Psa 34 | XteSC | STEP | Aupu yumada, Dauddi mut pena deiki di pepu. Ada, pumun taru Israel nesala talepra kuramu ila nimi deiyo ngebo Abimelekdi, ‘Daud popkun,’ tenepu taru, Dauddi aupu pepu. Ada, Daud tali mutana taleamre neng, kange pio moupra tenena gum di, tali kange doupra kungetopu, kange wang-wang pena utopu kupra kuramupa, Raja Abimelekdi, Daud tep, ‘Mutana ngebo kurura tep, erda dakunkamre’ tenen, men popudi, tali dopra dokotepu.

Psalms 34

“Allahdi telep kupra melimnerura cadi, Allah tep kange deipra, er sipu eremkamne,” pepra mut pepu upu

1 Aupu yumada, Dauddi mut pena deiki di pepu. Ada, pumun taru Israel nesala talepra kuramu ila nimi deiyo ngebo Abimelekdi, ‘Daud popkun,’ tenepu taru, Dauddi aupu pepu.
Ada, Daud tali mutana taleamre neng, kange pio moupra tenena gum di, tali kange doupra kungetopu, kange wang-wang pena utopu kupra kuramupa, Raja Abimelekdi, Daud tep, ‘Mutana ngebo kurura tep, erda dakunkamre’ tenen, men popudi, tali dopra dokotepu. ^{▼▼Aupuda buku 1 Samuel pasal 21 dirume.}
2 Raja Dauddi, upepu. Uo, ne nai Allah Yahweh, tumi-tumi yuma, ne nai Allah tep, “Kanda pio telepe,” pepra, mut penedi kan si tepapu pio eremkamkene. Tonda tupa-tupa Allah er si tep, gispal donedi mut penkamne ngeda, pio men tapkamne.
3 Ne kange dipru neitamai yumadi, ne nai Allah Yahweh tep, “Erda pio teleppu kurure. Er kure keca utopunge, yuk nengdi ton pio men kununge. Erda tenpu ngebo kurure,” pepra, er si pio eremkamne. Ukupnepa, ikin pel dimengepa, kange mun kange doupra kunung nesala gekepmengedi, sun peda pingping kange doupra kunkamenge.
4 Atep nengeda, sun yuma ne damai yakankamrume. Ukupmumpa nun yumadi, “Allah er ila puto di kure keca yumada, pio teleppu kurure,” pepra, Allah er sipu eremkamepe. Akupedi, Allah er si eremepedi, kikiman gispal donkamepe. Ukupra kuramepyane, nesala weika di ton cap tapakra gekepmengedi, ‘E teka, Allah erda pio mambul ngebo kurure,’ tenepra kunkamenge.
5 Neda, ‘Ne nai Allah Yahwehdi pio melimkamner’ tenen, Allah tep mororamsipane, erdi ne mororamsinge yuma gekepra kareamneu. Ne ikin keca weik kuramneupa, kange mun kange doupra kuramneunge yumada, erdi loptapneu.
Ukupneupa, ne kware kuramneunge yumada, konum gum kupra deipneupa, telep kange doupra kuramsi.
6 Tonda, kange mun deiki dakunung nesala yumada, ‘Allahdi melimkamser ja’ tenen, sun kange yuma, er deikipu deipmengedi, er tep teka tenenung nesalada, pingpinga di kange deipra kunkamenga cadi, sun urasinda teleppu kunkamre. Tonda sun anesala yumadi, amenda taru kware kuprepa, ali pio men dangkamenge.
7 “Ne nai Allah Yahweh, ne melipneo,” pepra mororamsipa, Allah gekeramneudi, ne mororamsitopu kupra lyemdoramneu. Neda, amutara kunun ngebo dinin, ikin keca weik kuramsinge yumada, erdi loptapneupa, ne ikin kwamneu keca yuma, gum kupra deipneupa, telep kange doupra kunune.
8 Sunda, Allah er tep, ‘Ila mambul ngebo kurura cadi, erpu talepra kunkamepe,’ tenen, Allah tep kware tenepmengedi, er sipu eremenge nesalada, Allah Yahweh er im deiki pel dona ngebo malaikat, sun damai kurure. Anesala damai kalengredi, sun kange mun kupmare keca yuma tep, melipra lyemdorure.
9 Ware nesala do yuma, Allah Yahweh er kure keca yuma, moupra dipetepmumdi, sun peda kael kemkamrume. Allah Yahwehdi kure keca yumada, pio teleppu kurure.
Atep, ware nesala do yuma sundi, ‘Uo, Allah er dipapu kalekra melimkamser’ tenen, Allah er amutarapu kunge nesala yumada, Allahdi melimrepa, sun teleppu kunkamenge.
10 Ange tep nengeda, Allahdi wepra deiamseu nesala yumadi, er tepapu, ‘Uo, nun nai Allah Yahweh, ila mambul ngebo kurure. Erda pio telepe’ tenen, er amutara kunkamepe.
Ada tali tep men pepne. Allah Yahweh tep, kware kuprepa, ‘Eda ila mambul kurura cadi, er amutarapu kunkamepe’ tenen, kunge nesala yumada, sun gam kuna tep putare keca yuma karerserure. Sun gam kuna tep putare keca yuma, men gum kupkamre.
11 Ange utopu, bura tara kuramre ila pus utopu keca, ila yunge, er sida singa pus, er jen keca ton men kwapredi, jen men jepyopda, puto boun kurure.
Dinino, nun nai bo Allah Yahweh tep, si erepra kungedi, ‘Er dipapu lyemdonkamser’ tenen, er amutarapu kunge nesala yumada, telep keca tep men putarure. Sun gam kuna tep, telep keca yuma karerepa, kange mun ton men kurure. Akeca yumada, sun damai pio akunkamre.
12 Uo ne nyapu, ne damai yamumdi, nedi pepsene upu moupra gekepneso. Nundi, ‘Uo, nun nai Allah Yahweh, erda ila mambul ngebo kurure atep, erda pio telepe’ tenen, ‘Er amutarapu kunkamepe,’ tenenup keca yumada, nedi peteremkamsene. Peterepsenyopda, sundi Allah Yahweh, er sipu erepra gispal donkamrume.
13 Ware nesala do yuma, sun kan-kan neitamai di, ‘Nunda go tupa kapserepa, gam kunkamep taru yuma, telep kange deipra kunkamepe.
Tonda, nun gam kunkamep taruda, ila go karepsetupa, keteng tamun weika di ton cap gam kutepe,’ tenen, putaserur nesala yumada, nedi pepkusen upu moupra gekenkamrume. Sundi telep kunkamrum kecada ake.
14 Sun lyemu deiki di, ‘Mali upu pepnup’ tenen, pio moupra kalengdankamrume. Tonda, sun sipyal deiki di mok upu cap, mawa di pena upu cap, pio men penkamrume.
15 Tonda, ware mali kun keca do yuma, ‘Mali men kupkupe’ tenen, mali kun keca yumada taprumudi, dumsisi kun kecapu talepra kunkamrume. Ukupmumdi sun cap, sun kayapu neng cap tep, podana cap, upu deiki pangdana cap gum dipapu, yuk nesala cap antapra dipru dukdongopra, kikiman kunkamrume. Sundi, ‘Uo, yuk nesala cap, antapra telep kupra kikiman kunkamepe’ tenen, pio pe deipra dumsisipu kunkamrume.
16 Ware nesala do yuma, mali kun keca yumada, tapmengedi Allah tep teka tenepra, dumsisipu kunung nesala tep nengeda, Allah Yahwehdi pio tupa kalengrure. Ukurura cadi, ikin keca sun damai yarepa, “Nun nai Allah, nun kange mun kupsera tep, melipseo,” pepra moropmenge taruda, adipapu gekepra melimrure.
17 Dinino, mali kecapu talepra kunge nesala yuma tep nengeda, Allah er yuda, sun nong deiki deipredi, sun wenemna tep ikin keca weik karerure. Ukupra kure ngeda, tali tep gume.
Allahdi tenerur ngeda, ‘Sun amali kunge nesala wenepra poptapnyopda, sun aneng depmengepa, yuk nesala ban-ban yumadi, sun amali kurami nesala cap, mali kurami keca cap yumada, adipapu lumdonongkamenge’ tenen, amali kun nesala tep wenemrure.
18 Mali keca yuma tapra, dumsisipu kungedi, Allah er amutara kunge nesalada, sundi, “Uo, nun nai Allah Yahweh, melipseo,” pepra moropmenge taru yumada, Allah gekepredi, sun moromenge keca utopu kupra melimrure.
Sun ikin keca weik kuramya neitamai, erdi lyepra dopropredi, sun ikin kuramu keca yuma gum kupra deiprepa, telep kange doupra kununge.
19 Nimi ikin keca dopropmengedi, dipru pu jeprepa, kange mun kange doupra kununge. Ukunge taruda, dipru boun kunung nesaladi tenerameng keca, men kupmanto kupmengedi, ‘Uo’ tenen, mali kange dourameng taru cap, pio engenapu kurameng taru cap, Allah Yahwehdi, ‘Sun dipru kwadimkamne’ tenen, sun anesala damai kuredi lyemdorure.
20 Tek sisi, Allah tep teka tenepra, dumsisipu kunung nesala yuma peda, kange mun keca, sun damai ton pio weika di yarepa ngolongnunge. Dinino, ange yumada, Allah Yahweh erdi gekepra dirure. Epredi, sun anesala damai kuredi lyemdorure.
21 Allahdi sun dumsisipu kunge nesala tep, sun nong yumada, melipra dirure. Tonda, ‘Sun yo peda tenpu ton men copkamre’ tenen, Allahdi anesala tep, pio moupra kalengrure.
22 Tonda yu kange doupra, pio mali kun kecapu talepra kunge nesalada, sundi amali kecapu kununga deiki di, sun pe nengpu podankamenge. Sun pedi mali kunga deiki di depkamenge.
Tonda, Allah tep teka tenepmengedi, dumsisipu kunge nesalada, yuk nengdi sun tep wilipra deipmengedi, ‘Anesala nun songe cadi, porbenkupe,’ tenepra kunung nesala yumada, Allahdi sun anesala tep wenepra poptapkamre ja.
23 Allah er tep teka tenepmengedi, er amutara kungedi, er pel melipra donge nesala tep nengeda, telep kupra deipredi lyemdonkamre.
Ware nesala do yuma, ‘Gume, nun nai bo Allah Yahweh, er dipapu lyemdonkamser’ tenen, er amutara kunge nesala yumada, Allahdi anesala tep wenepra men popkamre. Wenemna keca, sun damai ton pio men derinkamre. Anesala tep teleppu kudinkamre.