Psa 27 | XteSC | STEP | Dauddi pepu. Allah kandi ne dirine kemdina cap, ne lyemna cap Deiyo Ngebo kurume. Ada, ila gat beilya lyoma di erepra wiramengtopu, Allah Yahweh kandi erepra kumempa, neda kan amutara kunune. Atep nengeda, yuk neng yuma tep, ton berber pepnerepa, kwar men dangkamne.

Psalms 27

“Allahdi melimserepa telepepu kunupe,” pepu upu

1 Dauddi pepu. Allah kandi ne dirine kemdina cap, ne lyemna cap Deiyo Ngebo kurume. Ada, ila gat beilya lyoma di erepra wiramengtopu, Allah Yahweh kandi erepra kumempa, neda kan amutara kunune. Atep nengeda, yuk neng yuma tep, ton berber pepnerepa, kwar men dangkamne. 2 Ne podan nengdi, ‘Er popkamep’ tenen, yan wareknenge nengda, sun pe anengpu gel yan giso dukrepa, saka poramretopu, kupkamenge. Tonda, ne podan nengdi, ‘Popkupe,’ tenepnetenga peda, sun pe nengpu sakamenge.
3 Tonda, ‘Ne yan warekra popkamep’ tenen, jen neng yankamenge. Tonda ne tep mar poryankamnenge. Ukupnenga peda, kwar men kupkamnere. ‘Allah kan dipapu melipkuner ja,’ tenepnedi, kwar men kunkamnere.
4 Atep nengeda, ne nai Allah Yahweh, er tep pio tupa-tupa moronun ngeda, tenpu ngeda ake. Ne gam kunkamne taru yumada, Allah Yahweh er si eremna ati damaipu kunedi, ne lyemdonkamnere pepra moronune. Tonda, Allah Yahweh er kamo pio telep kurur ngeda, ‘Pio dinkamne’ tenen, moronune. Tonda, er si eremna ati damai kunedi, tupa-tupa dinkamna tep moronune.
5 Ada mesum tep gume. Ne kange mun keca kupnere taru yumada, ‘Allahdi ne tep kalekra melimkamnere’ tenen, kunune. Ada, ikin keca yuma, ne damai yankamre taru yumada, Allahdi melipra lelipdongopnerepa, er amutara kunkamne. Allahdi melipra lelipdongopneredi, ne doupra mutu deiki derirbankamnere.
6 Ukupneryopda, ne podan neng kan-kan di, Allahdi erepra dopkamnere. Ne podan neng yumada, bisbisa kapkamne. Atep nengeda, ne ila kange deipnedi, ne nai Allah damai telepe pepra, er si eremna tep, telep karen keca kareryakankamne. Ukupnedi, Allah Yahweh er tepapu, mut deiki di pepnedi si eremkamne.
7 Atep, ne nai Allah Yahweh, nedi kan tep moropkene pangeda, bicau tenepra gekenkamnerume.
8 Ne nai Allah ne dipru neitamai di, ‘Allah er si erepkune,’ tenepne taru yumada, ne adipapu tenepra kan sipu eremkamkene.
9 Atep nengeda, ne tamna gume. Nedi morokene taru yumada, kan urasin tamudonongna gume. Kandi ne tep tulum kupkerepa, urasin mudongona gume. Angeda, kan dipapu lyemdonerum ngebo tep, ‘Ne tapnerum’ tenen, moropkene.
Tonda ‘neda, kan amutara pel dona ngebo kununa cadi, nedi kan tep pepkamne ngeda gekepra kaukeptapnerum’ tenen, pepkene. Kanda, ne nai Allah, ne Lyemna Deiyo Ngebo kuneruma tep pepkene.
10 Nanin cap, ne nai bo capda, sundi tapneretenga peda, Allah Yahweh kandi men tapkamnerume. Ne morokene taru yumada, Allah kan dipapu melimkamnerume.
11 Ne nai Allah Yahweh, kandi, ‘Telep kuna bisida ake,’ tenen, tenememngepu peteremnerume. Tonda, dumsisi bisida ake, tenememngepu peteremnerume.
Angeda tali tep gume. ‘Ne podan neng pio weik kungedi, bisbisa kapnenung’ tenen, pepkene.
12 Ne tep ne podan nengdi, ‘Poptepe,’ tenenenung neng, sun deiki Allah kandi deipmempa, ‘Popnenung’ tenen, moropkene. Tonda, sun anengdi, ‘Ne deiki mok upu pepra ikin keca, ne damai deipnenung’ tenen, moropkene.
Tonda, anengdi, ‘Angebo popkupe,’ penenunga tep, ne nai Allah, ‘Kandi kalekra melipnerum’ tenen, moropkene.
13 Tek sisi, Allah kandi ne damai, bicau tenepra melipnemem pangeda, ne kaele, ‘Ne tuai mutu gam kunkamne taru neitamaida, kandi epra telep dumsisi kunangepu karenkamnerume,’ tenepne. Ada kan Allah Yahwehdi, telep kudinkamneruma tep pepne.
14 Atep nengeda, nedi Allah tepapu teka tenen, ‘Moupra puto di talenkamne. Kware gum deiki dipapu kuramnedi diramnepane, Allah er si Yahwehdi, pio melimkamnere,’ pepra, Dauddi pepu.