Psa 35 | XteSC | STEP | Raja Dauddi, aMazmur upu mut seku. Dauddi pepu upuda ake. Uo ne nai bo Allah, kandi ne poryakanenung nengdi, mar poryakanenunga cadi, ‘Kandi sun aneng tep tamupra popkurume’ tenen, moropkene. Yu nengdi, ne tep, ‘Angebo poptapkup,’ tenenenge nengda, ‘Kan Allahdi aneng tep, wenepra popkurum’ tenen, moropkene naio.

Psalms 35

‘Nun poryakasenung nengdi popsenung’ tenen, Raja Dauddi Allah tep, “Melipra lyepropseo!” pepra, moropu upu

1 Raja Dauddi, aMazmur upu mut seku. Dauddi pepu upuda ake.
Uo ne nai bo Allah, kandi ne poryakanenung nengdi, mar poryakanenunga cadi, ‘Kandi sun aneng tep tamupra popkurume’ tenen, moropkene.
Yu nengdi, ne tep, ‘Angebo poptapkup,’ tenenenge nengda, ‘Kan Allahdi aneng tep, wenepra popkurum’ tenen, moropkene naio.
2 Ukupmantoda, sun jen talena nengdi, ‘Mar porbenkup,’ tenepmenge taruda, sun nong lelimna keca, er sida perisai ila nge cap, yambulnge cap, ketenepmengedi, yuk mutu neng tep porbaramengtopu, ‘Kan Allahdi, keteneipmemdi, ne pona tep neng popkurume’ tenen, moropkene.
Teka, kan Allahdi menmena tekromemdi, ne lyemna tep, yana melipkamnerume!
3 Ukupmantoda, sun jen talena nengdi, ‘Yuk nesala porbenkup,’ tenepmenge taruda, sun nimi pon keca, er sida tombak cap, yambul kapak ya cap dopropmengedi, porbaramengtopu, ‘Kan Allahdi, ketenepmemdi, ne pona tep nengda, adipapu porbenkurum’ tenen, moropkene.
‘Ne nai Allah, kandi ne tep, “Neda kan lyemna deiyo ngebo kukenune,” pepkamnerum’ tenen, moropkene.
4 Naio, sun yu nengdi, ‘Angebo popkamepe’ tenen, warengnenung nesala yumada, ‘Kandi aneng wenepra popmemnyopda, ali dakmengepa, yuk neng yumadi aneng tep, “Sunda tek sisi mali nengpu kununge,” pepra, ton cap men gispal donkamenge. Utenena tep, moropkene.
Tonda, ne nai Allah, ne podan neng tep, ‘Kandi sun upu sekmempa, sun kange pio wang-wang penapu kunkameng’ tenen, moropkene naio.
Ada, sun yu nengdi, ‘Angebo mali kweipkamepe,’ tenenenung neng tep pepne. ‘Aneng tep nengeda, kange wang-wang penangepu karepkamrum’ tenen, moropkene.
5 Ukupmanto ngeda, puto kumanya di yana puperepa, tali tu buta dopra dubaramretopu, Allah kandi amali neng tep, enepra dokotepmempa, sunda dana-dana tara yuma bendopkamenge. ‘Ukuptum’ tenen, ange ton moropkene naio.
Sun aneng sepdara bendopkameng taruda, ‘Kanda Yahwehdi, kan amutara pel dorur malaikat ton karepmempa, angebodi, amali nesala dombankamre’ tenen, moropkene.
6 Tonda, Yahweh, kan amutara pel dorur malaikat karepmempa, angebodi, amali nesala dombankamre taruda, ‘Sun aneng sepdara bankameng bisida, ulapne weik cap, kunungna weik cap kutupa, sun weika di ikin kange doupra kunkameng’ tenen, moropkene naio.
7 Ange deiyoda ake. Ada, deiyo men kupu dinin, sun amali nengdi, ne tep, ‘Angeboda tomopmepedi, popkamep’ tenen, nimi tomona keca, er sida jaring, ketenepidi, ne embaramsi bisai inipra deipneia tepa.
Ange utopu, deiyo men kupka peda, sun amali nengdi, ne tep, ‘Tu pumbon palipmepepa, angeboda, tu pumbon saka popdankamre’ tenen, ne embaramsi bisi neitamaida, ‘Angebo popkamep’ tenen, tu pumbon palipi.
8 Atep, sundi men teniptenge keca, ‘Kan Allahdi, ila ikin keca ketenepra deipmempa, ayu neng damai menmena di yatupa, kange mun kange doupra kunkameng’ tenen, moropkene naio.
Ange utopu, sundi ne pona tep, ‘Nimi tomopra pona tep keca, pena er si jerat pepra keteneipidi, inipra deipi ngeda, sun pepu yuptue’ tenen, moropkene ne nai Allah.
Sun mankau kange doupra abisi embankameng taruda, ‘Animi youna tep, pena pepra keteneipi ngeda, sun peda akeca pumbon saka popdatenge’ tenen, moropkene ne nai Allah.
9 Allah kandi melipnetumpa, ayu nengdi mankau kange doupra popdatenge teptoda, neda, kange deipnedi, kan Allah Yahweh tep, “Kanda pio telep kurume,” pepra, kange deipnedi pingping kupkamnere.
Ada, kan Allah Yahwehdi, ne tep, melipra lyemdoneruma cadi, pio kange deipra, teleppu kunkamne ja!
10 Kange deipne dingeda, ne nai Allah, kanda Yahweh tep, upepkamkene. Ada, “Uo, Yahweh, kanda pio telep kuruma cadi, ware ngebo ton, kan kuruma utopu kuptu do? Gume men kuptenge,” pepra, kan si eremkamkene.
Puto weik kunge yu nengdi, pio puto bounpu kunge nesala tep, konum tomopmengopda, sun tali kan-kan nesaladi pio men lyepdatenge. Dinino, tek sisi kan Allah Yahwehdi, sun puto boun nesalada, loptapra lyemdorume.
Ange utopu ton, sun bung keca yuma men talengedi, puto pio bounpu kunge nesalada, yu nengdi anesala tep popmengedi, yanipmengopda, kan Allah Yahweh dipapu, ayu neng popmemdi, sun tali kan-kan nesala tep, loptapra lyemdorume.
11 Tonda, ne tep nengeda, pio yu nengdi, ‘Angebo tep mali kweipmepedi, poptapkamepe,’ tenepnengedi, ne tep minina upu penenunge.
Ada, deiyo men kwapmarepapu, sundi ne tep, “Erdi mali kupu ngeda, ake, ake,” pepra, tali upu dipapu penenung dinin, tek sisi ngeda, akeca yumada, nedi pio men kuramsa cadi, angeda ne pio walwale.
12 Ne dingeda, telep kunangepu kunun dinin, sundi ne tep nengeda, tamupra mali kun kecapu kungedi, ikin keca weik ne nong deiki derinenunge.
Ukupnengopda, ne kange dipru yumada, ikin kuneredi, dipru bulungsangnapu kunerepa, men kupmanto kunune.
13 Sundi ne tep, malipu kudinenung dinin, sun pu jeramre taruda, nedi sun melimna tep nengeda, telep kunangepu kunune.
Sun ila kange mun pu jeramupa, nedi, kenengamsi telep opkalda, kwiriptapsidi jen keca yuma tapra, jen jena gum di, mali kange doupra, ikin weik kupneupa kuramsi.
Tonda, sun pu jeramu taruda, nedi sun tep Allah mororamsi dinin, erdi ne moromsitopu men karepneuopda, ‘Uo’ tenen, mali kange doupsidi, ne gisoda ne taram deiki deipra engepsi.
14 Ada, ne kap sisa do, ne weit yapu sisa cap, ne du yapu sisa cap do, konum depmatengepa, nedi mali kange douptenedi, ila di engenapu kutenetopu, sun aneng tep tenepsidi, bicau kupneupa, engepsi.
Ange utopu, nanin sisa deptupa, pio mali kange doupra, giso genepdongopra embaramtenedi, engepra ngolongamtenetopu, sun aneng kange mun pu jeramu taruda, aneng tep tenepsidi, pio bicau kupneupa, engenapu kunmasi.
15 Sun ikin weik kurami taruda, nedi sun tep engeramsi dinino, neda ikin weik kuramsi taruda, ayu neng yuma buluprapidi, kange deipra kurami.
Kange deipi dingeda, sundi, “Kikiman bulupmepedi, angebo tep, porbenkamepe,” pepra, upu taleramidi ketenepi.
Ton nimi pona tep yu nengda, ne pio men kael keamsi dinin, sundi ikin keca weik dopra, tamna gum di, ne nong deiki pio deriramnei. Ukuramneidi, ‘Pio tupa-tupa popkup’ tenen, pirirterenapu kuramnei.
16 Sun anengda, Allah tep pio men kael keamenge nengdi kuramengtopu, Allah tep tenena gum dipapu, ne tep pio nyek-nyek pepra, mali upu peramnei.
Sun anengda, ne tep, ‘Angeboda, nun pio songe,’ teneramneia tep, pio mali upu weik peramnei.
17 Uo ne nai Allah, kanda akeca-keca yuma talememdi, ila puto deiyo ngebo ^{▼▼Allah – Akayat neitamaida, Allah er si tep, Ibrani upu deiki di, ‘Adonai’ pepra seki. Aupu ‘Adonai’ pepya deiyoda, ake. Ada, ‘Akeca-keca yuma taleredi, ila puto weik deiyo ngebo kurura cadi, er teneretopu kurure’ tenen, seki. Atep nengeda, sun kael kemna tep, aupu deiyongepu katuai di sekmepu. Indonesia upu Allah upu buku neitamaida, ‘TUHAN’ pepra sengnunge. Dinino, aupu ‘Adonai’ pepra, tek sisi deiyo akapu ngeda, sun kael kemna tep, nundi konum katuai di sekmepu.} kuruma cadi, ware kuprap taru di, aneng kunge keca tep, tali ton dinapu kunkamrum do?
Atep naio, ayu nengdi ila ikin keca ne nong deiki deipnengedi, mali weik kudinenunga cadi, ‘Kan Allahdi ne damai tamupra yamemdi, lyepkamnerum’ tenen, moropkene.
Ukupmantoda, bura tara kuramre ila yu pus, er sida singa, ayu pusdi ne popra jepnetu utopu, sun yu nengdi utopu kunenunga cadi, kan dipapu, ne damai yana lyepropneo naio!
18 Ne nai Allah, kandi ne tep konum lyepropnemem pangeda, nun Israel yala nesala yuma, ‘Allah er sipu eremkamepe’ tenen, bulupmepedi, kan si eremna ati damai kikiman benkamep taruda, nedi kan tep, “Naio pio telepe pepkene,” pepra, kan sipu eremkamkene.
Teka, nun Israel nesala yuma, nimi men nukmanto kupra bulupmepedi, kan si eremna tep kikiman kunkamep taruda, nedi, “Allah kanda, pio teleppu kurume!” pepra, kan si eremkamkene.
19 Atep ne nai Allah, deiyo men kwapmarepapu, sun yu nengdi, ne tep, ‘Angeboda popkamepe,’ tenen, pirirterenenung nengda, ‘Sundi popnengedi, autupra kange deipnenung’ tenen, ‘Kan dipapu, ne tep, lyepropkamnerum’ tenen, moropkene.
Teka, ne deiyo ton men kwapmarepapu, sun yu nengdi ne tep, ‘Angeboda, nun pio song cadi, popkamepe,’ tenenenung keca yuma tep nengeda, ‘Kan Allah dipapu sun upu sekmempa, sundi men kupmanto kunkameng’ tenen, moropkene naio.
20 Ada tali tep men moropkene. Deiyoda, sun ayu nengdi, “E, nun yumada podana gum dipapu, tali kange deipdana, teleppu kikiman kunkamepe,” men penunge.
Ange pio gum dinin, sun ayu nengda, minina upu cap, tali upu cap, mok upu cap, tenengedi, amutu neitamai teleppu kupra, tali dim pepra kunup nesala tep, tali upupu pertamsenunge.
21 Ayu nengdi, ne tep, ila upu deiki di, mali upu weika di penenunge.
Sun anengdi, ne tep, ‘E, er angebo konum mali kuramu ngeda, nun konum diramupu,’ pepra, minina upu di penenunge.
22 Ange tep nengda, Allah kandi akeca-keca yuma talepra, ila puto weik kuruma cadi, Allah Yahweh kandi konum diseruma cadi, upu pena gum di, tali dim pepra men kunkamrume naio.
Neda pio ikin weik kunerurada, kan konum kael kemruma cadi, ‘Kanda karenaipu men kurume, dinin, ne damai yamemdi, melipra lyepkamnerum’ tenen, moropkene naio.
23 Atep, menmena di bukromemdi, ne lyemna tep, meneng ne damai apu yamemdi, kalengkamnerume naio.
Ada tali tep gum dinin, kanda ne si eremkenun Allah, kanda akeca-keca yuma talememdi, ila puto deiyo ngebo kuruma cadi, ne melipra lyemdona tep, menmena yankurume naio.
24 Allah kandi nun tep, “Ange kunkamrume, angeda pio men kunkamrume,” pepra, deiamsemum upu peseretopu, kandi tupa-tupa dumsisipu kuruma cadi, mali nengdi ne tep, minina upu penenung dinin, kandi yana ne tep upu bokeipnemempa, nimi yumadi kael kepkamenge. Ada, ne mali men kuramsi ngeda, kandi katuaipu kepra deipmempa, sundi kael kepkamenge.
Allah kandi ne tep, kange di tamupra telep kweipnetum pangeda, sun mali yu nengdi, ne tep men popnetenge. Tonda, sundi ne tep, kange deipra men autupnetenge.
25 Ayu nengdi, “E, konuma, ‘Angebo poptepe,’ tenen, putapseutopu, ukutaru konum kupmap adano,” ‘Pepdanung’ tenen, ne nai Allah kandi, sun upu sengkamrume. Ukupmem pangeda, aupu pio men pepdatenge.
Ange utopu ton, ‘Sun yu nengdi, mali upu pepsenung’ tenen, Allah kandi upu sekmemdi, aneng tep popkamrume. Sundi pesenung upuda ake. “E, angebo konum popmepudi, sikke bukra deipmupke.
Ukupmantoda, nimidi jen keca dopra jepropmengepa, ajen keca gum kuramretopu, nundi angebo konum gum kupra deipmupke,” pepra, ‘Kange deipra pepsenunga’ tenena tep, ne nai kan dipapu aneng yuma popra, gawal dakurume.
26 Teka ne nai Allah, ware neng do yuma, sundi ne tep, “Er ikin weik kunmara tep nengeda, nundi kange deipmepe,” pepra, autunenung neng yumada, ‘Kandi aneng wenepra popmemnyopda, sunda kange tenimtonapu kungedi, ali weik dangkameng’ tenen, moropkene naio.
Tonda ne nai Allah, ware neng do yuma, sundi ne tep, “Angebo popra, nun amutara kepra deiptepedi, nunpuda ereipdapedi, amutu yuma nunpu talepra nimi deiyo neng kunkamepe,” pepra, ne tep ‘Song’ tenenenung neng yumada, ‘Kandi aneng wenepra popmemnyopda, sunda ali weik dakmengepa, yuk neng yuma epmengedi, aneng tep, ‘Dakwapye, sunda pio mali neng pua,’ tenepmengedi, ‘Aneng tep, ton cap gispal men donkameng’ tenen, moropkene naio.
27 Dinino, ware neng do yuma, sunda, ‘Allahdi Daud tep, konum dumsisi kupra upu bokeipudi, kange di tamupra konum teleppu kupra deipupa, teleppu kunkamre,’ tenen, putaprepa, ne tep kange derinenung nesala yumada, pingping kange doupmengedi, kange deipra ila upu di, “Angeda, pio telepe,” penkamenge. Nedi, ‘Ukuptenge’ tenena tep, kan Allah tep moropkene naio.
Tonda, ne tep kange derinenung nesala yumadi, tupa-tupa penkamenge. Ada, sundi, “Uo, nun nai Allah, er si Yahwehda, pio puto weik cap, pio telep cap kurure,” penkamenge.
Tonda sundi, “Uo, nun nai Allahda, er tep teka tenepra, er amutara kuredi, er pelpu talepra kure nimi deiyo ngebo Daud tep, Allahdi er Daud tep bicau tenepredi, kange deipra melimrepa, teleppu kunkamre,” penkamenge.
28 Aneng yumadi upepmengopda, ne peda kan si tepapu eremkamkene. Ada, “Kanda Allah, pio telep kupra dumsisipu kurumnge yuma cap, pio teleppu kurum keca yuma capda, pio-pio telep kurure,” pepra, tupa-tupa lap penapu kunkamne. Kan sipu eremkamken ja!