Psa 26 | XteSC | STEP | Raja Dauddi aMazmur upu seku. Ne nai Allaho, ‘Kandi ne teleppu kuramsitopunge tep, upu bokeipnetumpa, yuk nengdi gekepmengopda, ‘E, erda mali men kurure,’ tenepnetengedi, kael kepnetenge’ tenen moropkene. ‘Tek do, telel do?’ tenen, tenimtona gum dipapu, Allah Yahweh tep, pio teka tenenune.

Psalms 26

Mali keca kuna gum ngebodi, Allah tep, ‘Melipneo,’ pepra moropu upu

1 Raja Dauddi aMazmur upu seku.
Ne nai Allaho, ‘Kandi ne teleppu kuramsitopunge tep, upu bokeipnetumpa, yuk nengdi gekepmengopda, ‘E, erda mali men kurure,’ tenepnetengedi, kael kepnetenge’ tenen moropkene.
‘Tek do, telel do?’ tenen, tenimtona gum dipapu, Allah Yahweh tep, pio teka tenenune.
2 Uo, ne nai Allah Yahweh, ‘Angeboda, mali kurur do, teleppu kurur do?’ tenen, ne kune keca yuma tep, moupra dipetepnememdi, kael kepkunerume.
Ada, ne kange dipru neitamai tenenun keca pe, putanerur keca peda, dipetepkunerume naio.
3 Ne nai Allah, kandi nun tep, “Bicau tenesenedi, ‘Ukupkamsene,’ pepra, pedina upu deiki di pepsisinge yumada, tamna gum di, tek sisi pio karenkamsene,” pepsemume. Ange yumada nedi lumdongona gum di, tupa-tupa tenenune.
Kanda ne tep, tamna gum di, tupa-tupa pio melimnapu kunerume.
4 Neda, tali upupu penung neng cap, kikiman men kunkamne. Angeda ne songe.
Tonda, mawa di kunge neng cap, tali upu penge cap, ne cap kikiman pio men kunkamne.
5 Angetopu, ware neng do, Allahdi, ‘Angeda kunkamrume, angeda men kunkamrume,’ pepra deiamseu upu, yanipra tamengedi, mali weik kunge nesalada, ‘Ne pio songe,’ tenenune .
Atep nengeda, sun mali weik kunge nesala cap, ne cap kikiman kuna gum di, beidonune.
6 ‘Neda mali kun keca pio men kuramsi ngeda, kael kepkamneng’ tenen, petenkemna tep, ne buri me kupnyopda, yuk neng epnengedi, ange kael kepkamenge.
Ukupne dingeda, gam keca popnedi, kan Yahweh karena tep ketekeami keca, er sida mesba, ongopgenepra embankamne.
7 Mesba damai embankamne taruda, kange lon mut ton penkamane.
Tonda, kan Allahdi ila puto weik keca, nimi men kupmantonge konum kuramum ngeda, yuk neng gekena tep, lap penkamane.
8 Ne nai Allah, kan si eremna ati damaida, kan kurumaida, ne kange pio derinunge. Ada kan kurumaida, pio-pio teleppu kurura cadi, ne kange derinune.
9 Ne naio, ‘kandi sun mali kunge nesala wenepra popkamrem taruda, ne cap men wenepra popkamnerem’ tenen, moropkene.
Ada, sun mali kun kecapu talepra mali-mali weik kunge neng cap, yuk neng tep ponge neng cap, wenepkamrem taruda, ‘Ne cap men wenepra popkamnerem’ tenen, moropkene naio.
10 Anengda, tupa-tupa mali kun kecapu pio kununge.
Tonda, ‘Inipra mali kun kecapu pio kuptepe’ tenen, nimi pona tep, bul kemna co bopu doronunge.
11 Dinino, ne gam kune taruda, amali kunange utopu ton pio men kunune. Mawa di kuna cap, tali upu pena cap gum dipapu, dumsisipu kunune.
Atep, bicau tenepnememdi, ne ikin kunerenge neitamai di, loptapra lyepnerume naio.
12 Ne telepaipu kununa cadi, ikin keca ne damai ton pio men yankamnere.
Atep, kandi wepra deiamsemum nengdi, kan si eremna tep, tenpai bulupmengedi, kan si erepra, kan tep, ‘Pio telepe,’ penkamkeng taruda, ne peda kikiman utopu Allah Yahweh, kan sipu eremkamkene.