Psa 17 | XteSC | STEP | Raja Dauddi aMazmur mut seku. Uo, ne nai bo Allah Yahweh, ikin kunerura cadi, nedi kan tep, ‘Melipneo!’ pepra, engena deiki di, ‘Moupra melipneo!’ pepra, moropken upuda, gekepnememdi, melipneo, naio! Neda kan tep, ‘Melipkamner’ tenen, moropmaken upuda, ‘Moupra gekepkunerem’ tenen, pepkene. Ne sipyal di pepkenun upuda, tali upu guma. Tek sisi upupu pekenune.

Psalms 17

Mali men kupu ngebo dinin, er deiki ikin keca deipipa, Allah tep moropu upu

1 Raja Dauddi aMazmur mut seku.
Uo, ne nai bo Allah Yahweh, ikin kunerura cadi, nedi kan tep, ‘Melipneo!’ pepra, engena deiki di, ‘Moupra melipneo!’ pepra, moropken upuda, gekepnememdi, melipneo, naio!
Neda kan tep, ‘Melipkamner’ tenen, moropmaken upuda, ‘Moupra gekepkunerem’ tenen, pepkene.
Ne sipyal di pepkenun upuda, tali upu guma. Tek sisi upupu pekenune.
2 Ne moropken ngeda ake. “Neda mali men kupmasipapu, yu nengdi ikin keca dopra, ne deiki deipnei dinin, kan dipapu yana, ‘Angeboda mali men kupu,’ peptuma deiki di, ange gekepmengopda, yuk nengdi ne tep, ‘Uo, tek sisi angeboda, dumsisipu kurure,’ tenenkamnenge.
Allah kan dipapu, dipetepmemdi, ‘Tek sisi telep kuna ngebo, telep dumsisi kuna ngeboda, ake,’ penkamserume.”
3 Kandi, ne kange dipru neitamaida, moupra dipetepnememdi, tonda, lukunda neitamai peda,
‘Er dipru neitamaida, mali kunange akapmar do, gum do?’ tenen, ne kange dipru neitamaida, moupra dipetepnememnyopda, ‘Ange ton akupu’ tenen, epkamnerume.
Ne kange dipru neitamaida, mali kunange ton, tonda, ‘Mali kun keca talepra kunkamne’ tenenange ton, pio men epkamnerume.
4 Yuk nengdi tali-tali upu peramengtopu, nedi pio men penune.
Ange gum dinin, Allah kandi peserem upuda moupra gekenuna deiki di, sun nimi pona cap, mali kudina cap kunge nesala kuramengtopu, nedi men kunune. Deiyoda, kandi, ‘Ukunkamrume,’ pepra deipsemum upu talepra kununa tepa.
5 Teka ne nai, kandi, ‘Angeda kunkamrume, angeda pio men kunkamrume,’ pepra deipsemum upu pio moupra talenedi, dumsisipu kunune.
Ukupmantoda, nimidi gat tu deiki di, bisi tali lupra embangepa, olapne di men sangameng utopu, kandi peiamsemum upuda, pio moupra gekenuna cadi, mali men kunune.
6 Nedi kan tep ‘Uo ne nai bo Allah melipneo,’ pepra morokenune.
Kandi, tek sisi ne moropkenetopu gekepnememdi, melimkamneruma cadi, ne kaele, tali tep men morokenune.
Atep nengeda, naio ne morokenun upuda, moupra gekenememdi, melimkamnerume naio.
7 Naio, ne kaele. Kandi nun tep, ‘Bicau tenesenuna cadi, ukupra-ukupra pio melipra lyepsenedi, telep kupra derinkamsene,’ pepra, pedina upu deiki di peipsemum ngeda, pio tep telep-telep kupra karenkamserume.
Uo nun naio, kanda tek sisi puto boun kuprepa, ‘Er dipapu nun tep melipra lyepkamser’ tenen, kan damai yana kunge nesala yuma tep, tek sisi lyemdoserume.
Ada, sun pona tep yu neng tekmengedi, ‘Aputo boun neng tep, adipapu poptapkupe’ tenepmengepa, sun ikin kunge nesaladi kan damai yana kunkameng neng yumada, kan puto deiki di melipra kalengsememdi, lyemserume.
8 Naio, kandi ne tep, pio bicaue teneneruma cadi, ‘Kan pe asuru di dimemdi kalengamremtopu, ne tep melipra kalengkamnerem’ tenen, moropkene.
Angetopu, kan damai ton deipnememdi, kalekra lyemdonkamnerume naio. Ukupmantoda, ayam madi, er nyapu dopra, er pol amutara deipredi kalengamretopu, ‘Kandi ne tep, kan damai deipnememdi kalengkamnerem’ tenen, moropkene.
9 Ada tali tep gume. Deiyoda, ne pona tep nengdi, ‘Angebo popmepedi, er nong deiki ila ikin keca derinkamepe,’ tenenenung neng, ‘Sundi popnenung’ tenen, kandi melipra kalengkamnerume naio.
Sun ayu nengdi, ne dana-dana tara ongopgenepra tekmengedi, ‘Angebo popkup’ tenen, konum ketenepmang adano. Atep, melipra lyepneo ne naio!
10 Sun yu nengdi, yuk nesala tep, bicau tenenada, pio men tenenunge. Tonda, sun upu penunga deiki di, balila weik kupmengedi, pio salnong-nong upupu penunge.
11 Ne embanunai yumada, sundi ne amnyo tara yangedi, warengnenunge.
Ukutaru peda, sundi ne tep, ‘Angeboda popmepedi, er nongda puto di dopra, tu deikipu siptapkamepe,’ tenenenunge.
12 Ukupmantoda, ila yu pus, er sida singga pus, erdi ‘Bura tara gam kure keca popnedi, sun nong cap, tu capda, sek-sek singipnedi, jepropkamne,’ tenerure.
Tonda, asinga pus, erdi deipu nyapuda, ‘Gam keca mankau kange doupra, ne damai embarepa, adipapu popkun’ tenen, inipmaredi warengamre utopu, ayu nengdi ne pona tep ange utopu, ‘Angebo popkup’ tenen, warengnenunge.
13 Ange tep nengeda, ne nai Allah Yahweh, kanda tekmemdi, ne pona tep yu nengda, wenepmemdi, amutarapu deipkamrume.
Sun yu weik nengdi, ne tep, ‘Nun nimi pona tep parang ya dopropmepedi, angebo poptapkup’ tenenenunga cadi, naio, kandi melipra lyepropkamnerume!
14 Ne nai Allah Yahweh, kan pe puto buru di, melipra lyepnerume. Ada, tuai mutu kunge yu nengdi, tali tuai kecapu putaprepa, akecapu tenenung nengdi, mali kweipnenunga tep, naio, ‘Kandi lyepropnerum’ tenen, moropkene.
Naio, nedi moropkene. ‘Kandi yu kuna cap, mali kuna cap talepra kunge nengda, ila kange mun keca karepnedi wenepkamne,’ tenepmumdi, sun tep konum keteneipmumtopu, ayu neng tep, ila di wenepkamrum’ tenen, moropkene.
Tonda, ayu neng, sundi deiami nyapu peda, ‘Kandi ikin keca dopra sun damai deipmempa, kange mun kange doupra kunkameng’ tenen, moropkene.
Tonda, ayu nengdi deiami nyapu, sundi dadeipdanen bangedi, derinkameng nyapu peda, ‘Ila kange mun kange doupra kunkamnung’ tenen, moropkene naio.
15 Dinino, ne tep nengeda, nedi mali kun keca talepra men kununa cadi, pio dumsisipu kunmanyanen, konum kupnyopda, amenda taru, Allah kan urasin ton dinkamkene.
Tonda, amenda konum depne dingeda, dakunmanyanen, kange di ton cap bukronedi, kan urasin cap, nong cap, epne dingeda, pio kange deipra kunkamne.