Psa 18 | XteSC | STEP | Raja Dauddi, amazmur upu mut pena deiki di sekra deipudi, Allah upu mut pena deiyo ngebo karepkamenga tep, seku. Daudda, Allah Yahweh, er amutara pel talepra dona ngebo kuramu. Amazmur upu mut seku ngeda, Yahweh tep, pepudi, amut peramu. Tonda, amut seku taruda, ada Allah Yahwehdi, Daud tep melipra lyepropka deiki di, Daud er pona tep neng popra gawal daku. Ange ukupu taru, Dauddi pepu upuda ake.

Psalms 18

Raja Daudda, mut pena deiki di, er pona tep neng konum popra sikke buktapka tep, Dauddi Allah tep, ‘Telepe’ pepu upu

1 Raja Dauddi, amazmur upu mut pena deiki di sekra deipudi, Allah upu mut pena deiyo ngebo karepkamenga tep, seku. Daudda, Allah Yahweh, er amutara pel talepra dona ngebo kuramu.
Amazmur upu mut seku ngeda, Yahweh tep, pepudi, amut peramu.
Tonda, amut seku taruda, ada Allah Yahwehdi, Daud tep melipra lyepropka deiki di, Daud er pona tep neng popra gawal daku. Ange ukupu taru, Dauddi pepu upuda ake.
2 Dauddi, “Uo, ne nai bo Allah Yahwehda, kandi ne puto karenerum ngeboda, ne kange dipru yuma, kan deikipu derikenune,” pepu.
3 Kanda Yahwehdi, ne ikin kunerur keca neitamai yumada, kan dipapu loptapnememdi, lyemdonerume. Atep, ukupmanto ngeda, Allah kanda ila mutu yangne gel cap, tonda yu nengdi men wekmanto ila gel ati cap lelipra bungamre utopu kunerume.
‘Yu nengdi yana popnenung’ tenen, kware kunerur taru yumada, kan damaipu yana inipra kunyopda, teleppu kununa cadi, kanda ila mutu yangne gel utopu ngebo kunerume.
4 Kanda, pio telep kuruma cadi, nun yumadi, kan tepapu, “Uo nun nai Allah Yahweh, kan puda, pio telep kurume,” pepra, kan sipu eremkenupe. Atep, ne ikin kunerur taru yumada, kan tepapu, “Naio yana melipra lyepneo!” pepra morokenune.
Ne pona tep nengdi, ‘Angebo popkup’ tenepmengedi, ne damai poryakanenge taruda, nedi kan tepapu morokenuna cadi, kan dipapu ne lyemdonkamnerume.
5 Tek sisi, yu nengdi ne damai ongopgenepra, popkutepnei taruda, ‘Konum popkup’ tenen, piripetepneipa, depmanto kupsi.
Ataruda, dato-dato di ila ikin keca ne damai yaupa, kware weik kupneua tep, kange mun kange doupra kuramsidi, ‘Uo neda adipapu depkune,’ tenepsi. Ukupmantoda, ila me opredi, dato-dato di me yaredi, nimi weika di jeredi poprepa, kael kepmengedi, yuk neng yuma kware weik kuramengtopu, ataruda, ne ton ukunmasi.
6 Ataruda, tek sisi depmanto kupsi. Ukupmantoda, nesala konum depne neng banung mutu, er si Sheol mutu di, ila puto tapu di yana, koupdongopneupa utopu depmanto kupsi.
Ataru neda, tek sisi konum depmanto konum kupsa tep, men lyepdanmanto kupsi. Ukupmantoda, tali bura tara gam kuramre keca, mangkau kange doupra, bisi embangedi, nimidi konum ketenepra deipi pona keca, er sida pena pepra deiamengai damai bangepa, akeca di poramretopu, neda konum popneupa, depmanto kupsi.
7 ‘Ataruda, ne pona tep nengdi, poptapkuneng’ tenen, tek sisi pio kange mun kange doupra kuramsa tep, nedi kan Allah Yahweh tep, “Melipra lyepneo!” pepra moropkesi.
Teka, ne si eremkenun Allah tep, “Naio kan dipapu yana melipneo!” pepra moropkesi. Kan tep moropkesi taruda, kan si eremna ati pumbon di, ne ngolokra moropkesi upu gekepnemume.
Ada, nedi engepra moropkesi upu konum pepsi pangeda, kan amul di konum gekepnemume.
8 Gekepnemumdi, ne lyemdona tep, ne damai yankumum taruda, tuai mutu ban-ban yumada, ila puto di long-long pepudi moropsepu. Ada, mutu ban-ban yuma ila longna lokupa kupu.
Ataruda, kan Allah, yu weik kupkeua cadi, ila longna di, mutu dup yuma cap, amutu-mutu yuma amutara kwamu gel capda, long-long pepu.
9 Allah kanda, yu weik kupkeu taru ukupmantoda, kan u pumbon di, uku bu jepupa, ila ketda katawai belepu.
Tonda ukupmantoda, ataru dipapu, akeca-keca yuma jeramre uku bu cap, uku kalum capda, kan sipyal pumbon di, yana katuai kupu.
Allah, kan yu weik kupkeupa, ukupmanto ngeda, ila bupu uku bo cap, kalum capda, kan nong neitamai di belepudi jenmau.
10 Ukupra kupkeupa, ataruda, kandi im deiki buplan pakra deipmumdi, tuai mutu kwerepra yamume.
Tuai mutu kwerepra yamum taruda, pio mirin duada, kan yan amutara kupkeupa, adeiki di kan kwerepra yamume.
11 Allah kanda pio menmena di kwereryamum taruda, im deiki puto weik kure malaikat, er sida Kerub, er pol bali deiki bukmumdi, im deiki di kwerepra, tuai mutu neitamai lakra kwereryanamume.
Ukupmantoda, ila kumanya puto pung peprepa, sepdara yakaramretopu, ataruda Allah kanda menmena di tuai mutu kwereryamume.
12 Kandi tuai mutu yamum taruda, ‘Tali tuai nengdi ne nong epnenung’ tenen, kan nong dana-dana tara yumada, ila kunungnapu kecapu kwamupa, angedi lelipdongomkeupa, tuai mutu nengdi men epkei.
Tonda, ila mirin dua cap, mo cap, kan nong dana-dana tara singipra lelipdongopkeua cadi, nimidi kan nong men epmanto kurami.
13 Allah kan nong damaida, ila dirine weik kwamnga cadi, apio kunukamu dua kan-kan neitamai di, kan dirineda, katuai kupu.
Tonda, kan tuai yamum taruda, im deiki di ila es mo, yambul bum gel utopu kupra saku. Tonda, uku bu di tupa jeramre kalum cap, tuai mutu deiki di saka yaue.
14 Teka, kan Allah Yahwehdi, im deiki di tuai mutu kwereryamum taruda, im neitamai di ila kulman lelim pepu.
Ataruda, kanda Allah, ^{▼▼Allah – Acada, Ibrani upu deiki di, Allah er si tep, ‘Allah Elyon’ pepra seki. Aupu deiyoda, sun kael kemna tep, angeda konum jenek kupra sekmepu.} akeca-keca yuma talepra, pio deiki tara kurumdi, Ila Puto Eremna Ngebo kuruma cadi, kandi ila upu deiki di pepmumpa, tuai nesala yuma gekepi.
15 Ataruda, Allah kandi, ila pereng lang penange weika di im neitamai di dokotepmumpa, kan tep, ‘Allahda nun song cadi, er upu pio men gekenkamepe,’ tenekenung neng yumada, ange epya deiki di, kware weik kupupa, sunda dana-dana tara yuma sepdara bendopi.
Allah kandi pereng lang penange weik dokotepmum ngeda, uku bu jeramre mar utopu kupka cadi, ataruda kan tep, ‘Allahda nun songe,’ tenen, kan upu pio men gekekenung nengda, kware weik kupupa, dana-dana tara yuma sepdara bendopi.
16 Allah kan tuai mutu yamum taruda, ila laut mokon pumbon kaurye weik kuramre me ton, katuai kepra deipmume.
Tonda, tuai mutu amutara, ila mutu bungne gel ton katuai keipmume.
Ange-ange yumada, kanda Allah Yahwehdi, sun mali kurami neng tep, ila upu deiki di wenepmum taru dipapu angeda kupu.
Ataruda, kan tep, ‘Nun song,’ teneramkei neng tep, ila yu weik kupkeupa, kanda ila upu deiki di wenepmume.
17 Ne Daudda, pio ikin weik kuramneu taruda, Allahdi im deiki kururai di, er buru bepekra tuai mutu neitamai yana talepneudi, melipra lyepropneue.
Ne pona tep nengdi, ne tep popmanto kupnei taruda, Allahdi lyepropneunge ukupmantoda, ake. Ada, ila me opredi, nimi yuma jepmanto kuprepa, tenpu ngebodi, er kabo melipra lyepropredi, angebo dopra telepai deriramretopu, Allahdi lyepropneua tep pepne.
18 Teka, ila puto weik nengdi, ‘Angebo poptapkupe’ tenen, ne damai pona tep piripetepneipa, ne konum depmanto kupsi dinin, Allahdi aneng kankan di, melipra lyepropneue.
Ayu nengdi ne tep, ‘Angebo nun pio dabal cadi, adipapu popkupe,’ tenepneidi, ne damai yana popkutepnei dinin, Allahdi sun damai di, ne tep melipra lyeopropneu.
Teka, ne pona tep nengda, pio puto weik kuramya cadi, neda puto bounpu kuramsa tep, men lyepdanmanto kupsi dinin, Allah dipapu lyepropneue.
19 Ne ikin weik kuramsi taru neitamaida, ne pona tep nengdi, ne damai yana popkutepnei dinino, ne nai Yahweh er dipapu, melipneupa, sundi men popnei.
20 Allahdi ne tep melipra lyepropneudi, kange di tamupra telepai, nimidi men popnetengaipu yana deipneue.
Allahdi ne tep, kange pio deipneua cadi, ne pona tep neng damai di lyepropneue.
21 Tonda, neda mali kuna gum dipapu, pio dumsisipu kuramsa cadi, Allahdi ne melimna tep, menenga keca karena utopu kupra, lyepropneu.
Ada, ne buru di mali kunange pio men kuramsidi, dumsisipu kuramsa tep, Allahdi ne melimna tep, menenga keca karena utopu kupra, lyepropneu.
22 Ada tali tep men lyepneu dinin, deiyoda, Yahwehdi, “Angeda kunkamrume, angeda pio men kunkamrume,” pepra deiamseu upu yumada, nedi talepra dombanapu kuramsa tep, erdi lyepropneu.
Tonda, ne mali kuna gum di, ne si eremnun Allah, er upu men yaniptapsidi, er damai di tapra men bendopsi.
23 Allah men tapsa deiyoda ake. Ada, erdi, “Angeda kunkamrume, angeda pio men kunkamrume,” pepra deiamseu upuda, pio tenenapu kuramsi.
Tonda, Allahdi, nun tep, “Telep kuna ngeda ake, mali kuna ngeda ake,” pepra, deiamseu upuda, pio men tapra luprosi dinin, ange yuma tupa moupra tenenapu kunune.
24 Allah damaida, mali kun keca tenpunge peda, men kuramsipa er konum kael kepneu.
Tonda, mali kun keca talepra men kuramsa tep, ne kange dipru neitamaida, ‘Uo, ne mali kunun kecada ake,’ tenen, mali kange doupra men kunune.
25 Atep nengeda, Allah Yahwehdi ne dumsisipu kuramsinge dirura cadi, ne telep kupra dumsisi kuramsitopu kupra, telep menenga keca kunupra karepneue.
Ada, ne pe buru di, mali kunange talepra men kuramsipa, diramneua cadi, Allahdi menenga kecada, telepngepu karepneu.
26 Ware neng do yuma, sundi kan Allah tep, tamna gum di, pio tupa teka tenepra dombakenung neng tep, kandi tamupra sun tep pio men tamrume.
Tonda, mali kunange tenpungepu men kungedi, dumsisipu kunge nesala tep nengeda, kan Allahdi tamupra sun tep, dumsisi kupra melimserume.
27 Ange utopu, mali kun keca talena gum dipapu, pio telep kunangepu kunge nesala tep, kan Allahdi tamupra sun anesala tep, pio telep kunangepu kurume.
Dinino, ware neng do yuma, sundi tali-tali upu pepra, kange tenena deiki di, mali kun keca talepra, inipmengedi, mali kunge nesala tep nengeda, kanda ila kael kemna deiki di sun tep, yu tenepra ikin keca karepmemdi, wenemrume.
28 Angeda, tali tep men pepne. Deiyoda, sun kange dipru bounpu kungedi, yuk neng amutarapu kunge nesala tep nengeda, kandi anesala melipra lyemdorume.
Dinino, sun pe kange erepdangedi, salnong-nong kamna neng yumada, kandi sun tep wenepmemdi, amutarapu kupra deipmemnyopda, ali dangnunge.
29 Ne kaele. Kan Allah dipapu, telep kupra derinemempa, tupa teleppu kunedi, ne gam kune taru yumada, teleppu kunune. Ukupmanto ngeda, kan dipapu ne weica lapra deipnemempa, teleppu tupa gam kunune.
Ukupmantoda, ikin weik kunerur taruda, pio kunungna neitamai utopu kunun dinin, ne nai Allah, kan dipapu dirin weik kareneruma deiki di, kange di tamupra teleppu kudinerume.
30 Pio yu weik jen talena neng, ne damai yana, ‘Popkup’ tenen, pirinenga peda, Allah kandi melimnememnya deiki di, apodan neng yuma popra gawal daktene.
Ange utopu, ne benkamne bisi neitamai, ila lyom beilya wipra deipnetenga peda, kan Allahdi melipnememnya deiki di, alyom beilya deiki tara kaplepra betene.
31 Uo, kanda Allahdi kurum keca yumada, pio dumsisipu kurume. Kandi pel dorum keca neitamaida, mali keca tenpunge peda men kurure. Telep kunangepu kurume.
Tonda, kanda Allah Yahwehdi, “Ukunkamne, ukupra telep kudinkamsene,” pepra, pedina upu deiki di peserum upu yumada, tek sisi nong kupkamre. Tenpunge peda, men tamrume.
Ware nesala do yuma, sundi kan tepapu, ‘Allah er dipapu melipra lyepkamnere’ tenen, kan damaipu yana kunge nesala tep nengeda, kandi anesala tep, pio melipra kalengrume. Ukupmantoda, kanda nun nong lelimna keca, er sida perisai utopu kuseruma tep pepne.
32 Tek sisi Allah kurume. Kanda Yahweh pua. Yuk ngebo ton Allah pio men kurure.
Ware ngebodi ton, nun yuma tep melipra kalengkamser do? Gume, nundi si eremnup Allah, er dipapu kalengkamsere. Ukupmantoda, yu nengdi men popsetengai, ila mutu yangne gel utopu kuserura tepa.
33 Allah kan dipapu, ne puto kemdinerume. Yuk ngebodi ton gume.
Tonda, ne embanun bisi neitamai yumada, kan dipapu melipra kalengnemempa, teleppu kunune.
34 Allah kan dipapu, ne damai yana, puto keipnemume. Ukupmantoda, rusa bisamdi, gel deiki sepdara embaramre dinin, ulapne di ulaproprepa, men sangamretopu, kandi ukupra deipnemume.
Allah kandi ne nong dopra, ne pona tep nengdi men yana popnetengaipu deipnemuma cadi, tali kange doupra, teleppu kunune. Ukupmantoda, ila lyom mutu dup deiki deipnetumpa, teleppu kuteneya tep pepne.
35 Allah kandi ne buru puto kepra deipnememdi, “Ukupkamrum, ukupkamrum,” pepra, nimi podan keca yuma telep kupra peteremnerume.
Allahdi ukupra puto weik kepnemuma cadi, ne jen tapu pedonada, gat keca er si tembaga deiki di, ketenepra deipnetenga peda, ange peda pepra doptene.
36 Tonda, kandi ne tupa lyemdoneruma tep nengeda, ukupmantoda, ne nong lelimna tep keca, er sida perisai utopu kuneruma cadi, yuk yu nengdi, ne men poptapnetenge.
Tonda, kan dumsisi tara ila puto buru di, tupa melimneruma cadi, tupa teleppu kunune.
Allah kandi ne tep, ila di bicau tenenememdi, melimneruma deiki di, tupa teleppu kunune. ‘Ila mambul pel dorur ngebo’ tenen, konum kweipnemumpa, ukununa tep, ne tara nengdi, ne tep gispal donenunge.
37 Allah kan dipapu, pio telep karayong bisi deiki dopra deipnemumpa, tali lupra banuna cadi, ne pona tep nengdi, men popnetenge. Atep, neda pio teleppu kunune.
Atep nengeda, ne tep, ‘Angeboda, nun song,’ tenenenung nengdi, men popra gawal daknetenge. Ukupmantoda, telep bisi konum kepra deipnemuma cadi, ne yanda ulapne di ulaproprepa, men saka ponerure.
38 Angeda gum dinin, ne pona tep nengda, ‘Popkaman ja’ tenen, puto dipapu domembanune.
‘Ne pona tep neng yuma, sun damai yana popnedi gawal dakamne’ tenepsidi, tamna gum dipapu, sepdara dombanapu kuramsidi, sun yuma popra sikke buktapsi.
39 Ne pona tep neng damai yasidi, aneng yuma nedi tomopra siptapsidi poptapsa tep, sunda kange di tamupra men bukmanto kupidi, sun yumada, dedonapu kurami.
Sun aneng yumada konum poptapsipa, tu deiki sakyopda, kange di ton cap, men tekmanto kuramya tep, nedi sun nong deiki yanipsi.
40 Ange yuma kuramsada, ne pe puto deiki di gume. Ange gum dinin, kan Allah dipapu, ‘Angebo er pona tep neng porberedi, sun yuma popra gawal dangkamre’ tenen, puto weik karepnemuma deiki dipapu, ne pona tep neng yuma poptapsi.
Ada, kan Allah dipapu, ne tep puto weik karepnemuma deiki di, sun yuma popra gawal daksi. Atep kandi ne pona tep neng, puto bounpu kweipmumdi, kandi, sun dopra ne amutarapu deipmume.
41 Allah kandi ne melimna tep, mambul pel dopmuma deiki di, ne pona tep neng yuma kware kupupa, ‘Uo, angebodi popkamsere’ tenen, sundi amnyo karikra, sepdara bendopi.
Tonda, kandi meliamnemuma deiki di, ne tep, ‘Angebo nun pio songe,’ teneramnei neng yumada, popra sikke buktapsidi, gawal daksi.
42 Anengda, ne cap, sun cap podanmapu taruda, sundi, ‘Uo, ware ngebodi, yana melipra lyepropsetu do?’ tenen, kan Allah tep moropi dinin, kandi sun tep tapra, kaukepronapu kupmume.
Teka, ne pona tep nengda, ‘Allah Yahwehdi yana melipsetu do?’ tenen, kan tep ila upu deiki mororami dinin, kan Yahwehda, anengdi mororamkei upu pio men gekeramrume.
43 Allah kandi aneng tep men gekepmumdi, men meliamuma cadi, nedi, apona tep neng yumada, popra gawal daksi. Sunda popra sikke buktapsa tep, ukupmantoda, kumanya yana puto di puperepa, tu buta dopra dubaramredi, gum kupbaramretopu, nedi apona tep neng yuma, popra gawal daksi.
Teka, ukupmantoda, nimidi tali bambam keca do, mali kupra konum lyurur keca do, bisai akupmarepa dopra, bura tara dokotemamengtopu, ne pona tep neng yuma popra, yuk karenai dokotepsi.
44 Ataru neitamai yumada, yuk nesaladi yu kupupa, ‘Angebo perur upu men gekenkamep’ tenen, ne damai yana, mali-mali kupya neitamai di, kan Allahdi lyepropnemume.
Tonda, kandi ne wepra ereipnemumpa, nedi sun yuk-yuk mutu nesala peda, talepsidi, sun nimi deiyo ngebo kepra kuramsi.
Ukuramsi taruda, ne men di men kael keamsi nesala, yuk-yuk mutu nesalada, ne amutara kepra deipsipa, ne pel tep melipra doramnei.
45 Anengda, nedi, “Ukupkamrume,” pepra, peramsi upu gekeramidi, adipapu ne upu peramsitopu, ne amutara pelpu dopra kurami.
Yuk mutu nesala, nimi bo nengdi, ne damai yana, ‘Derepkamser do? Wenepkamser do? Ware upu pepkamser do?’ tenena tep, ne tep kware weik kupupa, sun nong yuma moropsemnapu kurami.
46 Tonda, nun cap, yuk mutu neng cap, podan taruda, sundi, ‘Uo, ware kuptepe do, gume?’ tenen, kware weik kupupa, sun dipru buluksangnapu kuramu.
Sunda, ‘Angebodi poptapserur’ tenen, kware weik kupupa, ‘Yuk mutu nengdi yana, men yana popkamsengai’ tenen, lyom gel wiamidi kurami ati neitamai di tapra, ne damai yanopda, sun nong moropsemnapu kurami.
47 Allah Yahwehdi, pio telep kupra meliamneua tep nengeda, nedi er tep, “Allah Yahwehda pio tep gam kunkamre ngebodi, ne tep melipra kalengnerur ngebo tep nengeda, “Kanda pio teleppu kurume!” pepra, er sipu eremkamepe. Tonda, Allahda, ila mutu bungne gel utopu ngebo kunerure. Ada, er damai bena inipra kunyopda, yu nengdi men popnetenga tepa.
Tonda, ne ikin keca kunerur taru yumada, kan Allah dipapu, ne tep lyemdoneruma cadi, nundi kan si tep, pio ila di eremnapu kunkamepe!
48 Yuk-yuk mutu nengdi, ne tep, ‘Angebo popkamep’ tenen, ne damai poryakarami dinin, Allah er puto deiki di, anesala yumada, popudi, sun mutu tupa gam kurami nesala dopra, ne amutara deipupa, neda sun nimi deiyo ngebo kepsidi, nedi, ‘Ukupkamrume,’ pepra peramsi upuda, sundi kwar cap, ali cap dangamidi, adipapu aupu gekenapu kurami.
49 Tonda, ne tep, ‘Angebo popkamepe’ tenen, ne damai poryakarami nesala yumada, Allah dipapu, ne tep melipra lyepropneue.
Teka sun yuk-yuk mutu nengdi, ‘Angebo Daudda, erdi peserur upuda, pio men gekenkamepe’ tenen, balila deipra, tekrapidi yanitamamnei dinin, Allah kandi ne dopra, sun deiki tara erepra deipnemuma cadi, neda sun deiyo ngebo kuramsi.
Tonda, sun yu weik nengdi, ‘Angebo Daudda, nundi poptapkamep’ tenen, ne damai yana, ‘Popkup’ tenen, pirirpeteramnei nesala yuma tep nengeda, kanda Allah dipapu, anesala yuma popmumdi, ne tep melipra lyemamnemume.
50 Ange-ange yumada, kanda Allah Yahweh dipapu, ne tep melipra lyemdoramnemuma tep nengeda, sun yuk-yuk mutu nesala yumadi gekenkamengaida, nedi kanda Yahweh tep, ila di kan si eremkamkene. Ukupnyopda, sun yumadi gekenkamenge.
Tonda, mazmur upu mut deiki di, “Allah kanda pio teleppu kurume,” pepra, kan si cap, kan cap tep, pio si eremkamkene.
51 Allah kan dipapu ne wepra, ereipnemuma deiki di, neda nimi deiyo ngebo Raja kepra, Israel nesala taleramsidi, yuk-yuk mutu nimi deiyo neng ton, weika di popra gawal dangamsi.
Tonda, kanda Allahdi, ne Daud tep, ‘Israel nesala talepredi, sun nimi deiyo ngebo Raja kunkamre,’ tenen, petenkemna tep nengeda, ne wepra ereipnemumdi, ne giso deiki minyak zaitun me gwepra ne giso deiki likeipnemume.
Ataru di dipra, daneitam taru yumada, kandi ne tep, ila di bicau teneramnemumdi, “Ukupkamkene, ukupne dingeda, pio teleppu kemdinkamkene,” pepra, pedina upu deiki di peiamnemumnge yumada, pio men tamnerume. Tupa-tupa, melimnapu kunerume.
Ada ne Daud cap, tonda nedi deipnepa, dadeipdanen, bankameng nesala yuma, sun kankan di kunkameng neng tep, ange utopu kunkamrume.
Dauddi aupu yuma upepra seku.