Psa 149 | XteSC | STEP | Nun Israel nesala yumada, “Allah er si Yahwehda, pio telepe kurure,” pepra, er sipu eremkamepe. Nun nai bo Yahweh tep, kange lon mut, ukupungepu penkamepe. Nun Israel yala nesala yumadi, ‘Allah er sipu eremkamep’ tenen, bulupra kikiman kunkamep taruda, Allah tep, “Kanda pio teleppu kurume,” pepra, mut pena deiki di penkamepe. Ada, tamna gum dipapu, ‘Allahdi pesere upu yuma talepra, dumsisipu kunup nesaladi, mut yumada penkamepe’ tenen, pepne.

Psalms 149

Sun Israel nengdi Allah tep, “Telepe,” pena tep, mut upu seku

1 Nun Israel nesala yumada, “Allah er si Yahwehda, pio telepe kurure,” pepra, er sipu eremkamepe.
Nun nai bo Yahweh tep, kange lon mut, ukupungepu penkamepe.
Nun Israel yala nesala yumadi, ‘Allah er sipu eremkamep’ tenen, bulupra kikiman kunkamep taruda, Allah tep, “Kanda pio teleppu kurume,” pepra, mut pena deiki di penkamepe.
Ada, tamna gum dipapu, ‘Allahdi pesere upu yuma talepra, dumsisipu kunup nesaladi, mut yumada penkamepe’ tenen, pepne.
2 Nun Israel nesala yala-yala yumada, Allahdi ketekepra deiamseua deiyo ngeboda, akuredi taleserura cadi, pingping kange deipmepedi, Allah er sipu eremkamepe.
Ada, Sion mutu neitamai kunup nesala yumada, nun ila nimi deiyo ngebo Allahdi nunda taleserura cadi, nun nimi deiyo ngebo Raja utopu kuserure. Tonda, Allah cap, kikiman kunupa cadi, kange deipra kunkamepe.
3 Tonda, nun Sion mutu neitamai kunup nesala yumadi, Allah, er pio telep si akurura cadi, nundi er tep, “Uo, kanda pio telepe,” pepra, mut pena deiki di penkamepe.
Allah tep, “Telepe,” penkamep taruda, lelim peramre keca, er sida tarian cap, kecapi cap, rebana cap deiki di doupra amutda penkamepe.
Teka, Sion mutu kunup nesala yumadi, Allah tep, mut penkamepe.
4 Deiyoda, Yahwehdi wepra deiamseu nesala, er mawa nesala tep nengeda, kange deipra kunupe.
Tonda, ware nesala do yuma, sundi sun pe kange eremdana gum di, sun kange dipru bounpu kungedi, ‘Allah dipapu melipsetue,’ tenenung nesala tep, Allahdi telep kudiseredi, nun ikin kuserur keca neitamai di lopra lyemdoserure.
5 Allahdi konum wepra deiamseu nesalada, Allahdi pesere upu moupra talepmepedi, dumsisipu kunupa cadi, kange deipra kunkamepe.
Deiyoda, yuk yala nesala epsengedi, ‘E, sun anengda, teleppu kununge,’ tenen, gispal donkamsenge.
Allahdi pesere upu moupra talepmengedi, dumsisipu kunge nesalada, ‘Sun ason deiki mankameng taru peda, kange deipmengedi, ila upu deiki di, ‘Telepe,’ penkameng’ tenen, Allah tep moronune.
6 Ato nesala yumadi, sun nai Allah tep, “Uo, kanda pio telepe,” pepra, ‘Ila upu deiki di penkameng’ tenen, Allah tep moronune.
Tonda, sun yumadi, sun pe buru deiki di, ila yu weik parang ya doupmengedi, yankamenge.
7 Deiyoda ake. Ada, ‘Sun yuk-yuk mutu dakunge nesala yala-yala yumadi, mali weik kuraminge tep, kwangdangkamep’ tenen, yu parang ya doupra yankamenge.
Anesaladi, yu parang ya doupkamenga deiyo ton ake. Ada, yuk mutu nesala yala-yala yumadi konum mali weik kuraminge tep, ayu parang ya di anesala popra, wenepkamenge.
8 Tonda, sun yuk-yuk mutu kunge nesala talepra, nimi deiyo kepra, Raja-Raja kunge neng tep, tomopmengedi, rantai tapu di ateng koupdongopkamenge.
Tonda, sun Raja-Raja neng amutara kupra, sun pel donge deiyo-deiyo neng peda, gat keca er sida besi di, sun yan cap, buru capda, ateng koupdongopkamenge.
9 Ukupkamenga deiyoda, ake. Ada, Allahdi, “Angeda kunkamrume, angeda pio men kunkamrume,” pepra, deiamseu upu peseretopu, sun yuk yala nesaladi mali kurami keca moupra dipetepmengedi, akuramitopu, Allah er upu deiki di, upu bokeipmengedi, wenepkamenge.
Allah er mawa nesaladi, yuk mutu nesala tep, wenepkamengada, ada sun gispal dona cap, deiyo kepra eremna cap tep, apel donkamenge.
Ada tali dakunge nesala tep gum dinin, Allahdi pesere upu moupra talepmengedi, tamna gum dipapu, aupupu dombanung nesaladi, sun mali kunge nesala tep, upu bokeipmengedi wenepkamenge.
Nun Israel yala nesala yumadi, nun nai Allah, er si Yahweh tep, “Uo, kanda pio telep kurume,” pepra, er sipu eremkamepe!