Psa 16 | XteSC | STEP | Ne nai Allah, kandi kalekra melipnerume. ‘Ikin kupnerur’ tenen, kan damaipu yakanune. Kanda nimi melimna deiyo ngebo kurume.

Psalms 16

Daud mut pena deiki di, “Nedi Allah tep pio teka tenepra moronune,” pepu upu

1 Ne nai Allah, kandi kalekra melipnerume. ‘Ikin kupnerur’ tenen, kan damaipu yakanune. Kanda nimi melimna deiyo ngebo kurume. 2 Atep nengeda, nedi kan Yahweh tep, upekenune. “Ne nai bo Allah, kanda ila puto deiki di akeca-keca yuma talememdi, ne ila deiyo ngebo kunerume,” pepra, si eremkenune. Ware keca do yuma, telep keca talenun ngeda, kan dipapu karenerume. Yuk yala keca yumada, tali kecapu kurur dinin, kanda ila telep ngebo kurume. 3 Tuai mutu neitamai kungedi, kandi, ‘Ukunkamrume,’ pepra deiamsemum upu talepra, dumsisipu kunung nengda, nedi anesala tep, pio kange derinune.
4 Tonda, gam kuna gum kecapu, si eremnung nesalada, yapi keca dopra aisok damai yakangedi, si eremnung nesalada, ila kange mun kange doupra kunkamenge. Sun nong deiki ikin keca pio weik kunkamre. Sundi tali keca, aisok si eremna tep, gam keca popra uku dongorbaramenge ngeda, ne men melipra donkamne. Tonda, sundi isok si sipenge ngeda, nedi aisok si pepra, asi pio men eremkamne.
5 Ne nai Allah Yahweh, amenda taru telep kupkamnere ngeda, kan dipapu karenkamnerema tep, kan sipu eremkamne. Ne kunun keca cap, talenun keca cap yumada, kan dipapu kalengnerume. Atep kan sipu eremkamne. 6 Tek sisi Allah kandi tu karenemum ngeda, pio telepngepu karepnemume. Ukupnemuma tep, ne dipru neitamai, pio ila di kange derikenune.
7 Allah kandi ne tep, ‘Ukunkamrume, telep bisida ake,’ pepra peteremneruma tep, kan sipu pio eremkamkene. Pio lukunda neitamai peda, kandi peipnemum upu, tupa tenenapu kunune. 8 Neda Allah kan tep, tupa tenenapu kununa cadi, ne kangeda, kanda ne damai tupa tekra melimnerume. Ne damaipu kuneruma tep, ikin keca ne damai yatua peda, ‘Allahdi melimnerepa, telep dipapu kunkamne’ tenen, kange derinune. Tonda, kwar men kunerure.
9 Atep nengeda, ne dipru neitamai telep kange deipnedi, nedi kan tep, kange deipra kan sipu eremkamkene. Tonda, ‘Ne nong yuma Allah tepapu karepkune,’ tenepra karepne dingeda, neda kwar kuna gum dipapu, dimpepra kunkamne. 10 Angeda mesum tep men pepne. Ne depnya peda, Allah kandi men tapkamnerume. Ukupnememdi, kandi wepra deipnemum ngebo, pio dumsisi kupra, lekpu ^{▼▼Lek kunune, pepkada, ada kurun bol ngebo tep men pepu. Ada, ‘Mali kun keca tenpunge peda men kure ngebo,’ tenepra pepu. Indonesia upu deiki di, ‘suci’ penunge.} kunun ngeboda, depnyopda, tu pumbon peiknenga peda, nongda men lyupkamnere. Gam bukra deipkamneruma tep pepne.
11 Tonda, Allah kan dipapu gam kuna tep, dumsisi bisi peterepnerume. Ukupnemum pangeda, kan damaipu yanedi, pio kange deipra kunkamne. Ukupnepa pingping keca, pio akunkamre ngeda, kandi ne damai yamupra karenkamnereme.