Psa 24 | XteSC | STEP | Tuai mutu cap, tuai mutu neitamai kure keca cap yumada, Allah Yahweh er keca cadi, er dipapu akeca yuma talerepa dimpepra kurure. Ange utopu, mutu ban-ban yuma neitamai kunge nesala yuma peda, Allah Yahwehdi talerepa, er amutara kununge.

Psalms 24

Dauddi, Allah er si Yahweh tep, mut peprapudi er si erepu upu

1 Tuai mutu cap, tuai mutu neitamai kure keca cap yumada, Allah Yahweh er keca cadi, er dipapu akeca yuma talerepa dimpepra kurure. Ange utopu, mutu ban-ban yuma neitamai kunge nesala yuma peda, Allah Yahwehdi talerepa, er amutara kununge.
2 Angeda tali tep men pepne. Deiyoda, Allah er dipapu tuai mutu yuma dopra, ila laut mokon deiki deipupa, tuai mutu amutara mutu yangne gelda, laut mokon kauru pumbon deipupa akurure. Tuai mutu kure amutara yangne gel, laut mokon pumbon ikra deipka cadi, pio akurepa, lokrepa yukai men embenmanto kurure.
3 Ware kupra kure nesaladi, Allah Yahweh er kure mutu deiki welerbetenge do? Ware kupra kure nesaladi, Allah er Pio Telep Lengna Ati pumbon bena tektenge do?
Allah kururaida, mali keca tenpunge peda, pio men kure mutu kurura cadi, tali nesaladi akati damai tali lupra men betenge.
4 Allah er damai benmanto nesalada pepkune. Sunda, sun buru di mali kun keca talepra pio men kununge. Tonda, sun dipru neitamai, mali keca tenpunge pe men kurepa, pio dumsisipu kununge.
Tonda, tali keca cap, isok cap tep, ‘Nun nai ake,’ pepra, tali mok keca tep si men eremnunge. Tonda, anesaladi, mok upu deiki di, ‘Tek upu penupe,’ pepra, mawa di mok upu pio men penunge. Ato kunge nesalada, pio dumsisipu kununga cadi, Allah er damai yatenge.
5 Anesalada, sun damaida Allah akuredi, Allah Yahwehdi sun tep, pio telep kupra derinkamre. Er pingping keca sun tep karenkamrure.
Allahdi sun Lyemna Deiyo Ngebo kurura cadi, tek sisa sun tep, ‘Anesalada, konum telep kupra deipsa tep, dumsisipu kununga cadi, men wenepkamsene,’ pepra, telep kemdinkamsere.
6 Ange yuma lap pepmasentopu, telep kupra kunge nesaladi, ‘Nun nai bo Allah, er sipu eremkamepe,’ tenepra dumsisipu kununge. ‘Allah er si eremkamep’ tenen, er damai yakankamenge. Nun apu bo Yakubdi deipupa, dadeipdanen yakarami Israel yala nesala yumada, Allah kandi anesala tep, pio melipra kalengamrume.
Dumsisi kunge nesala dipapu, ‘Nun Allah damai yana kupedi, er sipu eremkamepe,’ tenepra kunge nesalapu, Allah er sipu eremkamenge.
7 Allah er si eremna ati pumbon pel dona deiyo nengdi, akati ila lyom beilya buplan, pumun taru domi ngeda, pala kepra pakeipsemumpa, ila pala bisi katuai kupyopda, nun Ila Nimi Deiyo Ngebo, Raja yaredi, er si eremna akati wekamre.
ARajada, er puto cap, er dirin cap, pio weik kurura cadi, erda pio mambul ngebo kurure. Alyom beilya buplan pakeipsemumpa, nun pio telep Raja ngebodi, akati wekamre.
8 Ila Nimi Deiyo kemna tep, puto weik cap, pio telep cap, ila mambul kure ngeboda, ware ngebo do? Gume, erda yuk ngebo gume, nun nai bo Allah, er si Yahwehpu Raja kurure.
Erda pio puto weik ngebo kuredi, akeca-keca yuma talerure. Allah Yahweh ukuredi, podan taru yumada, er ila puto kuredi, er podan nesala yuma tep, bisbisa kapredi popra gawal dangrure.
9 Ange tep nengeda, Allah er si eremna ati pumbon pel dona deiyo nengdi, akati ila lyom beilya buplan, pumun taru domi ngeda, pala kepra pakeipsemumpa, ila pala bisi katuai kupyopda, nun Ila Nimi Deiyo Ngebo, ila mambul kure Raja yaredi, er si eremna akati wekamre.
10 Ila Nimi Deiyo Ngebo, ila mambul kure Raja pepman ngeboda, ‘Ware ngebo do?’ tenena gume. Ada, nun nai bo Allah Yahweh, im deiki kunge jen talen neng, sun malaikat yuma cap, akeca-keca yuma cap, er dipapu akeca yuma talepra deiki tara kurure. Erda ila mambul weik kuredi, nun Ila Nimi Deiyo Ngebo Raja kuredi talerserure.
Raja Daud mut pena deiki di pepu.