Psa 20 | XteSC | STEP | Nimi deiyo ngebo Raja Dauddi seku Mazmur upu mut. Ada, Allah upu mut pena deiyo ngebo karena tep, sekra karepu.

Psalms 20

Nimi deiyo ngebo Rajadi, Allah tep moropu upu

1 Nimi deiyo ngebo Raja Dauddi seku Mazmur upu mut. Ada, Allah upu mut pena deiyo ngebo karena tep, sekra karepu.
2 Sun yuma ikin kupsere taru yumada, ‘Allah Yahweh epseredi, yana melimkamser’ tenen, ne Raja Dauddi Allah tep moronune.
Nun co puna ngebo Yakub, menop taru si eremamu Allahda, erdi sun tep pio kalekra melimseredi, lyemdonkamser’ tenen, moropne.
Ukupmantoda, Allahdi, ‘Pio teleppu kunkameng’ tenen, ‘Sun yuma dopra, ila mutu dup deiki deipsetu’ tenena tep upepra moropne.
3 Tonda, ‘Allahdi er si eremna ati pumbon dinin, Pio Telep Lengna Ati pumbon di, er puto deiki di, melimkamser’ tenen, moronune. Ange utopu, ‘Er kurur mutu, Sion mutu di, er puto dokotepsetudi, adeiki di melimkamser’ tenen, moronune.
4 Tonda, nun nai bo Allah, er gispal dona tep, sundi gam keca popra, er tep kareamrumdi, uku dongoramrum keca yumada, ‘Allahdi tupa teneredi, kange derinkamser’ tenen, moronune.
Teka, sun mali kun keca daepra kaukemna tep, sundi gam keca popra, er tep kareamrumdi, uku dongoramrum keca yumada, ‘Allahdi tupa teneredi, kange derinkamser’ tenen, moronune.
5 Tonda, ‘Allahdi sun dipru neitamai ila di putasere keca, adipapu karenkamser’ tenen, Allah morosenune.
Angetopu, sundi, ‘Ukunkamepe, apel ton doptepe,’ tenen, putapserepa, upu talerum keca yumada, ‘Allahdi melipserya deiki di karepkamser’ tenen, Allah morosenune.
6 Allahdi sun tep konum melipra lyepseryopda, ‘Nun yumadi, kange deipmepedi, ila upu di, ‘Telepe,’ peptepe’ tenen, Allah moronune.
Tonda, nun nai bo Allah er si eremna cap, gispal dona cap tep, ila lyom opkal, er si spanduk dopra ange deiki er si sekmepedi, aopkal erepra ikmepepa, nimi yumadi epkamenge.
Allah Yahwehdi, sundi er tep moronkamrum keca yumada, ‘Adipapu karenkamser’ tenen, Allah tep morosenune.
7 Ukuda, ne konum kael kepsi. Allahdi, ‘Angeboda nimi deiyo kepredi, ne nyapu sisa, Israel yala nesala yumada, talepredi, sun Raja ngebo kunkamre’ tenen, wepra deipneua tep, tek sisi melipneredi, pio lyemdonkamnere.
Allahda, im deiki di, Pio Telep Lengnai di, ne moronun keca gekepneredi, melimkamnere. Allah, er ila puto dumsisi buru deiki melimkamnera deiki di, ne pona tep yu neng yuma, popra gawal dangkamne ja!
8 Ton tali neng dingeda, sun nimi pona tep, tu deiki embaramre keca, er si kereta perang tep, ‘Ange di, lyepdatepye’ tenen, ila di kange derinunge. Ton neng dingeda, sun kuda bisam tep, ‘Ange di, lyepdatepye’ tenen, ila di kange derinunge. Sun ato nengda, ‘Akeca di, lyepdatepedi, nundi yuk neng yuma tep, poptepedi, gawal daktepe,’ tenenunge.
Dinino, nun Israel yala nesaladi, ange utopu men tenenupe. Nunda, nun nai bo Allah Yahweh, er cap, er si cap tep, ila di kange derinupe. Erdi melimserya deiki dipapu, nun pona tep neng popra gawal dangkamep ja!
9 Nun pona tep nengda, nundi popmepepa, sun anengda duk peprepa, saka tu deiki dourbankamenge.
Dinino, nun Israel yala nengda, popsetenga peda, kange di tamupra bukropedi, tengdongonkamepe.
10 Atep nun nai Allah Yahweh, kandi wepra deipnemum nimi deiyo ngebo, ne Raja tep, melipnememnya deiki di, ‘Nun pona tep nesala yuma poptepedi, gawal dangkamep’ tenen, moropkene ne nai Allah!
Atep nengeda, nundi kan Allah tep, ‘Naio melipseo!’ pepra moropkepe taru yumada, ‘Gekepsememdi, melipra lyemdonkamserum’ tenen, moropkepe, nun nai Allah.