Psalms 25

Mazmur seku ngebodi, ‘Ne mali kun keca yumada, Allahdi kaukepnetudi, gum kupra deiptue’ tenena cap, tonda, ‘Ne pona tep nengdi popnenung’ tenen, ‘Allahdi melipra, kalengkamnetue’ tenen, moropu upu

1Raja Dauddi aMazmur upu seku dingeda, Allah tep amut pepu.
Dauddi pepu, “Uo ne nai Allah Yahweh, ne kange dipru yumada, kan deikipu derikenune. Ne ikin kunerur keca cap, ne putanerur keca cap tep, nedi kan tepapu morokenune.
2Teka ne nai Allah, nedi kan sipu eremkenune. Tonda, ‘Allah er dipapu melimkamner’ tenen, kan tepapu, teka tenepra kunune.
Naio, ‘Ne pona tep nengdi, mali kweipnengepa, ne ali daknun’ tenen, kandi kalengkamnerum’ tenen, moropkene.
Tonda, ‘Ne pona tep nengdi, popnengopda, ila upu di nyek-nyek pepnenung’ tenen, ‘Allah kandi kalengkamnerum’ tenen, moropkene naio.
3Dinino, ne kaele, ware ngebo do yuma, nimidi kan tep, teka tenepkengedi, ‘Allah er dipapu melipra lyepkamner’ tenen, kan si deikipu moropkengopda, kan adipapu tek sisi melipra lyemdonkamserume.
Dinino, ware neng do yuma, deiyo men kwapmarepapu, mok upu deiki di, tali-tali pekenge neng tep nengeda, kandi anesala wenepmempa, sun anesala yumada, ali dangkamenge.
4Uo ne nai bo Allah Yahweh, kandi, ‘Angeda kunkamrume, angeda pio men kunkamrume,’ pepra, deipsemum upu, ‘Peterepnetumpa, moupra kael keptenedi, akecapu talepra kunkamne’ tenen, ‘Kandi melipkamnerum’ tenen, moropkene naio.
Tonda, ‘Telep kuna ngeda ake, mali kuna ngeda ake,’ pepra, peterepnetumpa, ‘Angepu moupra kael kepnedi, kan bisipu embenkamne’ tenen, moropkene naio.
5Ange utopu, Allah kandi, “Dumsisi kuna ngeda ake,” pepra peterepnememdi, ‘Kan menmena mepra embamem pangeda, neda, kan amnyotara moupra dombankamne’ tenen, moropkene naio.
Deiyoda, kan dipapu, melipra lyemdoneruma cadi, Allah kan sipu eremkenune.
Ataru-ataru yumada, ipna di dukdongopra, keteng komuni yuma cap, lukunda taru capda, ‘Allah kan dipapu, lyemkamnerum’ tenen, morokenune naio.
6Atep nengeda, Allah kandi nun tep, ila di bicau tenesememdi, ‘Sunda pio telep kupra derinkamsene,’ pepra, pedina upu deiki di konum peiamsemum utopu kupra, tek sisi angeda kandi tupa tenepsememdi, nun tep, pio karenkamarume.
Nun mali kurameputopu, nun wenemna tep menenga keca karepsetum dinin, ange gum di, ila di bicau tenesememdi, lyemdoserume.
Naio kandi nun tep bicau tenena cap, nun malinge kaukemna cap, nun tep telep kudinange capda, ‘Dorkuramu taru neitamai di dipra, ataru dukdongopra, dorkunkamre taru peda, ange utopu kunkamserem’ tenen, moropkene naio.
7Ange tep nengeda, ne kaber kuramsi taru neitamai mali keca talepra kuramsi nge cap,
Kandi nun tep, ‘Angeda kunkamrume, angeda pio men kunkamrume,’ pepra, deiamsemum upu yanipsidi, mali kuramsinge cap yumada, ‘Tupa men tenenkamnerum’ tenen, moropkene naio.
Ukupsememnyopda, yuk nesala yuma epsengedi, ‘Uo, Allah Yahweh, erda pio telep, dumsisi kuna ngebo kurure,’ pepra, kan tepapu tenepra kael kemkamkenge.
8Nun nai bo Allah Yahwehda, pio telep ngebo kurura cadi, er upu peseretopu, pio dumsisipu kurure.
Ange tep nengeda, sun mali kecapu talepra kunge nesala tep, Allahdi, ‘Ne tenemsisi ngeda, ake. Telep kuna ngeda, ake,’ pepra peteremserepa, kael kemnupe.
9Tonda, sun dipru eremdana gum dipapu, amu kupra dipru bounpu kunge nesala tep nengeda, Allahdi, ‘Telep kun bisi ake, dumsisi kuna ngeda, ake,’ pepra peteremserure.
Ange utopu, sun salnong-nong kamna gum dipapu, dipru bounpu kunge nesala tep, ‘Ne dumsisi bana bisida ake. Telep kuna ngeda, ake,’ pepra, peteremrure.
10Nun nai Allah Yahwehda, erdi kange deipra peteremserur keca yumada, tamna pio gum dipapu, pio tep, bicau teneseredi, ‘Ukunkamsene, ada pio telep kupra derinkamsene,’ pepra, pedina upu deiki di peiamseunge yumada, tek sisi nong pio tep kunkamre.
Angeda, tali-tali dakunge nesala cap, er tep teka men tenenge nesala cap tep gumae. Ada, Allahdi, ‘Angeda kunkamrume, angeda pio men kunkamrume.
Dumsisi kuna ngeda ake,’ pepra, deiamseu upu, moupra talepmengedi, angepu dombanung neng tep, pio bicau teneseredi, teleppu kudinkamsere.
11Uo, ne nai Allah Yahweh, yuk nesala yumadi, kan tep, ‘Uo, er si cap, erdi kurur keca capda, pio mambule,’ tenenkamkeng tenena tep, nedi mali weik kuramsi keca yuma kaukepnememdi, gum kupra deipkamnerum’ tenen, morokene naio.
12Tek sisi ngeda, ware nesala do, sun yumadi, Allah Yahweh tep, teka tenepmengedi, erdi, ‘Angeda kunkamrume, angeda, pio men kunkamrume,’ pepra, deipseu upu moupra talenge nesalada, Allahdi sun anesala tep, “Telep kun bisida ake. Sunda ange-ange yuma ton kunkamrume. Ange wepra, talepmumdi, abisipu embankamrume,” pepra peteremrure.
13Peteremrepa, kael kepmengopda, anengdi telep kweipre pangeda, sun kunkameng keca yumada, nong keprepa, pio teleppu kunkamenge.
Tonda, sundi deipmengepa, dadeipdanen bankameng nyapu yumada, Allahdi wepra kareamseu mutu neitamai yuma, sundi talepra acapu pio kunkamenge.
14Ware nesala do yuma, Allahdi, ‘Angeda kunkamrume, angeda pio men kunkamrume,’ pepra deiamseu upu, moupra talepmengedi, angepu dombange nesala tep nengeda, Allah Yahwehdi aneng tep, ila di bicau tenepredi, kange derinkamsere.
Ukupre dingeda, Allahdi, ‘Ukupkamsene-ukupkamsene, tonda ukupra telep kudinkamsene,’ pepra, pedina upu deiki di pesere keca yumada, aneng tep lap pepra derirepa, kael kemnunge.
15Ataru-ataru yumada, nedi ne nai bo Allah Yahweh tep, ‘Ware upu pepkamner do?’ tenen, moupra kalekra dinedi, upu gekenune.
Angeda tali tep men kunune. Deiyoda, Allah er dipapu, nimi popmantoida konum lyemdonerure.
16Ne nai Allaho, kandi moupra dinememdi, ila di bicau tenenememdi, kan kange deiki dipapu weika di melimnerume naio.
Deiyoda, ne ikin weik kuneredi, dipru yuma peda bulungsangnerure. Adeiki di, ‘Uo, neda akunune, atep ne kabo tenpunge peda, ton men kurure,’ tenen, mambul kange dounune.
17Naio, ne kange dipru neitamaida, ikin weik kunerur kecada, weiktonun kepbarura tep, mambul kange doupra kununa tep, kandi loptapnememdi, lyepnetume’ tenen, moropkene naio!
Tonda, ‘Ne kange mun kange doupra kununai di lopra, tapnetumdi pio telepaipu dubenkamnerum’ tenen, moropkene naio.
18Uo ne nai Allaho, moupra dipetepnememdi, ‘Ne ikin weik kunerur keca cap, kange mun kange doupra kunun nge cap, neitamai di, melipra lyepnetume’ tenen, moropkene.
Ukupnememdi, ‘Ne mali weik kuramsi keca yumada, kaukepra gum kupra deipkamnerum’ tenen, moropkene.
19Tonda, moupra dipetepnememdi, ne pona tep bulupra ne damai yakanung nengda, epmemdi, ‘Ware kupra neng kunmang do?’ tenen, nukamrume. ‘Angeda, moupra tenipetepmemdi, melimkamnerum’ tenen, moropkene naio. Tonda, ne pona tep nengdi, ne tep, ‘Angebo nun pio songe,’ tenengedi, ila yu weik kuprepa, ‘Angebo nun dabale,’ tenenenunge. Ange peda moupra dinkurume naio.
20Atep nengeda, ‘Ne gam kunange tep moupra kaleknememdi, lyepropnememnyopda, gam tupa kunkamne,’ tenen, moropkene.
Tonda, ‘Yu nengdi, mali kweipnengepa, ali daknun’ tenen, melipra lyepropnetum’ tenen, moropkene naio.
‘Yu nengdi ne popnenung’ tenen, nedi kan damaipu inimnuna cadi, ‘Kan dipapu kalengkamnerum’ tenen, morokenune.
21Ne naio, kandi, ‘Angeda kunkamrume, angeda pio men kunkamrume,’ pepra deiamsemum upuda, nedi moupra talenedi, dombanune.
Tonda, yuk neng tep tali upu pio men penune. Nedi yuk neng yuma tep, dumsisipu kununa cadi, ukununa deiki di, ‘Kan dipapu melipra lyemdonkamrum’ tenen, moropkene naio.
Deiyoda, nedi kan tepapu, ‘Allah er dipapu, melipra lyepropkamner’ tenen, kan tep teka tenepra, dinapu kunune.
22Tonda, nun nai Allaho, nun Israel yala nesala yumada, ikin keca kurura neitamaipu kunupa cadi, men kupmanto kunmapdi, kange mun kange doupra kunupe. Atep, nun nai Allaho, kan dipapu, nun tep, melipra lyemdonkamserem’ tenen, morokenupe naio.