
5 Dinino, ware nesala do yuma, sundi, nun apu bo Yakub ton kalekra melimamu Allah tep, ‘Neda, er dipapu ne tep, melipra lyepkamnere’ tenenge nengda, Allahdi anesala tep telep kudinkamre.
Ange utopu, ware nesala do yuma, sundi, Allah Yahweh tep, ‘Erpu ne si eremnun Allah kurura cadi, er dipapu kalekra lyepropkamnere,’ tenenge nesalada, Yahwehdi anesala tep telep kudinkamre.
6 Allah Yahwehdi, tuai mutu yuma cap, im cap, im deiki cap yumada, ketekepra deipu. Tonda, ila laut mokon cap, laut mokon neitamai kure keca yala-yala yuma capda, er dipapu ketekepra deipu.
Tonda, Yahwehdi er tep ‘Teka’ tenenge nesala yuma tep, tamna pio gum dipapu, pio kalekra melimrure.
7 Mali nengdi yuk nesala tep, yanipmengedi, ikin keca sun nong deiki derinung nesala tep nengeda, Allah Yahwehdi akange mun kange doupra kunge nesala tep, melipra telep kudinkamre ja!
Tonda, Allah er dipapu, sun jen putare nesala tep, jen keca dopra karerure.
Tonda, ikin kange doupra kunge neng do, ange utopu ton, deiyo men kwapmarepapu, wenemna ati pumbon dongopmengepa kunge nesala do yumada, Yahwehdi, anesala loptapra lyemdorure.
8 Tonda, Yahwehdi, sun asuru puamre nesala tep, kwetepredi, kange di tamupra telep kudirepa, telep kupra dinunge.
Tonda, ware nesala do yuma, ikin weik kurepa, kange mun kange doupra kununga tep, ‘Uo’ tenen, nong genepdongopra kunge nesalada, Yahwehdi anesala dirura cadi, erdi sun tep kange di telep kupra derirure.
Tonda, Allah Yahwehdi, sun dumsisi kun kecapu talepra, telep kunge nesala tep, kange derirure.
9 Tonda, Allah Yahwehdi, sun pe tara men kunung dinin, yuk mutu neitamai nimi bo neng kupra kunge nesala tep, moupra diredi melimrure.
Angepu gum dinin, Allahdi, lyan nyapu cap, solu nerapu cap yuma tep, tupa-tupa melimredi, sun putan keca yumada tali lupra karerure.
Dinino, sun pio mali-mali weik kunge nesaladi, ‘Ukupkamepe,’ tenenge kecada, Allahdi upu sengrepa, nong men kurure.
10 Nun nai Allahda, akeca-keca yuma deiki tara erepra kuredi, akeca yuma talerure. Ada pio tep ukunkamre ja.
Atep, sun Sion mutu neitamai kurum nesala yumada, ataru di dipra, doryankamre taru neitamai yuma peda, sun nai bo Allahdi akeca-keca yuma talepra ila deiyo ngebo pio kunkamsere.
Nun yumadi, nun nai bo Allah Yahweh tep, “Pio telepe,” pepra, er sipu pio eremkamepe.