Psa 3 | XteSC | STEP | Raja Daud, erdi deipu ngebo Absalomdi, ‘Ne nai bo popkamne’ tenepu taruda, Daud kware kupupa, sepdaro bendopu taru di seku Mazmur upu. Dauddi pepu upuda ake.

Psalms 3

Kange mun kange doupra kupe taruda, nun nai Allah tep, teka tenepmepedi, ‘Er dipapu lyepropkamser’ tenen, “Nun kange dipru yuma, er deikipu deipmepedi mut penkamepe,” pepu upu

1 Raja Daud, erdi deipu ngebo Absalomdi, ‘Ne nai bo popkamne’ tenepu taruda, Daud kware kupupa, sepdaro bendopu taru di seku Mazmur upu. Dauddi pepu upuda ake.
2 Uo, teka ne nai Allah Yahweh, yu nengdi, ‘Angebo Daudda, tapmepedi, er tep popkamepe,’ tenen, ketenepra mar poryakangedi, domyakanenung nengda, denge pio weik kununge.
Teka, nimi denge weika di, ‘Raja Daudda, nun song cadi, erdi tupa men talenkamsere,’ tenepmengedi, poryakanenunge.
3 Sun aneng denge weika di, ne tep upenenunge. “Nun kaele, tek sisi kan nai bo Allahda, kan tep pio men melipra lyepropkamkere. Kan pona tep nengdi yana popkamkenge,” pepra penenunge.
4 Sundi upenenung dinin, ne nai Allah, ne kaele. Kanda Yahwehdi, ‘Yu nengdi Daud tep popnung’ tenen, ne tep pio melipra kalengnerume.
Ukupmantoda, jen talena nengdi, ‘Yuk nengdi mar pepra dopmengedi popnenung’ tenen, sundi sun nong lelimna tep talenung keca, er sida perisai doupra kalengdanung utopu, kandi ne nong dana-dana tara yuma ongopdongopra lelipnememdi, kalengkamnerume.
Kanda Allah Yahwehdi, ne giso ereipnememdi, puto karepnememnya deiki di, nedi ne podan neng tep, popra gawal dangnune. Tonda, kan dipapu ne dipru kwa dimnemempa, tali kange doupra kunune.
5 Ne ila upu penuna deiki di, “Ne nai Allah Yahweh gekeneredi, er dipapu ne damai yana, melipra lyepneo!” pepra ngolongnune.
Upepra ngoloknyopda, Allah er pio telep lengna mutu dup deiki di, yaredi gekepra melimnerure.
6 Pio beipe tanerur taruda, ‘Mapkun’ tenen, ason deiki marbanune.
Allahdi melipra kalengnerura cadi, ne konum mapmanyanen, amenda taru kange di tamupra buknyopda, tali kange doupra teleppu kunune. Deiyoda, Allah Yahwehdi, pio melipra kalengneredi, puto karenerepa, kange di ton cap telep kununa tepa.
7 Ange tep nengeda, ne pona tep ne damai poryakanenung nesalada, denge pio weik, men nukmanto, sepuluh ribu neng ton kuptenga peda, aneng tep nengeda, kware men kunkamne.
Sun anengda, ‘Angebo Daud poptapkup,’ tenepmengedi, ne damai dana-dana tara yuma yana keteneipmanengdi, warekamnenga peda, neda kware men kunkamna tepa.
8 Uo, “Ne nai Allah Yahweh, kan tep morokenune. Ada, kanda adipapu bukromemdi, ne damai menmena yatumdi, melipra lyepropnetume!” pepra moropkene.
Ne damai yamem dingeda, ne ikin kunerurnge neitamai di, melipra lyepropnerume naio.
Ada tali tep men pepne. Ne tep, ‘Angebo nun song cadi, er tep poptapkupe,’ tenepnenung neng yumada, kan Allahdi, sun katum deiki popkurume!
Sun yu weik kunge nengda, kandi popra gawal dangkurume! Ukupmantoda, sun katum deiki popmemnyopda, sun si yuma olokra sakamre!
9 Teka, nun pona tep neng yana popetepsenge tarada, Allah Yahweh er dipapu melipra lyemserure! Yuk ngebodi gume.
Atep nun nai Allah, kandi, ‘Ne mawa nesala kunkameng,’ tenepsemum Israel yala nesala tep, ‘Pio telep kupra derinkamserum’ tenen, moropkepe naio!