Psa 29 | XteSC | STEP | Sun im deiki kurum malaikat yuma cap, yala yuk-yuk gam kunange capda, sundi Allah Yahweh tep, er si erepra, ‘Uo kanda pio-pio telep kurume. Kanda, pio puto weik ngebo kurume,’ pepra, gispal donkamrume.

Psalms 29

Raja Dauddi aMazmur upu seku. Ukupmantoda, ila puto kumanya cap, kulman cap, perenglang pena cap, ila puto weik kuramretopu, Allah Yahweh er putoda, utopu kurure.

1 Sun im deiki kurum malaikat yuma cap, yala yuk-yuk gam kunange capda, sundi Allah Yahweh tep, er si erepra, ‘Uo kanda pio-pio telep kurume. Kanda, pio puto weik ngebo kurume,’ pepra, gispal donkamrume.
2 Sun yumadi, Allah Yahweh tep, “Uo, kan cap, kan si capda, pio telep kurure. Kanda, mali kuna ngeda, tenpunge pe ton men kukerura cadi, Pio Telep Lengna Ngebo kuruma cadi, nundi kan sipu pio eremkenupe,” penkamrume.
3 Allah Yahwehdi, perur upuda, ila laut mokon deipka deiki tara di perure. Allahda, ila mambul kuna cap, pio telep kuna cap kure ngebodi, laut mokon neitamai er upu ila di peryopda, pereng lang pena cap, ila kul man lelim cap peramretopu perepa gekenupe.
4 Allah Yahweh, er upu puto di peryopda, tuai mutu nesala ban-ban yuma kunge nesala gekepmengedi, ‘Uo, Allahda ila mambul ngebo kurure. Er urasinda pio-pio telepe,’ pepmengedi, er tep gispal donkamenge.
5 Allah Yahwehdi ila upu peryopda, ila lyom co bolokra tengamutopu tengrure. Ada, Libanon mutu neitamai tengamu gat co, er sida cemara co copra, tuai sakredi bolongrure.
6 Allah er upu puto di peryopda, Libanon mutu-mutu yuma cap, Siryon tara mutu capda, lokamre.
Ukupmantoda, metek sapi bisam mi, sepra embaredi, depda-depda peredi, welepna, kwerepna kemamretopu, tuai mutu yuma peda lokamre.
7 Allah Yahweh, er upuda pio menmena di perure. Ukupmantoda, pereng lang pena dato-dato di pereng lang peramretopu kurure.
Tonda, ila uku bo jeramredi, dirine weik kuramretopu Allah er upu peda, menmena di peprepa, ban-ban yuma dakunge nesaladi gekenunge.
8 Allah Yahwehdi, er upu ila di peryopda, pio karen katawai mutu peda lokamre. Allah Yahweh er upu pepyopda, Kades mutu nimi pio men kunungai, peda lokamre.
9 Allah Yahwehdi, er upu pio puto di peryopda, bura mutu co palpal neitamai, ila di tengamu co yumada, ila kumanyadi yana pung peprepa, aco yumada, lokredi bupatengrepa, aco bo yuma adipapu kupra sangredi, gum kupbarure.
Ukupyopda, Allah Yahweh er si eremna ati pumbon neitamai kunge nengdi, ‘Uo, uo, Allahda pio teleppu kurure,’ penkamenge.
10 Allah Yahwehda, akeca-keca yuma cap, ila laut mokon cap akeca yuma deiki tara bukra kuredi, ila nimi deiyo ngebo kurure.
Nimi deiyo kepra, Raja kuredi, er bungna keca er sida tahkta deiki bukredi, akeca-keca yumada, pio tep talenkamre.
11 Ange tep nengeda, ‘Allah Yahwehdi, ne mawa nesala kunkameng’ tenen, wepra deiamseu nesalada, puto weik karenkamser’ tenen, moronupe. Tonda, ‘Allah Yahwehdi, er mawa nesala tep, pio telep kupra deipserepa, kange deipra teleppu kunkamep’ tenen, moronupe.