Psa 19 | XteSC | STEP | Allah kandi ketekepra deipmumpa, im neitamai kure keca yumada, tuai nesala epmengedi, kan pio telep kumemnge cap, ila dirine kumemnge cap tep, kael kepmengedi, kan sipu eremkenunge. Nimidi, im cap, im neitamai kure keca yuma cap, epmenga deiki di, ‘Uo, Allahdi pio telep kupra mambul pel dorure. Erda pio teleppu kuredi, er puto di pel dorurnge yumada pio teleppu kurure,’ tenen, betapra kael kemnunge.

Psalms 19

Daud mut deiki di, “Nimidi Allah ketekepra deipu keca dingedi, er sipu eremnunge,” pepu upu

1 Allah kandi ketekepra deipmumpa, im neitamai kure keca yumada, tuai nesala epmengedi, kan pio telep kumemnge cap, ila dirine kumemnge cap tep, kael kepmengedi, kan sipu eremkenunge. Nimidi, im cap, im neitamai kure keca yuma cap, epmenga deiki di, ‘Uo, Allahdi pio telep kupra mambul pel dorure. Erda pio teleppu kuredi, er puto di pel dorurnge yumada pio teleppu kurure,’ tenen, betapra kael kemnunge.
2 Tonda, Allah kandi im cap, im neitamai kurur keca yuma cap, ketekepra deipmumnge yumada, urasin pio telep kurya deiki di, Allah er pio telep kurenge yumada, lap peserure. Ada nimi upu deiki di peramengtopu men pesenung dinin, akeca yuma urasin dipepa, adeiki dipapu lap peserure. Ange utopu, lukunda taru yuma peda, nimidi im neitamai kure keca epmengedi, moupra tenepmenga deiki di, ‘Uo, Allahda tek sisi ila mambul ngebo kurure’ tenen, kael kemnunge.
3 Ada nimi peramengtopu men peserur dinin, akeca urasin deiki dipapu lap peserure. Tonda, nimi upu cap, yuk lelim cap di, men peserur dinin, mutu ban-ban yuma neitamai kunge nesala yuma, im neitamai kure keca urasin epmenga deiki di, Allah er telep kure ngeda, betapra kael kemnunge.
4 Keteng cap, war cap, kuru cap yumada, nimi upu perameng utopu pepra, men lap pesenunge. Tonda, tuai nesaladi upu penungada men gekenup dinin, mutu ban-ban yuma kunge nesaladi, im neitamai kure keca yuma epmenga deiki di, ‘Uo, Allah er pio telep kure ngeda, ake’ tenen, betapra kael kemnunge. Mutu sirik, im sirik kunge nesala yuma peda, im neitamai kure keca yuma dinunga cadi, adeiki di Allah er kure keca ton, sun yuma kael kemnunge.
5 Allahdi ketengda ketekepra im neitamai deipupa, pio akurure. Ukupmantoda, ner kapul dopkamre ngebo, aner men dopmare taru di, telep kwirya cap, pio telep opkal cap, kenekredi yakarepa, er kayapu nengdi diramengtopu, bereng donongne taru keteng belepredi yakarepa, dirin weik kurure. Tonda, nimi sepdara bana ila kael ngebodi, ‘Sepdara puto di benkun ja’ tenen, kange deipra ketemdiramretopu, ipna taru keteng belepra tengyaredi, keteng komuni neitamai yuma puto di embarure.
6 Keteng ipna taruda, keteng yakan taru di belepra tekredi, komuni neitamaida, bisi embanmaryane, sintarada ormutu sirik tara dangbarure. Ukurura cadi, er embarur taru yumada, mutu ban-ban yuma kure kecada, er bupu dipapu kemkarerure. Tenpu keca peda iniptupa, keteng dirine cap, bupu cap men bepkamre. Ada men kupmanto. Tuai mutu kure keca yuma keteng dirine bemrure.
7 Allah er si Yahwehdi, “Ange kunkamrume, angeda pio men kunkamrume,” peipseu upu yumada, pio teleppu kurure. Aupu moupra gekepmepyopda, nun kange cap, dipru cap gam kemdiserure. Ikin kusere taruda, dipru kwa dimserure. Allah Yahwehdi nimi tep, “Telep kun bisi ake,” pepra deiamseu upu yumada, pio dumsisi upu kurura tep nundi, ‘Aupuda, tek do, telel do?’ tenen, kange men bongtonkamsere.
Allahdi aupu peramutopu, nong tek sisi kupbankamra cadi, aupu yumada, moupra teka teneptepe. Walwal neng peda, Allahdi apeiamseu upu, pio moupra gekepmengedi, talepmengopda, sun kael kepbangedi, amenda taru sun peda kael nesala kunkamenge.
8 Allah Yahwehdi, ‘Ukunkamrume,’ peiamseu upu yumada, dumsisi kuna tep peiamseu. Apeipseu ngeda, tek sisi ange moupra gekepmepyopda, nun dipru neitamai di, ila kange derinkamepe. Allah Yahwehdi, “Ukunkamrume, angeda pio men kunkamrume,” pepra deiamseu upuda, dirine kemdina deiyo keca kurura cadi, aupu moupra teka tenepmepyopda, nun dipru neitamai, dirin kemdinkamsere. Tonda, akeca-keca yuma epmepedi, ‘Telepnge ake, malinge ake’ tenen, telep kupra kael kemkamepe.
9 Nimidi nun nai Allah Yahweh tep, ‘Erda ila mambul ngebo’ tenen, kwar kuser ngeda, pio ila telep kurure. Angeda, pio tep akunkamsere. Allah Yahwehdi, “Ukunkamrume, angeda pio men kunkamrume,” peiamseu upu yumada, dumsisi upupu kurure. Aupu neitamaida, mali kun keca tenpu peda men kurure. Allah Yahwehdi peseretopu, tek sisi nong kupkamre.
10 Allahdi peiamseu upu yumada, kunumna weik keca, emas pio urasin telepnge utopu gume. Nimidi, ‘Uo emasda ila mambul kunumna weik keca,’ tenenung dinin, tek sisi emasda yambul mambulpu kurure. Allah er pesere upuda, ila mambul weik kurure.
Tonda nimidi mong mokon jepmengedi, “Uo, akecada tau weik peserure. Angeda pio telepe,” perameng dinin, ange peda yambul telepe pua. Allahdi pesere upuda, ila telep kurure. Tonda, mong mokon mouamreai askal di me dopra, jeramenge ngeda, telep peramre dinin, ange peda yambul telep pua. Allah er upuda, ila telep kurure. Mong mokonda, yambul telep pua.
11 ‘Mankau di mali kupnup’ tenen, Allah upu moupra gekepmepedi, ‘Malinge ake, telepnge ake’ tenen, betapra kael kepmepedi, mali kun keca tapmepedi, dumsisi kun kecapu talepra kunkamepe. Ada, Allahdi pesere upu yuma, gekepra pio taleamre ngeboda, Allahdi angebo tep, ila maton keca kareprepa dopropkamre. Tonda, Allah er upupu moupra taleredi, dumsisipu kure ngeboda, er kun keca yumada, teleppu kupbankamre.
12 Ware ngebodi, ‘Ne mali kunun kecada, ake’ tenen, moupra kael keptu do? Gume nun pedipapu men kuptepe. Atep, ‘Uo, nun nai Allah, ne dipru neitamai mali kunerur keca tep, kaukepnetumdi, amalinge yuma daepnetume’ tenen, moropkene. Ne dipru neitamai mali kunere keca men eptenya cadi, ‘Mankau di mali kupnepa, kan dipapu kaukemkamnerum’ tenen, moropkene naio.
13 Tonda ne nai Allah, kan amutara kunedi, kan pelpu donun dinin, ne dipru neitamaida, mali keca tupa kunerya deiki di, ‘Mali kun keca, ake,’ tenepne dinin, ‘Tali lupra mali kupnun’ tenen, nai kandi melimnememnya deiki di, mali men kunkamne. Ne dipru neitamai mali kudinere keca di, ‘Bisbisa kapnerepa, mali kupnun,’ tenena tep, moropkene naio. Kan puto karepnememdi, melimnememnya deiki di, ila mali kun keca men kupnedi, dumsisipu kunkamne. Atep, ‘Allah kandi melipra lyepropkamnerem’ tenen, moropkene naio.
14 Tonda, ne moropken ngeda ake. ‘Ne nai Allah nedi penkamne upu cap, ne dipru neitamai di tenenkamne keca yuma cap, dumsisipu kuptupa, kandi ne tep kange deipnetuma’ tenen, moropkene. 15 Ne nai Allah Yahweh, kandi ne tep melipra kalengnerume. Ware ila ikin keca do yala-yala yuma, ‘Ne damai yana ikin kupnerur’ tenen, kan damai yakanune. ‘Nimi yuk nengdi popsenung’ tenen, ila mutu yangne gil iriamu tara inipra baramengtopu, ‘Allahdi lyepropkamner’ tenen, kan damai sepdara yakakenune. Ne nai Allah, kanda ne mali kun keca kan-kan di wilipra, Lyemdoneruma Deiyo Ngebo kuruma tep pepkene. Raja Dauddi pepu.