Psa 32 | XteSC | STEP | Aupuda Dauddi, ‘Mut penkamenge’ tenen, peterepu ngeda, ake.

Psalms 32

“Nun mali kunup keca yuma, Allah er damai lap pepmepepa, kaukemseredi, lyemdonkamsere,” pepu upu

1 Aupuda Dauddi, ‘Mut penkamenge’ tenen, peterepu ngeda, ake.
2 Allahdi melimrepa, teleppu kunkameng nesalada ake. Ada, nimi mali keca kunung nesala, Allah damai yangedi, “Uo, nunda mali kunup keca ake. Kan cap, kan upu cap tep, yanikenupe,” pepra, yan lape pengepa, Allahdi sun mali kun keca yuma kaukemredi, gum kupra deipyopda, anesala yumada, pio kange derinkamenge. Allahdi sun mali kunge keca tupa men tenenkamra cadi, sunda pio kange deipra kunkamenge.
3 Allahdi melimrepa, teleppu kunkameng nesalada ake. Ada, mali kun keca weik kurami dinin, Allah Yahwehdi, sun mali kuraminge tep konum kaukepudi, sun mali kuraminge yuma, gum kupra deiamudi, ka di ton cap akeca tep pio men tenerure. Tek sisa, anesalada, ila kange deipra pingpina di kunkamenge. Anesalada, mok upu pena gum dipapu, mawa di kuna cap, inipra mali kuna cap, pio men kungedi, dumsisipu kunge nesala yumada, pio ila kange derinkamenge.
Dinino, ne mali kune keca men lap peramsi taruda, ataru neitamai yuma, akecapu teneramsidi, ikin kange doupra kuramsipane, bol mali weik kuramsipa, ne puto gum kupbaramneu. Ataru neitamai yumada, pio mali pepra, engenapu kuramsipa, bol malipu kuramsi.
4 Tonda, ataru neitamaida, ne wenemna tep, Allah kan puto ngebo buru di, ne nong deiki taleramnemumpane, ikin weik kuramsi. Ukupmantoda, keteng deipre taru, keteng bupu di, tali dakuamre mokon gelal semdoramretopu, kan buru ne nong deiki deriramnemumpane, ikin weik kuramsa tep, ne putoda gum kupbaramneupa, puto bounpu kuramsi, (Sela). ^{▼▼Sela perami ngeda, Ibrani upu deiki di, ‘Selah’ sekami. Aupu deiyoda, ‘Apepmap upuda, mambul weik cadi, moupra tenipkurume’ tenen, ‘Selah’ sengami.}
5 Ukupra ikin weik kuramsanen, men kupmanto kuramsi taruda, “Konuma, ne mali kune keca yuma, tupa men inimkamne. Ne mali kunun kecada, ake, ake,” pepra, kan damai katuai di lap pepkesi. Nedi, “Mali kunun keca yuma, ne nai Allah Yahweh, er damaipu lape penkamne. Akeca yuma ton men inimtamkamne. Er tep yanitamnedi, erdi penere upu men gekenunada, ake,” pepra katuai di pepsi.
Kan damai lap pepkesipa, kanda gekepnemumdi, ne mali kuramsi keca yuma daepra, gum kupra deipnemume. Ukupnemuma tep, amenda taru yumada, kandi ne tep, ‘Kandi mali kuramum kecada ake,’ pepra, men wenemkamnerume. Konum telep kupra deipnemuma tep, ange tupa men tenenkamrume, (Sela).
6 Ange tep nengeda, Allah kandi nun gekena tep, go tupa akapsere taruda, kan tep, ‘Nun mali keca kaukepsememdi, telep kupra deipkamserume,’ pepra moronkamepe. Ada, ‘Allahdi peseretopu kunkamepe’ tenen, telep kupra dumsisi kunge nesaladi kan tep moropkenge pangeda, kandi sun moropmengetopu kunkamserume.
Ukupmantoda, nimi men tenepmenge taru, me ila di opre taruda, mutu buma deiki kunge nesalada, ila me adipapu sun ati yuma palipra men yamutamrure. Anesalada me men jeprorure.
Ange utopu, nun mali kunup keca konum kaukepsememdi, telep deipsemempa, amenda taru ila ikin wenemna keca, tuai nesala damai yaryopda, nun kaukepsemumpa, dumsisi kunkamep nesala tep, men poptapkamserume. Akeca nun damai men yankamre.
7 Ne nai Allah kandi ne tep, ‘Ikin keca doproprur’ tenen, melipra lemdongomnerume. Kandi, ne tep, ‘Kange mun keca er deiki kuprur’ tenen, ne damai kumemdi lyemdonerume.
Kandi ne popmanto taru yuma melipra lyemdoneruma cadi, yuk nesala epmengedi, ne dana-dana tara yangedi, kan tepapu pio kange deipmengedi, “Uo, Allahdi nun kabo lyemdorura cadi, angeda pio telepe,” pepra, kange lon mutu penunge. Kan tep gispal dokenunge, (Sela).
8 Ne nai Allah Yahwehdi upeserure.
Nedi, “Abisipu benkamrume,” pepra, peteremsene bisipu embankamrume. Ada, ‘Sundi talepra kunkameng keca yuma cap, sun gam kunkameng taru yuma cap, pio teleppu kunkamre’ tenen, “Abisipu embankamrume. Akun kecada telepe, angeda malinge,” pepra peteremkamsene. Ukupsenedi, sun tep kalekra melimsenepa, dumsisi bisipu embankamrume.
9 Ange tep nengeda, kuda bisam do, sapi bisam do, sundi men putapre keca akapyopda, pio balila weik kuprepa, nimi upu gekena cap, dumsisi bisi embana cap, pio men kununge.
Balila weik kununga cadi nimidi, ‘Gume, ne tenepnetopu kupkamaner,’ tenepmengedi, asapi bisam u pumbon tapu gerekmengadi, gilipropmengepa, mali kange doupra baramre. Dinino, sunda abalila keca kuramengtopu men kunkamrume. Sunda, pio moupra tenepmumdi, ne pesene upu gekepra, angepu talepra kunkamrume.
10 Sun yuma moupra tenenkamrume. Mali kunung nesala, sun damaida ikin keca cap, kange mun keca cappu yarepa doronunge. Dinino, ware nesala do yuma, sundi Allah Yahweh er tepapu, teka tenepmengedi, ‘Erdi tek sisi upupu peserura cadi, aupupu gekepra kunkamepe,’ tenenung nesalada, Allah ila di bicau teneredi, anesala tep tamna gum di, pio melimrure.
11 Ange tep nengeda, sundi Allah Yahweh tepapu, teka teneprumudi, er upu moupra gekemumdi, pio dumsisipu kurumu nesala yumada, pio kange deipra teleppu kunkamrume.
Ware nesala do, sun dipru neitamai mali keca men kwapmar dinin, malinge yuma taprumudi, dumsisipu kurumu nesala yumada, kange deipra pingpinga di kumumdi, Allah er gispal dona tep, upu ila di, “Telepe,” pepra penkamrume. Ukuprumdi, sun yuma dipru boun kurumudi, kange telepa di kunkamrume. Raja Dauddi pepu.