Psa 28 | XteSC | STEP | Ne nai Allah Yahweh, ‘Kandi melipkunerem’ tenen, ila upu di kongpepkenedi, moropkene. Ukupmantoda, ila mutu damai bukamu gel amnyo tara inipnedi, teleppu kununa utopu, kan damaida kange deipra, teleppu kunune. Atep naio, ‘Ne moropken kecada, gekepkunerem’ tenen, moropkene. Upepkenada, tali tep gume naio! Kandi ne moropken keca tep, men gekepnememnyopda, nimi depmengepa, ila tu pumbon palipmengedi, dongopmengopda, konum deami neng kunungaipu bena kunkamne.

Psalms 28

Raja Dauddi, ‘Allah melipneo,’ pena cap, ‘Telepe,” pena cap tep, Mazmur mut upu pepu

1 Ne nai Allah Yahweh, ‘Kandi melipkunerem’ tenen, ila upu di kongpepkenedi, moropkene.
Ukupmantoda, ila mutu damai bukamu gel amnyo tara inipnedi, teleppu kununa utopu, kan damaida kange deipra, teleppu kunune. Atep naio, ‘Ne moropken kecada, gekepkunerem’ tenen, moropkene.
Upepkenada, tali tep gume naio! Kandi ne moropken keca tep, men gekepnememnyopda, nimi depmengepa, ila tu pumbon palipmengedi, dongopmengopda, konum deami neng kunungaipu bena kunkamne.
2 ‘Ukupnun’ tenen, naio, nedi kan tep, ‘Melipra lyepneo,’ pepra, ‘Morokenun upu gekepkunerem’ tenen, ngolokra moropkene naio.
Ne ikin kunere keca tep, ‘Kandi melipra lyepneo,’ pepra, morokenune naio.
‘Allah kan tep moropkuken’ tenena tep, ne buru erepnedi, kan si eremna ati pumbon neitamai, ati wilipra Pio Telep Lengna Ati dominge tara damai epnedi, kan Allah tep morokenune.
3 Ton pio mali kunge nengdi, yuk neng, sun damai kunge neng gekena tep, ‘Nun kayape, tali dim pepra, telep dipapu kikiman kunkamepe,’ pepra, mawa di penunge.
Dinino, tek sisi ngeda, sun kange dipru neitamaida, mali kun kecapu dinikudi lyurure. Sun dipru neitamaida, ‘Sun aneng tep nengeda, mali kweipmepedi, popkamepe,’ tenenunge.
4 Tonda, sundi pio mali keca kuraminge utopu kupra, ila di wenepmumdi, ‘Sun menenga keca tep, ila ikin keca dopra, sun deiki derinkamrume’ tenen, moropkene.
Tonda, Allah, kandi sun mali kurameng keca kunumna tep, ila kange mun keca karepmemdi, ‘Anesala tep wenepkamrum’ tenen, moropkene.
5 Deiyoda ake. Ada, Allah Yahwehdi mambul pel dorenge cap, er puto buru di kure keca cap tep, amali kunge nesaladi, ‘Ange yumada dakwapye, akure keca tep tenepra, men kael kepkupe,’ tenepmengedi, penunge.
6 Nun nai bo Allah Yahweh tep, “Uo erda pio telep kurure,” pepra, er si eremnune.
Nun nai bo Allah Yahweh tep, “Uo erda nun moropmepe keca konum gekepseredi, pio telep kuderisure,” pepra, er sipu eremnune.
7 Nun nai Allah Yahwehda, erdi ne tep, tupa-tupa puto kemdinerure.
Ukupmantoda, jen talena nengdi, yuk neng tep, ‘Sundi mar dopmengedi popsenung’ tenen, sun nong lelimna tep gat keca, er sida perisai talepra embaramengtopu, Allahdi ne tep, kalengnerure.
Allah tep nengeda, ‘Teka,’ tenepnedi, ne kange dipru yuma, er deikipu derinune.
Allah tep, puto di teka tenenuna cadi, melimnerya deiki di, ne kange dipru neitamaida, pio kange deipra, mut pena deiki pingpinga di kunune. Nedi Allah tep, “Naio pio telepe,” pepnune.
8 Allah Yahwehdi, er mawa nesala, nun Israel nesala yuma tep, er dipapu, nun tep puto kemdiserure.
Tonda, Allahdi, ‘Angeboda, Israel yala nesala yuma talepra, sun ila nimi deiyo ngebo, Raja kunkamre’ tenen, wepra deipneu ngebo tep, melipra lyemdonerure. Ila mutu yangne gel damai inipnepa, tali dim pepra kununa utopu, Allahdi ne wepra deipneudi, tupa kalengnerure.
ARaja ngebodi, Allah er damai kurya deiki di, yuk nengdi er tep popra, mali men kweiptenge.
9 Atep nengeda, ne nai bo Allah, kan tep moropkene. Kandi, ‘Ne mawa nesala kunkameng’ tenen, wepra deiamsemum Israel nesala yuma tep, lyemdonkamserum’ tenen, moropkene.
Tonda, nun Israel nesalada, kandi menop taru konum weiamsemuma cadi, kan mawa nesalapu pio kunkamepa tep, ‘Pio telep kupra kudinkamserum’ tenen, moropkene.
Ukupmantoda, sun domba bisam peina deiyo nengdi, sun domba bisam pio telep kupra peiramengedi, puto bounpu kure domba bisam erepra sun pedi dubaramengtopu, ‘Kandi nun Israel nesala tep, ereipsememdi, pio tep, melipra dubenkamserum’ tenen, moropkene naio.