Psa 36 | XteSC | STEP | Raja Dauddi aupu Mazmurda seku. Ada Allah upu mut pena deiyo ngebo karepkamenga tep seku. Daudda, Allah Yahweh er amutara kuramudi pel doramu.

Psalms 36

Nimidi mali kuramenge cap, Allahdi pio telep kuramrenge cap tep, Dauddi pepu upu

1 Raja Dauddi aupu Mazmurda seku. Ada Allah upu mut pena deiyo ngebo karepkamenga tep seku. Daudda, Allah Yahweh er amutara kuramudi pel doramu.
2 Allahdi, ‘Angeda kunkamrume, angeda pio men kunkamrume,’ pepra deiamseu upuda, sun mali kun kecapu talepra kunge nengdi, aupu yuma yaniptapmengedi, sun dipru neitamaida, mali kunangepu putarepa talepra kununge.
Ukununga tep, sunda, ‘Allahdi nun mali kunange tep, yu kuprepa, wenepserur’ tenen, pio kware men kununge. ‘Allahda, dakwapye,’ tenepra, er tep kaukemnapu kununge.
3 Ukununga deiyoda, sundi sun pe tep, ‘Nunda pio telep nengpu kunupe,’ tenedanunga tepa.
Tonda, sundi, ‘Gume, nundi mali-mali kun keca pio weika di kunup ngeda, ware ngebodi kael kepsetudi, wenepsetenge do? Men disenunge,’ tenen, tali lupra mali-malipu kununge.
4 Sundi mok upu penunga deiki di, yuk nesala tep, ikin keca karenunge. Ukununga deiki di yuk nengda, ikin kange doupra engenunge.
Sun mali kun kecapu talepra kunge nengdi, dumsisi kunange cap, ila kael kepmengedi kunung nge cap yumada, konum tapi.
5 Sundi, ‘Ukutaru mapkup’ tenen, ason deiki beipye peingnung taru peda, sundi, ‘E, wareto mali kun keca ton kuptepe do?’ tenen, pio tenimnapu kununge.
Ukununga cadi, sundi konum balila deipra kungedi banung bisida, mali bisipu epra bangedi kununge.
Tonda, Allahdi, ‘Angeda kunkamrume, angeda pio men kunkamrume,’ pepra deiamseu upu yumada, sundi moupra talena gum di, tupa-tupa tamnunge. Dinino, mali kun kecada, pio men tamnunge.
6 Dinino, ne kaele. Ne nai bo Allah Yahweh, kandi, ‘Sun tep telep kupra derinkamsene,’ pepra, pedina upu deiki di peipsemum nge yumada, tek sisi pio kunkamserume.
Tonda, kandi nun tep, ila di bicau tenesememdi, pio tamna gum dipapu, tupa-tupa melimserume. Kandi, ‘Ukupkamne,’ peserem utopu kupra kurume. Ukupmantoda, im neitamai duada, pio im deiki tara pio weik akuramretopu, kandi tupa melimserumnge peda, pio weik akurure.
7 Tonda, ila mutu longna gum deiki di, pio abungamretopu, kandi dumsisi kun kecapu kurum ngeda, men gum kupmanto. Mali kuna pio gum dipapu, teleppu kurum ngeda, pio kunkamrume.
Ukupmantoda, ila laut mokon kaurye men nukmanto kuramretopu, kandi, ‘Ukupkamne, ukupkamne,’ tenepmemdi kurum keca yumada, nimidi men tenepra kael keptepe.
Teka, nun nai Allah Yahweh, wareto keca do yumada, bura tara tali gam kure keca pe, tuai nesala yuma peda, kan dipapu melipra lyemrume.
8 Ne nai Allaho, kandi nun tep, ila di bicau tenesememdi, ‘Ukupra telep kweipkamsene,’ pepra, pedina upu deiki di pepsemem ngeda, pio tamna gum dipapu, tupa-tupa melimserume. Nedi, ‘Uo, angeda pio telepe,’ tenenune.
Ukupmantoda, ner ayam madi, er nyapu yuma, er pol amutara deipredi kalengrur utopu kupra, nimi-nimi yumadi, kan damai yana kungopda, kandi, pio tep melipra kalengkamserume.
9 Naio, kan kumemnyai di, sun jen keca yala-yala yumada, kan dipapu, kan damai kunge nesala tep, pio weika di melipra karenkamserume.
Ukupmantoda, nimidi, pio telep embaramre me neitamai di, ‘Me jepkup’ tenen, me gwepra jepmengedi, kange deriramengtopu, kandi telep keca yala-yala yuma melipra kareseremnya deiki di, nun kange deipra kunkamepe.
10 Deiyoda, nun gam kuna cap, isin cap yumada, kan Allah dipapu kareseruma deiki di telep kunupe.
Ange utopu, kandi ila kael kemna deiyonge cap, tonda, akwapre keca yuma cap tep, ‘E, deiyo ngeda ake,’ tenen, moupra tenenup keca deiyonge peda, kan dipapu kareserume. Ukupmantoda, kandi dirine deiyo keca karepsememnya deiki di, pio telep kupra dinupe.
11 Nun nai bo Allaho, nundi kan tep, teka tenepra kael kemkenup nengda, ‘Kandi nun tep, ila di bicau tenesememdi, ‘Ukupra telep kweipkamsene,’ pepra, pedina upu deiki di pepsemum ngeda, pio tamna gum dipapu, tupa-tupa melimkamserum’ tenen, moropkene naio.
Tonda, ‘Mali kuna gum di, sun kange dipru neitamai dumsisipu kunge nesala tep, melipra lyemdonapu kunkamserum’ tenen, moropkepe!
12 Ange utopu, ‘Sun balila kange doupra kungedi, salnong-nong kamenge nengdi, ne tep popnengedi, amutarapu kepra deipnenung’ tenen, ‘Kandi kalekra melipnemempa, teleppu kunkamne’ tenen, moropkene.
Tonda, ‘Sun mali kecapu talepra kunge nengdi, ne tep popnengedi, enepra yukai donoknenung’ tenen, ‘Melipra kalengkamnerem’ tenen, moropkene naio.
13 Sun yuma dipetepso! Sun mali kun kecapu talepra kunge nesalada, Allahdi konum poptapmarpa, konum tu deiki sakmangdi, sun urasinda, tu deikipu mapmang adano!
Allahdi amali nesala konum popra sikke buktapmara cadi, kange di ton cap, tamupra bukmengedi men tekamenge.