Psa 2 | XteSC | STEP | Ware keca deiyo tep, nimi yala-yala yuma, tuai mutu ban-ban yuma talepra kunge neng yumadi, ‘Allahda, nun songe,’ tenepra, tali pelpu donung do? Tonda, amutu-amutu talepra kunge nengdi tenepra kunge keca yumada, tali-talipu kupra kununge.

Psalms 2

Allahdi nimi deiyo ngebo kemna tep wepra deipu upu

1 Ware keca deiyo tep, nimi yala-yala yuma, tuai mutu ban-ban yuma talepra kunge neng yumadi, ‘Allahda, nun songe,’ tenepra, tali pelpu donung do? Tonda, amutu-amutu talepra kunge nengdi tenepra kunge keca yumada, tali-talipu kupra kununge.
2 Angeda, sun nimi deiyo talepra kunung neng cap, tonda ila-ila neng yuma cap, bulupra wekmengedi, Allah Yahweh cap, ‘Tuai nesala lyepkamre’ tenen, wepra deipu ngebo cap tep, ‘Sun si yanipkamep’ tenen, upu talenunge.
3 Tonda, tuai mutu-mutu yuma talepra kunge nengdi, ‘Allah cap, erdi wepra deipu ngebo cap, sundi peserenge upuda, nun songe. Aupuda, ateng koudongomna utopu kurserura tep, loptapkupe,’ tenenunge. Tonda, sundi, “Nun adipapu tapmepedi, nun pe tenepmepe kecapu kunkamepe,” penunge.
4 Upengepa, Allahda, akeca-keca yuma taleredi, ila puto weik ngebo kurura cadi, erda, er im deiki ila bungna telep keca deiki bungrur ngebo gekepredi, autuserure. Tonda atenepra penung ngeda, ‘Tali upu penmanga cadi dakwapye,’ tenen, kaukemtamrure.
5 Atep ukupredi, Allah er yu keca, sun nong deiki deipkamre. Ukupre pangeda, sun kware kurepa, lukdankamenge. Deiyoda, Allah er yu sun anesala deiki deiprepa, kware weik kuprepa, sun nongeda berber pepkamenge.
6 Allah er si Yahwehdi upepkamre. “Sion ^{▼▼Sion – Pumun taruda, ati arum weik domipa, sun ila nimi deiyo ngebo er si Raja Daud amutu neitamai kuramu. Amutu sida, Sion perami. Ukutaruda, amutupu dinin, amutu sida, kota Yerusalem, angepu penupe.} mutu pio telepai lengnapu kure mutu neitamaida, nedi wepra deiamsi ngebo amutu deipne. Ada, ‘Amutu neitamaida, ne si pio eremkamneng’ tenen, Yerusalem mutu neitamai deipne. ‘Angeboda, tuai mutu ban-ban yuma kunge nesala sun ila nimi deiyo ngebo, Raja kunkamre’ tenen, wepra deipsi.” Allahdi pepu.
7 Aila nimi deiyo ngebodi upepkamre.
Allah Yahwehdi, ne tep upepneu upuda penkune. Allah Yahwehdi pepne. “Kanda ne mi sisa kurume. Ne Allahda, kan nai bo sisa ne kunune,” pepra, wepra deipneue.
8 Kandi ne tep moropkunurume. Moropnemem pangeda, mutu-mutu yuma cap, amutu neitamai kunge nesala yuma capda, nedi kan tep karepkenepa, talepra kunkamreme. Karepkene pangeda, mutu sirik im sirik ayuma, kan dipapu talenkamreme.
9 Ukupmemyopda, kandi pio gat keca besinge deiki di, sun kunge keca yuma popmempa yawa popkamre. Kandi tu telepra ketekemdirameng mau, olongtamameng utopu kuprapmemdi, sun mali kunge nesala wenepra poptapkamreme.
10 Ne Allahdi wepra deipsi ila nimi deiyo ngebodi, ukupkamra tep, ‘Uo, ne kayapu tuai talepra kumum nimi deiyo neng yumada, nun ton wenepra popserur’ tenen, apepmasen upu gekepmumdi, moupra kunkamrume. Tonda, sun ila deiyo neng yumada, ‘Allahdi wenepserur’ tenen, konum lap pepsena cadi, moupra kunkamrume.
11 Ukupmumnyopda, Allah upu gekepra kumumdi, Allah er si Yahweh tep kware tenepra, er amutara kumumdi, er pelpu donkamrume. ‘Allahdi wenepserur’ tenen, ila kware kuserepapu kumumdi, sun nai bo Allah tep, kange derinkamrume.
12 Ange utopu, sundi Allah er Mi Sisa tep, “Nun nai,” pepra, er amutara kumumdi, er damai moropsepra yana genedongonkamrume. Ukunkamruma deiyoda, ‘Allah er si Yahwehdi wenepra men popkamser’ tenen, kunkamrume.
Tonda, ‘Mankau di Allah er yu, nun deiki deipsurur’ tenen, moupra kunkamrume. ‘Allah er Mi Sisadi, lyepkamser’ tenen, er damai kunge nesala yumada, sun kunkameng keca yumada, teleppu kunkamre.