Psalms 147

“Allahda, akeca-keca yuma talepra, deiki tara erepra, pio puto weik kurure,” pepu upu

1Nun nai Allah Yahweh tep, ‘Yahweh, kanda pio teleppu kurume,’ pepkepe. Nun si eremnup Allah tep, “Kanda pio telepe,” pepra, er gispal dona tep, mut penupada, telepe pua! Allah tep, “Kanda pio telepe,” pepmepe dingeda, nun kange deipra, teleppu kunupe. Ukunupada, pio telep kunangepu kurura tepa.
2Yerusalem mutu ila ati arum dorami ngeda, yuk mutu nengdi uruptapi dinin, ukutaruda, Allah Yahwehdi, amutu yuma lepsikra dopredi, kange di telep kupra donmare. Karen mutu yu nengdi, Israel nesala popidi tapipa, tupa gam kurami nengda, ateng koupdongopra, sun pe mutupu tamupra dubenami dinin, Allahdi aIsrael nesala melimredi, tamupra Israel tara mutupu duyakanmare.
3Pio ikin weik kuramipa, sun kange dipru yuma buluksakupa, kange mun kange doupra kurami neng yumada, Allahdi anesala tep ukutaru konum kwetepra telep kudinmare.
Anesala sun susu dila yumada, kwetepredi, kange di tamupra teleppu kudirure.
4Allah Yahwehda, ila puto ngebo kurura cadi, im deiki kure kuru yumada, er dipapu nukredi akuru yuma ikra derirure. Tonda, Allahdi akuru yuma konum deipre dingeda, sun yuk-yuk dinin, sun si yumada, si pepra karerure.
5Teka, nun nai Allahda, akeca-keca yuma deiki tara kuredi, akeca yala-yala yuma talerura cadi, er ila puto kuryada, men nukra peptepe.
Ange utopu, erdi tenerur keca cap, akeca-keca yuma nong neitamainge tep, ila kael keamunge capda, nunda men tenipmanto kuserure.
6Yu kunge nengdi, yuk nesala tep yanitamnung neng yumada, Allah Yahwehdi kange di tamupra anesala erepredi, telep kudirure.
Dinino, sun pio mali kun kecapu talepra, mali-mali kunge neng tep nengeda, Allahdi aneng wenepredi, pio amutarapu kemdirure.
7Atep nengda, nun nai bo Allah Yahweh tep, “Kanda pio teleppu kurume,” pepra, mut pepmepedi, er si eremkamepe. Tonda, mut pena tep lelim pena keca, er sida kecapi dopra, kange lon mut pepmepedi, nun nai Allah tep, ‘Telepe,’ pepra, er si tep eremkamepe.
8Allah er dipapu, im deiki tara kure keca yumada, ‘Tuai nesala men epkameng’ tenen, dua ketekepra deiprepa, akeca di leliprepa, men dinupe.
Dinino, adua kan-kan neitamai di, ‘Tuai mutu deiki yuma, mo cemkamre’ tenen, mo ton ketekepra derirure. Allahdi kareprepa, mo cemre pangeda, Allah er puto deiki di ketekepra deipu. Mutu buma bungrurai deiki yumada, manmaneng cap, mutmuta cap parure.
9Tonda, wareto keca do yumada, bura tara kuramre gam keca yuma, sun jen putaprepa, Allah er dipapu sun jen keca karerure. Angetopu, ma yala-yala yumada, sun nyapu deipmengepa, jen putapyopda, Allah dipapu, sun jen keca karerure.
10Kuda bisamda, ila puto weik akaptua peda, Allahdi akuda er puto tenepredi, kange men derirure.
Tonda, nimi tuai neng peda, sun yan puto weik kuptupa, menmena di sepra betenga peda, akeca tep, Allahdi ange tenepredi, kange men derirure.
11Ange yuma tep, kange men derirur dinin, Allah Yahweh, erdi kange derirur ngeda ake. Ada ware nesala do yumada, Allahdi, “Ange kunkamrume, angeda pio men kunkamrume,” pepra, deiamseu upu moupra gekepmengedi, er tepapu kware kuprepa, dumsisipu kunge nesala tep, Allahdi kange derirure.
Anesalada, Allahdi, “Ila bicau tenesenedi, pio telep kudinkamsene,” pepra, pedina upu deiki di peiamseu upu yuma moupra tenengedi, ‘Allah er dipapu lyemdonkamsere,’ tenenung nesala tep, Allahdi kange derirure. Yuk nesala cap, yuk keca cap tep gume.
12Atep, sun Yerusalem mutu ila ati arum neitamai kurumu nesala yumadi, Allah tep, “Uo, nun nai Yahweh, kanda pio telepe,” pepra, er sipu eremkamrume!
Teka, sun Sion mutu neitamai kurum nesala yumada, Allah tep, “Kanda pio teleppu kurume,” pepra, er sipu eremkamrume.
13Allah tep, ‘Kanda telepe,’ penkamruma deiyoda ake. Ada, ‘Yuk mutu nesaladi, ne mawa nesala damai yana popnung’ tenen, sun ila ati arum domrumnge yumada, Allah er dipapu puto kemdirure. Ukupmantoda, sun ila ati arum wengna bisi buplan damaida, lyom besi beton ikra derina utopu kupra, sun mutu-mutu yuma kalengserure. Tonda, sun mutu-mutu yuma neitamaida, Allah er dipapu sundi derirumu nyapu yuma peda, puto karepredi, teleppu kemdirure.
14Tonda, sun kurumu mutu-mutu neitamai yumada, Allahdi melipra kalengserepa, sun podana nengdi men mar poryakasenunge. Israel tara mutu neitamai yumada, podana gum dipapu, tali kange dopra kurume.
Tonda, sun jen keca putana tep, gandum du weik cap, yuk jen keca yala-yala yuma cap, weika di kareserure.
15Allahdi, tuai mutu cap, tuai mutu kunge nesala capda, ‘Ne upu kael kepkamenge’ tenepre dingeda, erdi tenepre keca cap, er upu capda, pepre pangeda, tuai nesaladi gekenunge.
Allah erdi pepre upu yuma, tuai mutu ban-ban yuma menmena di embarure. Tuai mutu kunge nesala yumadi gekenkamenge.
16Ukupmanto ngeda, Allahdi, ‘Salju dokoteprepa sakredi, tuai mutu yuma singidongonkamre,’ tenepre taru dipapu, salju dokotemrepa, tuai mutu yuma singidongorure.
Ange utopu, ‘Pio bul mo, er sida, embun beku, akeca tuai mutu deiki sangkamre,’ tenepre dingeda, akeca adipapu tuai mutu deiki sangrure.
Ukupmantoda, uku jenmaryanen, tamrepa, nimidi sikke dopra, bura tara dokotepmengeda, tuai deiki lelim dongoramretopu, Allahdi embun beku dokotemrepa, tu deiki lelim dongorure.
17Ange utopu, Allah im deiki di, pio bul me ketenepredi, mo duduya urasin utopu kupra ketenepre dingeda, er sida hujan es, tuai mutu deiki dokotemrure. Allahdi, pio bul kumanya dokotepre pangeda, bul weik kurura cadi, ware ngebodi, tali lupra tupa tektu do? Gume, nunda men kupmanto kuserura tepa.
18Dinino, Allahdi, ‘Pio bul mo, me wenenga urasin utopunge, er si es batu dokotepman ngeda, kange di bupu kuprepa, tali mepu kupkamre’ tenen, Allah er kange dipapu upu pepre pangeda, akeca adipapu bupu kurepa gum kupbarure.
Allah er kange dipapu, kumanya dokotemrepa, kumanya pung perure. Ange utopu, er dipapu, ‘Ukupkamre,’ tenepre pangeda, ila me yuma embaramre.
19Tonda, Allah dipapu, er upu yumada, nun apu bo Yakub tep, “Ange kunkamrume, angeda, pio men kunkamrume,” pepra deriramu. Angetopu, Allah dipapu, nun Israel yala nesala yuma tep, “Ange kunkamrume, angeda pio men kunkamrume,” pepra, er upu peiamseupa, gekeramupu.
20Allahdi, nun Israel nesala tep, ‘Ne mawa nesala, ne nyapu sisa kunkameng,’ tenen, weiamseudi, telep kupra meliamseutopu, yuk yala nesala yuma tep, ange utopu pio men kuramu. Sun yuk-yuk dakunge nesala yala-yala yumada, Allahdi, “Ange kunkamrume, angeda pio men kunkamrume,” pepra, kareamseu upuda, sun ton men gekeramya cadi, moupra men kael keami.
Nun nai bo Allah Yahweh tep, “Uo, Yahweh, kanda pio teleppu kurume,” pepra, er si tep pio eremkamepe.