Psa 22 | XteSC | STEP | Uo, ne nai Allah, ne nai Allah, warya tep tapmanerem do? Nedi pio mali kange doupra, kan tepapu ne dipru neitamai di, ‘Melipkamner ja’ tenen, moronapu kukenune. Ukupra tenepra morokenun dinin, kandi ne tara men diryanmanereme. Tonda, kandi ne tep men melipmanereme. Karenai utopu kunmarume.

Psalms 22

Raja Daud kange mun kange doupudi, Allah tep moropudi, mut pepu upu

1 Uo, ne nai Allah, ne nai Allah, warya tep tapmanerem do? Nedi pio mali kange doupra, kan tepapu ne dipru neitamai di, ‘Melipkamner ja’ tenen, moronapu kukenune.
Ukupra tenepra morokenun dinin, kandi ne tara men diryanmanereme. Tonda, kandi ne tep men melipmanereme. Karenai utopu kunmarume.
2 Ne nai Allah, keteng komuni taru yuma, nedi kan tep ila di mali penmane. Dinino, kandi upu ton tamupra men pepmaneremdi, dimpepnapu kupmanereme.
Atep lukunda taru peda, mambul kange doupra, nedi kan tep tupa-tupa morokenune. Tonda ne kange telep men kunmanerpa, mali kange doupra, moronapu kukenune.
3 Dinino, ne kaele, kanda nun ila nimi deiyo ngebo kusememdi, mali kun keca tenpunge peda pio men kukerure. Kanda, pio lengnapu ngebo kuruma tep, Israel nesala yala-yala yumadi kan tep, mut pepra si eremkengedi, gispal dokenupe.
4 Tonda, nun apu yapu yumadi, kan tepapu, ‘Erda tek sisi akurure. Nun nai bo Allahdi tek sisi melimkamse ja’ tenen, sun kange kan deikipu deriramkeidi, kan si eremamkei.
Ukuramkei taruda, kandi sun damai kuramumdi, sun tep melipra lyemamsemume. Kandi nun apu yapu men tamamsemuma cadi, sundi, ‘Uo, warya tep tamserur do?’ tenen, mali kange doupra men kurami.
5 Sundi Allah kan tep, “Uo nun nai Allah, lyepropserume,” pepra mororamkei ngeda, gekepra melimamume. Tonda, sundi kan tep teka teneamkeipa, sun mororaminge gekepra lyepramume. Atep sun ton mali kange men douramidi, telep kangepu doupra kurami. Kan tep ali men dangami.
6 Dinino, neda nimi gume. Neda pio mali ngebo cadi, kwali utopu ngebo kunune. Ukununa tep, yuk neng yumadi ne tep, “Erda mali kun ngebo,” pepra, yap-yap pepra nalemnengedi autunenunge. Yuk nesala yumadi ne tep, ‘Angebo nun songe,’ tenenenunge.
7 Tonda, nimi yumadi, ne kune keca tep diningedi, autupra nalemnenunge. Utopu sundi sipyal pumbon mur-murumdangedi, ‘Erda tali ngebo’ tenen, giso gong-gong penenunge. Tonda, ne tep mali upu weik penenunge.
8 Yuk nesaladi upenenunge. “Nundi er tep kaukepra tapmepepa ware kupra kunkamre do? Angebodi, ‘Allah Yahweh ^{▼▼Yahweh – Allah er si, tek sisi ngeda, Yahweh kurure. Ibrani upu penge nesaladi, ‘Allah er si sisada, katuai men peptepe’ tenen, kware kununga cadi, sundi huruf YHWH angepu sengnunge. Dinino, ‘Ahurufpu sekmepyopda, aupu penada iriwarye kupsurur’ tenen, nundi, ‘Yahweh’ sengnupe. Indonesia Alkitab neitamaida, Allah er si Yahweh kwamngaida, ‘TUHAN’ sengnunge. Aupu kael kemna tep, lap pena upu nomor 49 dirume.} er dipapu lyepkamnere’ tenen, teka tenerura cadi, Allah er sipu eremrure.
Ukurura tep nengeda, Allah Yahwehdi er tep, kange deipra lyepropkamemer do, gum do? Erda Allah tep teka tenerur ngebo cadi, nunda dinapu kunkamepe,” upepra nalemnenunge.
9 Sun teka tenena gum nesaladi, upenenun dinino, ne nai Allah ne kaele. Teka, ne nai Allah kandi ne nin mumun douamneu taru, meliamnemumpa deiamneue. Tonda, kandi nanin meliamumpa, erdi ne tep moum jeramsi taru di dipra, dukdongopra telep kupra kalengamneupa, telep dipapu nepbaramsi.
10 Ne nin mundu douamneu taru di dipra, dukdongopra meliamnemume. Atep ne deipneupa nepsi taru peda, ne kun keca yuma kan deiki dipapu kuramsidi, tupa kunkamna tep, kanda ne deiyo ngebo Allah kurume. Nedi kan sipu pio eremkamkene.
11 Atep nengeda, ne nai Allah kandi men tamkamnerume. Neda pio mali kun keca kan-kan kununa cadi, amali kun keca ne damai yarepa, ikin kange doupra kunkamne taru yumada, yuk nengdi ton pio men yana melimkamnenge. Atep ne naie, ‘Ne damaipu kunkamre’ tenen, morokenune.
12 Ukupmantoda, Basan mutu di ila bura sapi bisam gemnge, giso takke beleleamrenge yuma yakangedi, yana warengamengtopu, ne podan neng gung weika di yana, ‘Angebo popkup’ tenen, ongopgenepra warengnenunge.
13 Tonda, ukupmantoda, ila pus utopu keca, bura tara pio yu kurenge, er sida singa pusdi, er jen keca popra jepkurya tep, si bana aktapra yakaramretopu kupra, ne podan nesaladi, ne pona tep, sundi ne damai yangedi warengnenunge.
14 Ukupra yana wareknenge pangeda, ne putoda gum kupbanerure. Ukupmantoda, me gweipmengedi, diktapmengepa embaredi gum kuramretopu, ne puto gum kupbanmanere. Ukupra kunerura deiki di, ne yo berber penerure.
Tonda ne dipru neitamaida, kware weik kunerura cadi, uku bupu di lilin me belengamretopu kunerure. Atep, kware weik kunerura cadi, pio mali kange doupra kunune.
15 Tonda, kerah tu dopra ketengai deiptapmengepa, keteng bupu di gelal semamretopu, ne putoda konum gum kupnere. Ne gekrumda sima jerkotemna gum kupneredi, gelal senerura tep, gat keca utopu kunerure.
Adeiki di ne lyemuda, gelal sepnerepa, upu men pepmanto kunune. Ukune taruda, ne nai Allah kandi kaukepnemempa, depmenge neng but deiki maramengtopu kunune.
16 Ne damai pio mali kun keca talepra kunge neng, yu weik nengdi bura tara yu kam utopu kupra yangedi, ne tep yana wareng yakanenunge. Ukupnengedi, ne yane cap, buru cap yana lungdongomnenunge.
17 Ukunenunga tep, ne jen keca men kirbetene. Jen keca men jenuna cadi, bol mali kupnerepa, ne yo yumada konum katuai kunerepa nuktene. Neda pio bol mali doununa cadi, yuk nengdi, ‘Uo’ tenen, dininunge.
Tonda, ne podan neng yuma, ne damai yana diningedi, ‘E, walito ikin kurure’ tenen, mali upu pepra dinapu kunenunge.
18 Tonda ne opkalda, sundi bokra doronunge. Ada, sundi doropkunge taruda, esu pen keca deiki di, ‘Ange doropkamap do?’ tenen, kupetepmengedi atenepmangetopu kuprepa dororamenge. Ange utopu kupmengedi, ne opkalda upula doronenunge.
19 Sun yu nengdi, ukupkamneng dinino, ne nai Allah Yahweh kandi ne tep tapnememdi, karenai utopu men kunkamrume. Tek sisi kanda ne Puto Kemdina Deiyo Ngebo kuneruma cadi, ‘Kandi menmena yan melipkamnerum’ tenen, moropkene. Ne nai Allah, kan dipapu puto kemdinkamnerume.
20 Nimi pon neng parang ya doupmengedi, ne damai yana popmanto kunenung nge cap, tonda yu kamdi popmanto kunerur nge cap yumada, ‘Kandi lyepropkamnerume’ tenen, moropkene.
21 Tonda, pus utopu keca, er sida singa pus ila yunge sipyal pumbon wekmanto kunun ngeda, kandi lyepropkamnerume. Tonda, bura tara kure sapi bisam, giso takke beleamrengedi yan popmanto kunenge ngeda, kandi lyepropnerume.
22 Ne nai Allah, kandi lyepropnememnyopda, ne tamna neng yan bulupra, kan si eremna tep yan wekmenge taru dipapu, nedi Allah kan si pio eremkamkene.
Kan si eremna tep, nimi yuma bulupmenge taruda, kandi lyepkamnerumnge yumada, sun gekena tep lap penkamne. Ukupne dingeda, kan sipu eremkamkepe.
23 Atep nengeda, Allah Yahweh er tep teka tenepedi, er tep kware kunup nesala yumadi, er sipu eremkamepe. Tonda, nun apu bo Yakubdi deipupa, dadeipdanen yakanup neng yumada, Allah er sipu erepra gispal donkamepe. Ange utopu, nun Israel yala nesala yumadi, nun nai bo Allah tep, “Erda ila mambule,” pepra, er sipu erepra gispal donkamepe.
24 Ada tali tep men pepsene. Deiyoda, nimi kange mun kange doupra kunung nengdi, Allah kan tep kwar kuprepa, amutara kungedi ikin keca weik doronung nesalada, men tamrume.
Kan tep, “Uo, melipseo,” pepra moropkenge taruda, kandi nun tep kaukepra men tamserum dinin, nundi moronup keca gekepra melimseruma cadi, kan sipu eremkamkepe.
25 Allah kandi ne dipru neitamai di peamnemum keca yumada, kan nyapu bulupra wekamengai di, lap penkamne. Ada nedi, “Ne nai bo Allah tep, er si erepkamne,” pepra, pedina upu deiki di peamkesi ngeda, sun damai lap penkamne.
26 Nedi penkamne upuda ake. Ware nesala do yuma, sundi nun nai bo Allah Yahweh tep, ‘Er dipapu melimkamsere. Nun putan kecada, er dipu karenkamsere’ tenen, kan tep pio pe deipra ekenung nengda, kan si erepmengedi, gispal donkamkenge.
Ada tali tep gume. Deiyoda, nimi kankan kunge nesala, bouna di amutarapu kunung nesalada, kandi melipsemempa, ortaru jen keca jepmengepa bounkamre. Atep nengeda, Allahdi melimrur nesala yumada, er sipu pio eremengedi, kange deipra teleppu kunkamenge.
27 Tonda, dorkunkamre taruda, nimi mutu ban-ban yuma neitamai kunge nesala yumada, sun mali kun keca tapmengedi, Allah Yahweh tep ka di ton cap tenepmengedi, er damai tamupra yangedi, er gispal dona tep, gutam tu dipdongopra er sipu pio eremkamenge.
28 Ukupra kunkamengada, tali tep gume. Deiyoda, Allah er si Yahweh, ila Kwemdin Deiyo Ngebo dipapu, akeca-keca yuma cap, nesala ban-ban yuma cap, taleserure.
Ware mutu kunge nesala do yuma, Allah er dipapu sun deiki tara kuredi, ila nimi deiyo kupra taleserure.
29 Ange tep nengeda, mutu ban-ban yuma kunge nesala yumadi, Allah er damai tamupra yangedi, er gispal dona tep, gutam tu dipdongopra er sipu pio eremkamenge.
Ada ila isomka neng pe, tali amutara kupra kankan kunge nesala pe, akeca-keca men talengedi, menmena dadepkameng nesala peda, sun yumadi, Allah damai yangedi, er gispal dona tep, gutam tu dipdongopra er sipu pio eremkamenge.
30 Nundi deipmepepa, dadeipdanen bankameng nyapu peda, “Nun nai bo Allahda, akeca-keca yuma taleredi, er ila puto deiki di melipra kuramseu keca ake, ake,” pepra, lap penkamepe.
Ukupmepe pangeda, Allah kan sipu eremengedi, sun pedi ton nyapu deipmengepa, dadeipdanen kupbankameng nesala yuma peda, kan sipu eremkamkenge.
31 Dortaru kunkameng nesaladi, sundi deipkameng nyapu tep, “Nun nai bo Allahdi, pio dumsisi kupra kunupsek pen pel doramseu ngeda ake, ake,” pepra lap penkamenge.
Ukupkamenga deiki di, sundi deipmengepa, dadeipdanen bankameng nyapu yuma peda, sun yumadi Allah er sipu eremkamenge. ^{▼▼Ton Allah upu buku seki ngeda, ayat 32 ton sekra deipi dinin, tek sisi Ibrani upu deiki sekeiamseinge neitamaida, 31 ayatpu kurura cadi, nundi 31 ayatpu sekra deipmepu. Ayat nomorda, yuk-yuk kurur dinin, upu deiyo ngeda, asekmepungepu kurure.}