Psa 30 | XteSC | STEP | Raja Dauddi aMazmur upu mut pena tep seku. Amut seku ngeda, Allah er si eremna tep lengna ati buplan pangna cap, ila kailya kalemna cap tep tumi di seku.

Psalms 30

Ila kange mun pu jeramupa, Allahdi lyepromneua cadi, ‘Telepe’ pena mut penkamne pepu upu

1 Raja Dauddi aMazmur upu mut pena tep seku. Amut seku ngeda, Allah er si eremna tep lengna ati buplan pangna cap, ila kailya kalemna cap tep tumi di seku.
2 Uo ne nai bo Allah Yahweh, nedi kan tep, ‘Kanda pio telep kurume,’ pepra, kan si tep erepnedi, kan tep pio gispal donkamkene.
Deiyoda ake. Ada, ila kange mun pu jepneu dinin, kandi kwetepnemumdi, lyepropnemume.
Tonda, nun puto boun kuramsi taruda, ne pona tep nengdi, ‘Angebo popmepyopda, kange deipkamep’ tenen, yana piripetepi dinin, Allah kandi melipnemuma deiki di, sundi men popnei.
3 Uo ne si eremnun Allah, ne nai bo Yahweh, ne ikin kunerur taru yumada, ‘Naio, kandi melipra kwetepnerume,’ pepra, engepra moronune.
Ikin kuramneu taru yumada, moropsi pangeda, amoropkesitopu, kandi ne melipra kwetepnemume.
4 Uo, ne nai Allah Yahweh, ne konum depmanto kupmasi dinin, kandi kwetepnemuma cadi, sun konum deamipa, tu paliami neng damai men besi. Gam tupa kunune.
Allah kandi konum kwetepnemumdi, telep kupra deipmanerema cadi, ukutaru men depkamne.
5 Ne kayapu nengo, Allah tep, tamna gum di, pio teka tenepra erpu tupa talerum nesala yumada, nun nai bo Allah Yahweh tep, kange lon mut peprumudi, er sipu eremkamrume.
Tonda, nun nai Allahda, mali kun keca tenpunge peda men kuredi, pio telep, lengna ngebo kurura cadi, ange tep nengeda, er tep, ‘Telepe,’ pepra, gispal donkamrume.
6 Ton taruda, Allah er yu kuprepa, wenemserur dinin, ue metekanunpu yu teneserure.
Dinino, erdi bicau teneseredi, kange deriserur ngeda, pio weika di teneserure. Ada, nun gam kunkamep taru yuma neitamai di, bicau teneseredi, pio teleppu kemdiserure.
Ange utopu, nun ikin kuserepa, lukunda neitamai yuma engenup dinin, mapmapya, ipna bereng yan taruda, Allahdi melimserepa, kange deipmepedi, ila upu deiki di kange deipmepedi, ‘Telepe,’ penkamep ja!
7 Uda, neda, akeca-keca telep kwamneu taru neitamaida, nedi, uperamsi.
“Gume, ware ikin keca ne damai yanetua peda, kange mun kange doupra men kunkamne. Tali kange deipra, teleppu kunkamne ja!” peramsi.
8 Dinino, tek sisi kwamneu ngeda ake. Ada, kanda Allah Yahwehdi, kange deiamnemum taru di, pio telep kweipnemumpa, ne puto weik ngebo kuramsi. Ukupmantoda, ila mutu bungredi, men lokmanto kuramretopu kuramsi.
Dinino, ukupmantoda, kandi ne tep, amnyo karekronemumdi, yukaipu dimemdi, ne tep tupa men kalekra melimamnemempa, ‘Uo’ tenen, ne dipru buluksakneupa, kange mun kange doupra kuramsi.
9 Ataru neitamai di, nedi kan tep, ‘Uo, ne nai Allaho, ne melipneo,’ pepra ngolongna deiki di mali pepra moropkesi.
Ada, nedi Allah Yahweh tep, ila puto weik ngebo kurura cadi, erdi akeca-keca yuma talepra, deiki tara kuredi, erdi teneretopu kurura cadi, nedi er tep, ‘Melipra lyepneo,’ pepra moropsi.
10 Uo, ne nai Allaho, pu di do, yu nengdi poponengepa, ne konum depnyopda, wareto telep keca ton kupkamne do? Naio, ware deiyo tep, tali dadepkamne do?
Ada, ne depnepa, tu palipra peipnengopda, ne nong yuma tu dankamra cadi, tali kalkal tu di kan tep, ‘Telepe,’ pepra kan si erepketu do? Gume, ange pio men kupmanto.
Konum depnyopda, nedi yuk neng gekena tep, ‘Nun nai Allah, tamna gum dipapu, pio tupa-tupa melipra lyemdoserure,’ pepra, lap peptene do? Gume angeda pio men kupmanto.
11 Ange tep nengeda, ne nai Allah Yahweh, ‘Bicau tenepnetumdi, melipra lyepnetum’ tenen, moropkene naio.
Ada, kanda Allah Yahwehdi, ‘Ne Melimna Ngebo, tonda ne Lyemna Deiyo Ngebo kunememnya tep, pio moropkene naio!
12 Menop taru pe, ukutaru peda, ne ikin weik kunerure. Tonda ne kange mun kange doupra kune taru yumada, kan dipapu, ne engenun ngeda, gum kupra deipnememdi, ange yo punupra, kange derinangepu karepnemempa, pingping kange doupra moropsemnapu kunune.
Tonda, kange mun kange doupra engena tep, peten kemna ngeda, ne telep opkal gwelepra tapsidi, mali opkal er si karong koni keneksi ngeda, kandi konum dopropnemume.
Ne ikin weik kwamneu keca konum gum kupra deipnemumdi, kange derina cap, pingping kange kuna cap konum karepnemumpa, konum angepu talepra telep kunune.
13 Ange tep nengeda, ukutaru ne kange dipru neitamai di, kanda, ne Allah tep, ‘Kanda pio-pio telepe,’ pekenedi, kan tep kange deipra kan si eremkamkene. Tek sisi, tali dim peprappu men kunkamne. Tupa-tupa kan tep gispal donkamkene.
Uo, ne nai bo Allah Yahweh, kan si tupa eremkenune, Kan tep teka tenenune. Ange tep nengda, kan dipapu, ‘Pio telepe, teleppu kemdinerume,’ pepra, kan si eremkenedi, tupa-tupa, ‘Telepe,’ penkamkene.