Psalms 33

Mut pena deiki di, “Israel nesala talepra kurum Allahda, pio telepe,” pepu upu

1Uo, sun mali keca yuma taprumudi, dumsisipu kurum nesala yumada, nun nai bo Allah Yahweh tep, kange deiprumudi, mut pepra, Allah er si erepra kunkamrume. Telep kupra kunge nesaladi, Allah tep, “Kanda pio telepe,” pepra mut penungada, pio telepe.
2Allah Yahweh, er si eremna tep, mut penkamrum taruda, mut perameng keca, er sida kecapi deiki di mut penkamrume. Ange utopu, mut perameng keca bung-bung pena er sida gambus, tapke morokyo di dutara, tapke sepuluh kuprenge dopra, Allah tep, “Telepe,” pepra, akeca deiki mut pemumdi, er si eremkamrume.
3Tonda kange lon mut, ukupu mut yala-yala yuma weprapmumdi, Allah tep si eremkamrume. Mut perameng keca er sida kecapi dopra, ila kael deiki di, telep kupra mut penkamrume.
4Allah er upu deiki di pesere upu yumada, tek sisapu kurure. Erdi nun tep, “Ukunkamsene,” pepra pediseretopu, akeca yuma pel dopra teleppu kuserura cadi, erdi persere upu yuma tep nengeda, teka pio tenenupe. Allah erdi wepra deiamseu nesalada, pio men tamserur dinin, erdi peseretopu, angepu tek sisi pel dopra kuserure.
5Mali kuna pio gum dipapu, telep kun keca yumada, Allahdi kange derirure. Tonda, nimi dipru wilimdana gum di, nimi upu bongna tep, pio dumsisipu bokra derinada, Allahdi kange derirure.
Tuai mutu ban-ban yumada, Allahdi nun tep bicau tenepra, weika di melimserur kecada, pio dekpepra kurure. Allahdi bicau teneseredi, melimserur ngeda, pio men tamrure. Pio atep bicau teneseredi, telep kudiserure.
6Allah Yahwehdi er kange dipapu, upu peipupa, adipapu im deiki cap, im neitamai kure keca yuma cap, ketekepra deipu. Im neitamai kure keca yumada, keteng cap, war cap, kuru cap yumada, Allah Yahwehdi, ‘Ketekeipkune,’ tenepudi, upu peipupa, adipapu, kunupsek pepudi akeca-keca yuma katuai kupu.
7Tonda, Allahdi ila pala laut mokon me yuma buluprapudi, tenpaipu deipu. Utopu laut mokon me yuma buluprapudi, ‘Ameda acapu kunkamre’ tenen, ila laut mokon derinai yuk ketenepra deipupa, ameda yukai men embetue. Acapu kurure.
8Ange tep nengeda, nesala ban-ban yuma Allah tep kware kunkamsere. Tonda, nun nai bo Allah tepapu, “Uo, erda ila mambul ngebo kurure,” pepra, nun tuai mutu kunup nesala yumadi, er tepapu si eremkamepe.
9Ada tali tep gume. Deiyoda, Allah dipu, “Akeca-keca yuma ukutaru kupkure,” pepupa adipapu, akeca-keca yuma kunupsengpepu.
Ange utopu, erdi aupu pepu taru dipu, akeca-keca yuma katuai kupudi, pio dimpeprappu kurure. Er upu pepka deiki dipapu, akeca yala-yala yuma ketekepra deipupa, katuai kupu.
10Nesala ban-ban yumadi, ‘Nun puto dipapu ukunkamepe,’ tenenge keca yumada, Allahdi gum kupra derirure. Dan mutu nesala do yuma, nimi tuai nesala yala-yala yumadi, ‘Ukuptepe,’ tenenge keca yuma, Allahdi gum kupra derirure.
11Dinino Allah Yahwehdi, ‘Ukunkamne,’ tenere keca yumada, tek sisi kuredi pio tep kunkamre. Utopu, Allah er kange dipru neitamai tenere keca yumada, tek sisi teneretopu kurepa, akecada, men gum kupkamre. Erdi dore kecada, pio akunkamra cadi, nimidi nyape deipmengepa, dadeipdanen bankameng nesala yuma peda, Allahdi pel dore keca dinkamenge.
12Ware mutu kunge nesala do yuma, nesala ban-ban yumadi, “Nun nai Allahda, Yahweh kurure. Er dipapu taleserepa, nunda er amutara kunkamepe,” pepra kunge nesala yumada, Allahdi melimrepa, sunda kange deipra teleppu kunkamenge.
Tonda Allahdi, ‘Sunda ne mawa nesala kunkamenge’ tenen, wepra derirur nesalada, er nyapu sisa kununga cadi, melimrepa sunda teleppu kunkamenge.
13Tuai mutu ban-ban yuma neitamai kunge nesala yuma tep, Allah Yahweh im deiki kuredi diserure.
14Tonda Allah er im deiki kururai di, tuai mutu kunge nesala yuma tep, ‘Ware kunkameng do?’ tenen, diserure.
15Allahdi tuai mutu neitamai ban-ban yuma kunge nesala, sun kange dipru ketekepra deriserura cadi, nun tenenup keca cap, kunup keca yuma capda, konum teneredi, kael kemserure. Nimi dipruai kure keca, er dipapu diserura cadi, nun kunup keca yuma diseredi kael kemserure. Nun men iniptepe.
16Tenpu mutu nesaladi, ‘Ormutu kunge nesala cap, sun ila nimi deiyo ngebo Raja cap, porbenkupe,’ tenepmengedi porbenmangepa, ortara mutu ila nimi deiyo ngebodi, ‘Sun popnenung’ tenen, er jen talen neng denge pio weik ketenepra deiptua peda, men lyepdatue.
Ange utopu, er amutara jen talen ngebodi, ‘Neda puto weik ngebo cadi, ne pe puto deiki di yuk neng popra lyepdatene,’ teneptua peda, angebo peda, er pe puto dipapu men makupra lyepdatue.
17Tonda, kuda bisam ila di nepredi, er puto weik kuptua peda, sundi, ‘Gume nun kuda bisam bali deiki bukmepedi, nun podan neng tep, popbisiptepe,’ tenena gume. Kuda bisam puto weiknge akapsetua peda, er puto deiki di, nun men lyepdatepe.
18Nun puto deiki di men lyepdatepe dinino, tek sisa Allah tep kware tenepmengedi, ‘Erda ila mambule. Er amutarapu kunkamepe,’ tenen, er tepapu talepra kunge nesalada, Allah Yahweh er diredi, anesala melipra lyemdorure.
Tonda sun anesalada, ‘Allah Yahwehdi men tamkamsere. Erda, bicau teneseredi, pio melipra lyemdonkamser’ tenen, er tepapu ketenepra dinapu kunge nesalada, Allahdi anesala tep pio melipra kalengrure.
19Allahdi anesala tep, ‘Pu jena do, nimi podana do, ikin keca di do, ne mawa nesala poprur’ tenen, pio melipra kunkamre. Utopu, ‘Jen keca gum kupbarepa, jen keca putana deiki di, depnung’ tenen, er mawa nesala tep, pio melipra kalengrure.
20Ange tep ngeda nun yumadi, ‘Nun nai Allah Yahwehdi melipra lyemdonkamser taruda, ware taru di yana lyepropkamser do?’ tenen, ketenepra dinapu kunkamepe.
Ukupmantoda, nimidi mar porbarameng taruda, ‘Yuk neng mar dopmengepa, popserur’ tenen, kelapi dopra lelipdangedi, porbaramengtopu, nun nai bo Allahdi, nun tep melipra lelemdoserure.
21Teka Allah cap, nun cap dipru dukdongopra kunupa deiki di, pingping deikipu kunkamepe. Ada tali tep gume. Nun nai Allah, erda mali keca tenpunge peda, men kuredi, er sida pio mambul weik kurure. ‘Er dipapu melipra lyemdonkamser’ tenen, er tepapu, teka tenepmepedi, er talepra kunupe. “Allah erda tek sisi ngebo kurure,” pepra, er sipu eremkamepe.
22Nun nai Allah Yahweh, ‘Nun tamna gum di, pio bicau tenesememdi, telep kupra melimkamserum’ tenen, moropkepe. Ada, nundi kan tep, ‘Nun nai Allah, er dipapu melipra lyemdonkamser’ tenen, kan tepapu ketenepra dinapu kunkamkepe.
Ukupra tenepedi, kan tepapu talepra kunkamep taru yumada, ‘Kandi melipra telep kudinkamserum’ tenen, moropkepe naio.