Psalms 31

Raja Dauddi, Allah tep, pio ila di teka teneramnga cadi, Allah tep moropu upu

1Raja Dauddi, ‘Allah upu mut pena deiyo ngebo karepkamenga tep, amut pena upu seku.
2Uo, ne nai bo Allah Yahweh kanda, ‘Ikin keca ne damai yanerur’ tenen, ‘Kan dipapu ne tep, melipra kalengkamnerem’ tenen, morokenune.
Tonda, ‘Yu nengdi do, yuk ikin keca di do, ikin kupnerya peda, ali men dangkamne’ tenen, morokenune naio.
Ali men dakamne dinin, kanda dumsisi kurumange cap, kandi peiamsemum upu cap deiki di, ne ikin kunere keca neitamai di, ‘Kan Allahdi melipra lyemkamnerem’ tenen, moropkene naio.
3Atep ne nai Allah, ‘Nedi kan tep pio morokene keca yumada, moupra gekepnerum’ tenen, moropkene.
Ada, nai kan gekepnememdi, ‘Ne ikin kunerur keca neitamai di, loptapra lyepkamnerem’ tenen, moropkene.
Tonda ukupmanto ngeda, ila mutu buma bukamya amnyo tara gel damai iniptenepa, telep kuptenyopda, ‘Kandi talepnememdi, kalengkamnerum’ tenen, moropkene.
Tonda, nimidi, ‘Nun pona tep nengdi yana poptapsenung’ tenen, ila gel ati beilya wipra dopmengedi, ange neitamai di kuramengtopu, ‘Kan damai tupa kutenyopda, kan dipapu, ne tep melipra kalengkamnerem’ tenen, moropkene naio.
4Tek sisi, kan dipapu pio melipra kalengneruma cadi, ukupmanto ngeda, kanda ila mutu dupai bungamre gel cap, ila gel di deipra domenge ati arum cap utopu kunerume.
Atep, nedi, moropkene. ‘Naio, kandi ne tep, “Angeda kunkamrume, abisipu benkurume, telep kuna ngeda, ake,” pepra, ‘Peteremnememdi, melimkamnerem’ tenen, moropkene. Ukupmemnyopda, yuk nesala yuma epmengedi, kan si tepapu eremkamkeng’ tenen, moropkene.
5Tonda, yu nengdi ne tep, ‘Angeboda popkup’ tenen, nimi ponai konum ketenepidi, nimi pon keca, er si jaring inipra deipyai neitamai di, ‘Kandi loptapra lyepkamnerum’ tenen, moropkene naio!
Angeda, tali tep men morokenune. Gume, ‘Ne pona tep nengdi, poptapnenung’ tenen, kan damaipu kunune. Tonda, kanda, ne lyemna deiyo ngebo kuneruma cadi, kan tepapu morokenune naio.
6Ne nai Allah Yahweh, kanda tamna gum dipapu, pio tupa-tupa melimneruma cadi, kandi ne ikin kuramsa neitamai di konum melipra lyepnemume.
Atep nengeda, ne gam kuna cap, ne nong cap yumada, kan buru deikipu dopra deipkene.
7Ne nai Allaho, kan kaele, yuk nengdi, ‘Nun nai bo ake,’ tenepmengedi, isok si eremna tep, tali keca petupra deipmengedi, akeca tep si eremnunge. Ange ukunge keca yumada, nedi, ‘Neda pio dabale, ne pio songe,’ tenenune.
Ada, tali isok keca tep men talepra kunun dinin, neda kan Allah Yahweh tepapu, pio teka tenekenedi, kan deikipu ne kange dipru yumada derikenune.
8Allah kanda nedi pio tep, “Bicau tenekenedi, nedi kan tep, ukupra pio telep kweipkamkene,” pepra pedina upu deiki di peiamkesinge yumada, tamna gum dipapu, pio tep melimkamkene,’ peneruma cadi, kange deipnedi, teleppu kunkamne.
Ada, ne pona tep warekra dininung yu nengda, kandi konum dirumdi, ne tep konum melimnememdi, lyemdoneruma cadi, pio kange deipkene naio.
9Tonda, kandi ne tep, ‘Dakwapye, angebo er pona tep nengdi dapoptenge,’ tenen, men tamnemumpa, sun buru di men talepra ponenunga cadi, ‘Telepe,’ pepkene naio.
Men tamnememdi, ne ikin kunerur keca neitamai di, konum lopra lyemdoneruma cadi, nimi popmanto mutu neitamai pio men kunune. Tali telepaipu, dim pepra kunune.
10Uo, ne nai Allah Yahweh, ukutaruda ikin pio weik kunerya deiki di, ila kange mun kange doupra kunmana cadi, kanda, ‘Ila di bicau tenepnememdi, melipra lyepkamnerum’ tenen, moropkene naio.
Ne ikin kunerur keca yumada, pio engenapu kununa tep, ne asuru cap, ne nong cap, ne kange dipru cap yumada, pio puto bounpu kupnere.
11Angeda tali tep men pepne. Deiyoda, ikin weik kunerepa, kange mun kange doupra kununa cadi, ne gam kune taru yuma engenapu kunune.
Tonda, tumi-tumi yuma cap, keteng tamun, keteng tamun neitamai yuma capda, nedi ‘Uo, ware kuptene do?’ pepra ngolongnapu kunune.
Tonda, tumi-tumi yuma cap, keteng tamun, keteng tamun neitamai yuma capda, nedi ‘Uo, uo, ware kuptene do?’ tenen, mali peprappu kunune.
Ne nong cap, ne nong neitamai kunere yo cap yumada, pio bounpu kunerura cadi, ukupmantoda, ne yo peda, pio gum kupbana utopu kunerure.
12Atep, ne pona tep neng yuma, epnengedi, ‘Walito ikin kurure,’ pepra nyek-nyek pepra, mali penenunge.
Angetopu, ne ati damai kunge nesala epnengedi, kware weik kuprepa, sundi, ‘Uo, uo, angebo konum nong bol pio malipu kurure. Nun ton ukupserur’ tenen, er damai ton pio men benkamepe,’ tenenenunge.
Tonda, ne kayapu nengdi, ne tep konum antapra kael keamnei neng yuma, epnengedi, ‘Uo, angeboda pio ila kange mun pu jeramupa, erda konum nong bol mali weik kurure,’ penenunge.
Atep, ware neng do yuma, nun ati arum neitamai bisi embangedi, epnengopda, ‘Uo, akecada nun deiki saka jepserur’ tenen, adipapu sepdara badonunge.
13Ukununa cadi, ware neng do yuma, amutu kunge nesaladi, ne tep, tupa ton cap men tenenenunge. Ne tep konum lupropnei.
Ada, nimi yumadi, ne tep, ‘Uo, angeboda konum depmanto kupka cadi, dakwapye, er dadepkamre’ tenenenunge. Ukupmantoda, metek me mau, kerah tu di ketenepra deipmepepanen, amenda taru ange olokyopda, bura donokmepepa, ton cap pio men tenenuptopu, ange utopu kuptue,’ tenenenunge.
14Uo, ne pona tep nengdi, ‘Angebo popmeko!’ pepra, upu mumur pepra sisingmengedi, mali upu penge ngeda, ne ton gekenune.
Atep, ne dana-dana tara yumada, ne kware kemderinenung keca yumada pio weik akurure.
Ada, ne pona tep nengdi, ‘Angebo popkupe,’ pepmengedi, sundi, ‘Wareto keca inipra kuptepya deiki di, angebo poptaptepe do?’ tenen, upu inipra sisingmengedi, talenunge.
15Ukununga peda, ne dingeda, kanda nedi si eremnun Allah kurume. Atep, ne nai Allah Yahweh kan tepapu, teka tenepnedi, ne kange yumada, kan deikipu derikenune.
16Atep, ne gam tupa kunkamne taru yumada, kandi konum tenenememdi, ‘Ukupra-ukupra kunkamre, ataruda er depkamre,’ konum tenemnemuma tep, ne gam kunada, kan buru deikipu deipkene. Kan tepapu teka tenekenune.
Ne naio, ikin keca dopra, ne nong deiki derinenung neng cap, ne tep, ‘Angebo popkupe,’ tenenenung neng cap tep nengeda, ‘Kan dipapu sun damai di, ne tep lyepropkamnerem’ tenen, moropkene naio.
17Atep ne nai bo kanda, ‘Ila di bicau tenepnetumdi, kan amutara pel donun ngebo ne tep, kange deipnetumdi lyepnetum’ tenen, moropkene.
Kandi, ‘Ila bicau tenepkenedi, tupa-tupa melipra, pio telep kupra derinkamkene,’ pepra, ‘Pedina upu deiki di peipnemum keca yuma deiki di lyepropnetume’ tenen, moropkene.
18Uo ne nai bo Allah Yahweh! Nedi kan tep, ‘Naio melipra lyepneo!’ pepra, engepnedi, kan tep morokenuna, cadi, ‘Ne pona tep nengdi, yana popnengopda, ali daknun’ tenen, moropkene naio.
Dinino, sun mali kecapu talepra, mali-mali kun keca tepapu weika di kunge nesala yumada, ‘Kandi sun tep wenepmempa, ali weik dakameng’ tenen, moropkene.
Tonda, sun yu neng tep, ila di wenepmemnyopda, sundi, ‘Uo ware kupmaser do?’ tenen, tenimtonapu kupmengedi, kange mun kange doupra, uku jen ban mutu, er si Sheol, betenge’ tenen, moropkene.
19Tonda, sun tali-tali upupu penge nengda, sun wenemna tep, upu men pepmanto kweipmempa, tali lup nengpu kupkamenge’ tenen, moropkene naio.
Ada, sun anengdi, nun dumsisipu kupra kunup neng pepra, balila kungedi nun tep salnong-nong kupra, mali upu pesenung nesala yuma tep pepkene.
Pio salnong-nong kamengedi, gemenga deiki di, nun tep, nyek-nyek pesenunge.
20Dinino, nun nai Allah, kanda ila di bicau teneserum ngeda, men nukmanto kurure!
Ada, kan tep, pio teka tenepra, ‘Allahdi pesere upu moupra talepmepedi, dumsisipu kunkamepe,’ tenen, kan tep kware tenenung nesala tep nengda, kandi, ‘Sun tep, amenda taru karepkamne’ tenen, pio telep keca konum ketenepra deiamsemume.
Tonda, ikin kupre taruda, sundi, ‘Gume, Allah damaipu bepepa, er dipapu melipra kalengkamser’ tenen, kan damai tupa banapu kunung neng tep, pio telep kupra derinkamserume.
Tonda, kan tep teka tenekenung nengda, kandi sun tep, katuai di telep kudinkamrem taruda, yuk-yuk nesala yuma epmengedi kael kepkamenge.
21Naio, kan tep teka tenekenung nesala yumada, kan damai inipra deipsememdi, kan dipapu inipra kalengserume.
Ada, ‘Mali kunge yu nengdi, ne mawa nesala popnung’ tenen, kan tep teka tenekenung neng yumada, kan damaipu dopra deipsemempa, teleppu kunkamepe.
Ukupra kan damaipu deipsemem pangeda, yu nengdi, mali upu yana men pepsetenge.
22Uo, ne nai bo Allah Yahweh tep nengeda, ‘Kanda pio-pio telepe,’ pepkene!
Ada tali tep gum dinin, deiyoda ake. Ada, kandi ne tep, “Pedina upu deiki di, ‘Ukupra telep kweipkamkene,’ pepra, peipkesinge yumada, tek sisi pio tep, melipra karenkamkene. Tonda, pio tep men tamkamsene,” pepra, ne tep peipnemum keca yumada, jenek kupra peteremneruma tep, ‘Telepe,’ pekenune.
Angeda, neda ila ati arum inipra kuramsipa, ne pona tep nengdi, ‘Angebo popkup’ tenen, yana warengamnei taruda, kan Allahdi aupu peipnemume.
23Ataruda, ne kange lomneua cadi, kware weik kupneu taruda, nedi aupu pepsi.
Ada, “Uo, neda Allah damai men kunune. Ne pona tep nengdi, pio karen mutupu neitamai dombenamneipa, acapu kununa cadi, Allahdi epra pio men melipnetue,” pepra, mali pepra engepsi.
Dinino, nedi kan Allah tep, moropkesi keca yumada, kandi konum gekepnemume.
Ada, nedi kan tep, ‘Naio, kan dipapu ne melipneo!’ pepra, moropkesi upuda, kandi konum gekepnemumdi, melipnemume.
24Ange tep nengda, Allahdi nun tep, ‘Ne pio mawa nesalada ake. Sun tep bicau tenesenune,’ pepra, wepra deipsemumpa, nundi kan tep dombakenup nesala yumadi, Allah Yahweh tep nun kange dipru er deikipu derinkamepe.
Allah Yahwehdi, ‘Angeda kunkamrume, angeda pio men kunkamrume,’ pepra, deriserur upu tep, tamna gum di, moupra gekepmengedi, angepu talepra kunge nesala yumada, Allahdi pio tep kalekra taleserure.