Psa 148 | XteSC | STEP | Nun yumadi Allah Yahweh tep, “Kanda pio teleppu kurume,” pepra, er si eremkamepe. Sun im deiki kurum keca cap, malaikat cap sun yumadi, Allah Yahweh er tepapu, “Uo, Allah kanda, pio teleppu kurume,” penkamrume. Ange utopu sun im alau tara erepra kurumu keca yumadi Allah Yahweh tep, “Erda pio telep kurur ngebo,” pepra, er tepapu gispal dopra er si eremkamrume.

Psalms 148

Im deiki kure keca cap, tuai mutu neitamai kure keca yuma capdi, Allah er si Yahweh tep, “Telepe,” pepra, er sipu eremnung upu

1 Nun yumadi Allah Yahweh tep, “Kanda pio teleppu kurume,” pepra, er si eremkamepe. Sun im deiki kurum keca cap, malaikat cap sun yumadi, Allah Yahweh er tepapu, “Uo, Allah kanda, pio teleppu kurume,” penkamrume.
Ange utopu sun im alau tara erepra kurumu keca yumadi Allah Yahweh tep, “Erda pio telep kurur ngebo,” pepra, er tepapu gispal dopra er si eremkamrume.
2 Uo, sun im deiki tali dakunge malaikat cap, tonda im deiki jen talepra kunge malaikat yuma cap, tonda im neitamai Allah er tep melipra kunung nesala yuma capdi, Allah tep, “Kanda pio teleppu kurume,” pepra, er sipu eremumdi, er tep gispal donkamrume.
3 Im deiki kure kecada, keteng cap, ware capdi, Allah tep, “Kanda pio teleppu kurume,” pepra, er si eremkamrume. Tonda, kuru im deiki ingamrepa, dirine weik kuramre kuru cap, sun yumadi kange deipra, Allah er sipu eremkamrume.
4 Uo, im deiki itara erepra deiamu keca yumadi, Allah er sipu erepra gispal donkamrume. Tonda uo, im deiki alau tara deipu me cap, dua cap yumadi, er tepapu si eremkamrume.
5 Ware kun keca do yuma, Allahdi ketekepu keca yala-yala yumadi, “Allah Yahweh kanda pio teleppu kurume,” pepra, er si pio eremkamrume.
Er si eremkamruma deiyoda, ake. Allah Yahwehdi er upu peipka deiki di akeca yuma ketekeiamu. Atep, Allah er sipu eremkamrume.
6 Akure keca yala-yala yumada, Allah dipapu, ‘Aceida akeca kunkamengai ake. Sun nong cap, urasin capda ukupra kunkamenge’ tenen, ketenepra deiamutopu acei apu kununge.
Allahdi, ‘Apio kunkamenge,’ pepra deiputopu, ataru di dipdongopra pio tep apu kunkamenge. Allahdi pere upuda, yuk nengdi upu men sektenge, erdi peretopu apio kunkamre.
7 Uo, Allah Yahweh, erdi ketekepupa, tuai mutu neitamai kunge keca yala-yala yumadi, er tepapu gispal donkamrume. Tonda, “Allah kanda pio teleppu kurume,” pepra er si eremkamrume.
Tonda, ila laut mokon neitamaida, kuram bal, er sida naga bal cap, yuk ila mekina yala-yala yuma capdi, Allah er si tepapu pio eremkamrume.
8 Uo, perenglang peprepa, uku ladoramrenge cap, ila mul duduya mo cemamrenge cap, dua cap, ila puto di embare kumanya cap, mo cap, dou maramre taru cap, akeca-keca yumada, Allahdi, “Ukupkurume,” pepra pediretopu, Allah Yahweh er upupu gekepra kununge.
9 Tonda, ila mutu-mutu yuma cap, mutu buma yuma cap, co du mourur co yala-yala yuma cap, aras co cap, tali co yala-yala yuma capdi, Allah er sipu eremkamrume.
10 Ange utopu, gam keca yala-yala yuma, Allahdi ketekepra deiamupa, tali bura tara neitamai gam kunung keca yala-yala yuma cap, nimidi peinung keca yala-yala yuma cap, tonda pol deiki di lakra embaramrum ma yala-yala yuma cap, tonda bura tara gam kungedi mundu deiki embaramrum keca yala-yala yuma cap, sun yumadi Allah er sipu eremkamrume.
11 Uo, Allah erdi wepra deiamupa, tuai mutu neitamai ila nimi deiyo talepra kurumu Raja neng yuma cap, yuk ila deiyo kepra kurumu neng yuma cap, tuai mutu neitamai talepra kurumu pemerintah neng yuma capdi, Allah Yahweh er tepapu gispal dopra, er sipu eremkamrume.
12 Uo, sun kaber neng pe, kaber nerapu pe, metek nyapu pe, wisi neng pe yumadi, Allah Yahweh er tepapu “Kanda, pio telepe,” pepra, er sipu eremkamrume.
13 Telepe, sun yumadi Allah Yahweh er sipu eremengedi, “Allah kanda pio teleppu kurume,” pepra, er tep si eremkamenge. Er si eremkamenga deiyoda, ake. Ada Allah Yahweh, ila puto weik ngebo kurepa, tuai mutu kunge nesala yumadi, ‘Uo, er sida ila mambul si kurure. Erda ila puto weik ngebo,’ tenenunge.
Im deiki cap, tuai mutu ban-ban yuma capda, yambul telep kurur dinin, Allah er pio telep kupra kurenge cap, dirin weik kurenge cap, mambul weik kurya cap puto weik kurya capda, akeca yuma deiki tarapu erepra kurure.
14 Allah er dipapu ban-ban yuma kunge nesala tep tenerure. Tonda, erdi anuamu nesala, sun Israel yala nesala tep, puto deiyo keca kareramupa, sunda puto weik nesala kurami.
Ada, Allahdi, “Angeda telepe, angeda mali,” pepra lap peramutopu, aupu moupra talengedi dumsisi kunung nesala tep, kange deriredi, anesala dopra, ‘Sunda ne mawa nesala’ tenen, er damaipu derirure.
Atep, akeca-keca yumadi Allah er sipu eremkamenge. Nun yumadi Allah Yahweh er si tepapu eremkamepe. Raja Dauddi, mutu deiki di pepu.