Psa 23 | XteSC | STEP | Allah er si Yahweh, erdi ne tep domba bisam peirameng utopu, ne tep melipra kalengnerure. Atep nengeda, ware putan keca do yuma, erdi kalekra melimnerya deiki di, ne putaneretopu, Allahdi ne tep pio karenkamnere.

Psalms 23

Raja Dauddi, Allah er si Yahweh eremna tep, mut deiki di pepu upu

1 Allah er si Yahweh, erdi ne tep domba bisam peirameng utopu, ne tep melipra kalengnerure. Atep nengeda, ware putan keca do yuma, erdi kalekra melimnerya deiki di, ne putaneretopu, Allahdi ne tep pio karenkamnere.
2 Tonda, Allah er dipapu ne tep, pio telep kupra melimnerure. Ukupmantoda, domba bisam peina deiyo nengdi, sun domba bisam doupra, mutmuta pio telep kupra bolongrurai dubena deipmengedi, kalekra dirbaramengtopu, Allahdi ne tep, ne putan keca yuma melipra karenerure.
Tonda, domba bisam peina deiyo nengdi, ‘Nun domba bisam tali kange doupra, telep me jepmengedi, kange derinkameng’ tenen, ona gum me damai dubaramengtopu, Allah er dipapu, ne doupra telepaipu dubanerepa, kware gum di telep kupra kunune.
3 Tonda, ne kange mun kange doupra kune taruda, Allahdi ne tep melimnerya deiki di, ukupu kange cap, puto cap karenerepa, kange deipra teleppu kunune.
Tonda, Allahdi, ‘Kanda dumsisipu kumempa, yuk nesala dikengedi, ne si pio eremkamnenge,’ teneredi ne tep, “Dumsisi ban bisipu benkamruma tep, atelep benkamrum bisida ake,” pepra peteremneredi, abisi deikipu dubanerure. Erdi, “Adumsisi bisipu benkurume,” pepra derinerurtopu banune.
4 Ange tep nengeda, ne podan nengdi, ne popmanto kupkamneng taruda, neda kange mun kange doupra, kunungna utopu mutu benkamne taru peda, ne ton kwar men kunkamnere. ‘Uo, ware mali keca, ne nong deiki kupnerepa, ikin kunkamne do?’ tenen, pio men tenenkamne.
Ada tali tep gume. Deiyoda, Allah kandi ne damai yana kumemdi, ne tep tupa melimnerume. Ne damai pio kikiman kurume.
Tonda ukupmantoda, domba bisam peina deiyo nengdi, sun domba tep, ‘Nun domba bisam, yuk tara, popmanto mutu benung’ tenen, balana doupmengedi, sun domba bisam nong deiki gege pepra, telep bisi neitam kemamengtopu, Allah kandi ne tep kalekra melimnerumdi, peteremnerume. Ukupra kuneruma cadi, neda kwar-kwar kuna gum di, telep kange deipra kunune.
5 Tonda, ne podan neng wekra dinmangai di, Allah kandi ne putan keca yuma, weika di karenerume. Ukupmantoda, ila kailya kalepmemya di, ne tep karenerume. Ada, ila mambul neng upupmengepa, jen keca weika di jeryakaramengtopu kunerempa, ne poda neng epmengedi, ‘Uo’ tenen, kunkamenge.
Tonda nimidi, ‘Angebo nun ila nimi deiyo kupra kunkamser’ tenen, pio telep minyak me, angebo er giso deiki dikipmengepa, angebo ila nimi deiyo ngebo Raja kuramretopu, kandi pio telep kupra keipnemempa, pio teleppu kunune. Atep nengeda, ware keca do yuma, ne putaneretopu, weika di yamupra karenemempa, ne damai yakanerepa, kange deipra teleppu kunune.
6 Pio weika di melimneruma tep, ne kaele, kanda pio teleppu kudinkamneruma cadi, pio teleppu kunkamne. Ne gam kunkamne taru neitamai yumada, kandi ne tep bicau pio tenenkamnerume.
Tonda, tamna gum dipapu, pio telep kupra melimkamnerume. Ange tep nengeda, ne tuai mutu neitamai gam kunkamne taru yuma cap, dorkunkamre taru yuma cap, telep dipapu dimpepra, Allah Yahweh kan ati damai pio kunkamne.
Raja Dauddi, mut pena deiki di aupu pepu.