Psa 21 | XteSC | STEP | Nimi deiyo ngebo, Raja Dauddi aupu Mazmur mut pena deiki di seku. Allah upu mut pena deiyo ngebo karepkamnga tep seku.

Psalms 21

Nimi deiyo ngebo Rajadi, er pona tep neng konum popudi mut pepu upu

1 Nimi deiyo ngebo, Raja Dauddi aupu Mazmur mut pena deiki di seku. Allah upu mut pena deiyo ngebo karepkamnga tep seku.
2 Nimi deiyo ngebo Rajadi, ‘Allahdi er puto karenerura tep, ne kange derinune,’ perure. Allahdi nimi deiyo ngebo Raja tep, weika di melimrura cadi, Raja ngebodi ila kange deipra kurure.
3 Nimi deiyo ngebo Rajada, er kange dipru neitamai, ila di putarur kecada, ne nai bo Allah kandi konum karerume.
Tonda, Raja ngebodi, ‘Ne nai Allah melipnememdi, akeca ton karepnerume,’ pepra, mororur keca yumada, men tamrume. Adipapu karenapu kurume. Utopu tonda, ‘Gume,’ men perumdi, er mororurtopu karerume.
4 Angeda tali tep men pepne. Kan Allahdi, aRaja ngebo damai yana antapmemnyopda, pio telep keca dopra, weika di tupa-tupa kareruma tep pepne.
Ukupmem dingeda, ‘Angeboda, Raja akurure’ tenen, lape pena tep petenkemna keca, er si mahkota, kunumna weik keca, er si emas di ketekeipi topi, animi deiyo ngebo, er giso deiki konum deipmume.
5 Nimi deiyo ngebo Rajadi, “Ne nai bo kan Allah tep, ne keteng tamun weik ton cap gam tupa kutene’ tenen, moropkene,” pepra moroputopu, kandi Raja tep konum go ton cap karepmume. Ange tep nengeda, animi deiyo ngebo Rajada, pio gam kunkamre ja.
6 Allah kan puto di tupa melipra lyemneruma deiki di, yuk nesala yumadi, ne tep, gispal donengedi, “Kanda pio telep, ila mambul ngebo kurume,” pepra, gispal donenunge.
Allah kandi ne tep, pio telep konum kweipnemuma cadi, ange tep nengeda, yuk neng epnengedi, ne tep, “Uo, aRajada, pio teleppu kurure. Er urasin peda, pio telep ngebopu kurure,” penkamnenge.
7 Allah kandi, ne Raja tep, pio teleppu kemdineruma cadi, dorkunkamre taru peda, pio teleppu kunkamne ja. Tonda, kanda Allahdi ne damai yana, kikiman kunuma cadi, neda ila kange deipra kunune.
8 Angeda tali tep guma. Deiyoda, ne Rajada ‘Allah dipapu melimkamner’ tenen, kan Allah Yahweh tep, pio teka tenekenedi, ne kange dipru yuma kan deikipu derikenune. Allah ^{▼▼Allah – Acada, Ibrani upu deiki di, Allah er si tep, ‘Allah Elyon’ pepra seki. Aupu deiyoda, sun kael kemna tep, angeda konum jenek kupra sekmepu.} kanda akeca-keca yuma talepra, pio deiki tara kurumdi, Ila Puto Eremna Ngebo kurume.
Tonda, Allah kandi nun tep, “Sunda, pio bicau tenesenedi, pio teleppu kudinkamsene,” pepra, pedina upu deiki di konum peipsemuma cadi, ikin kupserya peda, kware kuna cap, kange tenimtona cap, pio men kunkamne.
9 Atep, kan Allahdi, nun pona tep neng yuma, epetepmemdi, kael kepmemnyopda, kan puto deiki di aneng popra gawal dangkamrume.
Ange utopu, kanda Allah tep, ‘Nun songe, er tep nun dabale’ tenen, yanikenung nesala yumada, kan puto weik dumsisi buru deiki di, sun aneng yumada, adipapu wenepra poptapkamrume.
10 Kan tep, ‘Nun pio songe,’ tenekenung nengda, kandi aneng dopra, ila uku bu jeredi bupu kurura neitamai donokmem pangeda, uku di aneng yuma jepropkamre ja! Allah, kandi katuai di tuai mutu neitamai jenek kupra yankamrem taruda, kanda Allah Yahwehdi, ila yu kupkerya deiki di, amali kun nesala yuma popra, sikke buktapkamrume.
Tonda, ila uku jeredi, bupu kurur ngeda, sun aneng deiki dokotepmempa, auku di, amali kun nesala yuma jepropkamre!
11 Sun mali kun kecapu talepra, mali-mali kunge nesala pe, sundi deipmengepa, dadeipdanen, bankameng nesala peda, wenepra popnedi, gum kupra deipmemnyopda, tuai mutu neitamaida, ton cap pio men dinkamepe.
Ada, sundi derinkameng nyapu yumada, tuai mutu ban-ban yuma kunkameng nesala kankan, neitamai, tenpunge peda, pio tupa gam men kunkamenge. Sun yuma gum kupra deipkamrume.
12 Mali kunung nengdi, ‘Ware kuptepepa, Allah cap, erdi wepra deiamu Raja cap tep, yanipra bisbisa kaptepe do?’ tenen, upu sisingmenge taru yumada, sun mali kunung nengdi, ‘Mok upu pepmepya deiki di, Allahdi wepra deiamu Raja ngebo cap, Allahdi pel dorur keca cap tep, yanipra bisbisa kaptepe’ tenen, upu talenkameng nge peda, angeda nong men kupkamre.
13 Deiyoda, kan Allahdi, aneng sun tep enepra donokamruma tepa! Kan Allahdi, sun mali kunung neng tep, wenepra poptapkamrume. Ukupmanto ngeda, kan mar cap, jen cap di, sun mali kunge nesala yuma tep, adipapu popra gawal dakamrema tepa.
14 Atep nengeda, nun nai bo Allah Yahweh, kanda ila puto weik ngebo kuruma cadi, nundi kan tep, ila di gispal dopkepedi, “Allah Yahwehda, pio puto weik ngebo kurure,” pepra, kan sipu eremkamepe.
Ange utopu, kan ila puto kukerura cadi, nundi, kange pingpinga deiki di mut pepedi, “Nun nai bo Allahda, pio teleppu kurure. Er putoda weike ila di kurure!” pepra, kan sipu eremkamkepe.