Psa 37 | XteSC | STEP | Raja Dauddi pepu. Sun mali kun kecapu talepra kunge nesaladi, mali kupmengepa epmumnyopda, sundi, ‘Uo, ware kupkamep do?’ tenen, mali kange doupra men kunkamrume. Ange utopu, sun mali kecapu talepra mali weik kunge nesala, epmumdi, ‘Uo, sun mali kunga deiki di, talenung kecada, nun peda ton taleptepe’ tenen, dipru engena meme. Sun mali kunge nesaladi kunge keca yuma cap, talenung keca yuma cap tep, ‘Uo, ne peda ton doproptene’ tenena pio gume.

Psalms 37

“Mali kunung neng tep, ‘Uo’ tenen, mali kange doupra men kunkamrume,” pepu upu

1 Raja Dauddi pepu. Sun mali kun kecapu talepra kunge nesaladi, mali kupmengepa epmumnyopda, sundi, ‘Uo, ware kupkamep do?’ tenen, mali kange doupra men kunkamrume.
Ange utopu, sun mali kecapu talepra mali weik kunge nesala, epmumdi, ‘Uo, sun mali kunga deiki di, talenung kecada, nun peda ton taleptepe’ tenen, dipru engena meme. Sun mali kunge nesaladi kunge keca yuma cap, talenung keca yuma cap tep, ‘Uo, ne peda ton doproptene’ tenena pio gume.
2 Aupu pepmasena deiyoda, tali tep men pepsene. Deiyo ake. Ukupmanto sun amali kunung nesalada, mutmuta ue tenpu bongopra tekredi, telep kupra bongopmaryane, keteng bupu dopredi teng-teng pepyopda, adipapu koludoramre utopu, sun mali kun kecapu talepra kunge nesala yumada, menmena gum kupbankamenge.
Tonda, nimidi wa pepra yal keca kouamengepa, mo men cemamredi, ayal keca deiki men douryarepa, er bo nunum doramretopu, amali kunge nesala peda, menmena gum kupbankamenge. Pio men kunkamenge.
3 Sunda, mali kunge nesala tep, ‘Anengda telep kununge,’ men tenenkamrum dinin, tuai mutu neitamai kunkamrum taru yumada, ‘Allah er dipapu melimkamser’ tenen, sun nai bo Allah Yahweh tepapu, teka tenepmumdi, dumsisi pelpu donkamrume.
4 Sundi, ‘Nun nai bo Allah Yahweh, erda pio mambul ngebo kurura tep, er tepapu pio kange deipra kunkamepe,’ tenepmumdi, Allahdi, ‘Ange telepe,’ tenere kecapu talepra kunkamrume.
Ukupra kumumnyopda, sun dipru neitamai di, pio putaserepa tenenmamumtopu, Allahdi karenkamsere. ^{▼▼sun putan keca karenkamsere – “Sun putasere keca Allahdi karenkamsere,” pepu ngeda deiyo butene kurure. Tenpu ngeda, konum sekmepu. Butene ngeda, ake. Ada Allahdi sun dipru neitamai pel dorepa, amenda taruda telep kecapu putankamsere. Ada, Allahdi, ‘Ange telepe,’ tenerengepu, putaserepa, telep kun kecapu talepra kunkamrume.}
5 Atep nengeda, sun nong yuma dopra, Allah er tep karepmumdi, utenenkamrume. ‘Allah er dipapu kalekra melimkamser’ tenen, er teppu weika di teka tenepmum pangeda, Allahdi sun tep, melimkamser ngeda lap pepkusene. Ada ake. 6 Yuk nengdi sun tep, deiyo men kwapmarepapu, luludina upu deiki di, ‘Sun mali kununge,’ pepra ikin keca sun nong deiki derinkamseng dinin, sundi Allah tep teka tenepmumnyopda, amenda taru sundi dumsisipu kurumu keca yumada, Allahdi katuai kupra deipkamsere.
Ukupseryopda, yuk nesala yumadi, ‘Uo, sunda tek sisi telep nengpu kununge’ tenen, kael kepkamenge.
Ukupmantoda, keteng dukduk taru, keteng dirine pio weika di kuramretopu, amenda taru Allahdi sun telep kumum keca katuai keipserepa, nimi yumadi epmengedi kael kepkamenge. Sundi teleppu kuramrumpa, yuk nengdi teka men teneramsei dinin, amenda taru Allahdi sun telep kuramrum keca yuma tep, katuai kupra deipkamre taruda, nimi yumadi kael kepkamenge.
7 Atep nengeda, mali kunge nesala yuma sundi pel dopbange taru di, ‘Ange kupkamepe,’ teneramitopu nong konum kupre pangeda, sun teka tenemum nesaladi, ‘Uo, ware deiyo keca tep, sun tenenung keca nong kuprepa doronung do?’ tenen, mali kange doupra men kunkamrume.
Sun mali nengdi, ‘Mali kun kecapu talepra kunkamepe,’ tenepmengedi, upu sisingnung keca konum kupmengopda, sun teka tenemum nesaladi, ‘Uo,’ tenen, mali kange men dounkamrume.
Ange men kunkamrum dinin, sundi tupa teka tenemumdi, ‘Allahda dan taru melimyankamser do?’ tenen, dipru bouna di amutarapu kumumdi ketenepra dinapu kunkamrume. Ukuramumpane, tek sisi Allah er tenepu tumi konum kupre pangeda, er teneputopu nong kupkamre.
Sun teka tenemum nesaladi, ‘Allahdi menmena melipsetupa, teleppu kutepe,’ tenena gume. ‘Allah er tenepu tarupu telep kupra deipkamsere’ tenen, telep kange doupra kunkamrume.
8 Sun teka tenemum nesala yumadi, tulum kuna cap, yuk neng tep deremdana cap, men kunkamrume. Atenemumnge yumada, tapmumdi, amnyo karekra telep kun bisipu bankamrume. Sun tulum kupserepa derepdamumdi, ‘Uo, warya tep do?’ tenepmum pangeda, amenda taru ikin keca cap, mali kun keca cap kupkamsere. Atep nengeda, tulum kuna cap, deremdana cap pio men kunkamrume.
9 Apepmasen upu yumada, tali tep men pepsene. Deiyoda ake. Sun mali kun kecapu talepra kunung nesalada, Allahdi tenepu taru konum kupyopda, Allahdi amali kunge nesala yuma tep, adipapu gum kupra deipkamre.
Dinino, ware nesala do yuma, sundi, ‘Gume, Allah Yahweh er dipapu melimkamser ja,’ tenepra kunung nesalada, Allahdi kareprepa, sun anengdi amutu yuma talepra kunkamenge.
10 Atep nengeda, tenipkurume. Sun mali kun kecapu talepra kunung nesalada, Allahdi gum kupra deiprepa, epetepkamep dinin, ton men epkamepe. Ue yambulanun ton dakuramepyanen, Allah tenepu taru konum kupyopda, amali kun nesala yuma gum kupra deipkamre.
11 Dinino, sun dipru eremna gum di, bouna di dipru amutarapu kupra dumsisi kunung nesalada, akarepkamre mutu talepmengepa, Allahdi akeca yuma tali yamupra karerepa, pio teleppu kupra kunkamenge. Yuk nesala cap dipru dukdongopra kikiman kunkamenge. Pio mali kange doupra men kunkamenge.
12 Mali kun kecapu talepra kunung nesala yumadi, dumsisipu kunge nesala tep, ‘Sun anengda ware kuptepya deiki di poptepe do?’ tenenunge. Tonda, ‘Anengda, ware kupra popkamep do?’ tenen, sun mali kunge nesaladi, sun telep kumum neng tep, yu kange doupmengedi mali upu pesenunge.
13 Dinino, sun amali kunung neng tep, Allah epredi teneryada, ‘Konum dena damai kunmang neng’ tenen, Allahdi amali kunge nesala tep nalepra auturure. Ada tali tep gume. Allahda akeca-keca yuma taleredi, ila puto weik ngebo kurura cadi, erdi, ‘Anesala tep nimi upu lepsisikra bokeipnedi, anesala wenepra popkamne taruda, konum dam kupmare,’ tenepredi, anesala tep auturure.
14 Sun amali kunung nengdi, ‘Tali kankan kunge nesala cap, akeca-keca yuma men talengedi, akeca yuma putare nesalada, popkup’ tenen, nimi pon ya dopra ketenemnunge. Tonda, ‘Sun kankan kunge nesala yuma poptapkup’ tenen, mar pina gum-gum tara jen tapu deiki dimdonunge.
Ukununga deiyoda ake. Ada, ‘Dumsisi kun kecapu talepra kunung nesala yumada, nun songe. Anesala yumada poptaptepe,’ tenenunge.
15 ‘Dumsisi kunge nesala cap, kankan kunge nesala cap popkupe’ tenen, ketenemnung dinin, sun pe adounung takke keca yuma dipapu sun pedi sun pe nengpu podidankamenge. Tonda, sun adounung jen yumada gakra sakropkamre.
16 Atep nengeda, nedi pepkusen upuda, moupra gekepkurume. Allah tepapu teka tenepra kunung nesaladi talenung kecada, yambulpu kurure. Dinino, sun mali kun kecapu talepmengedi, tali lupra kunung nengdi, talenung kecada, pio weik kurure. Sunda isomka neng kununge.
Dinino, Allah er kangeda, ‘Dumsisipu kunge nesalada pio teleppu kununge. Sun mali kunge nesaladi, bung keca weik talenung dinin, pio malipu kununga cadi, ne songe,’ tenerure. Atep, Allahdi utenerure. ‘Sun kankan kunung dinin, dumsisipu kunge nesalada telep kununge. Mali kupmenga deiki di isomka kunge nesalada, pio malipu kununge,’ tenerure.
17 Apepmasen upuda, tali tep men pepsene. Deiyoda, ake. Sun mali kunge neng, sun puto deiki di talenung keca yumada, Allahdi anesala wenepredi gum kupra deipkamre. Dinino, Allah tepapu teka tenepra dumsisipu kunung nesalada, Allah er ila puto ngebodi, anesala tep erepra melimrepa, teleppu kunkamenge. Allahdi dumsisi kunge nesala melipra kalengrura tep pepsene.
18 Sun dumsisipu kunung nesalada, mali kun keca tenpunge peda men kununga cadi, Allah er si Yahwehdi, anesala tep, pio moupra diredi kael kemrure. Atep nengeda, Allahdi sun aneng tep karenkamre keca yala-yala yumada, pio men gum kupkamre. Allahdi sun menenga keca karerepa, anesala cap, akeca cap pio akunkamre. Anesalada men gum kupkamenge, pio akunkamenge.
19 Dumsisipu kunung neng, sun damai kange mun keca yankamre taruda, pio ikin kuprepa, sundi, ‘Uo, ware kupkup do?’ tenen, kange mun kange doupra, sun teka tenemi keca men tamnunge.
Pio ikin keca weik kupya peda, tamna gum di pio kange deipra teleppu kunkamenge. Tonda sun jen putan taru kupya peda, anesala sun kunkamengaida jen keca tupa akapnapu kunkamre.
20 Dinino, sun mali kun kecapu talepra kunung nesalada, sun damai kange mun keca yankamre taruda, pio ikin kuprepa, Allahdi anesala yuma pio gum kupra deipkamre. Tonda, nun nai bo Allah Yahweh ^{▼▼Yahweh – Allah er si, tek sisi ngeda, Yahweh kurure. Indonesia Alkitab neitamaida, Allah er si Yahweh kwamngaida, ‘TUHAN’ sengnunge. Aupu kael kemna tep, lap pena upu nomor 49 dirume.} tep, ‘Nun songe,’ tenenung nesala tep, Allahdi gum kupra deipredi gawal dakamre. Ukupmantoda, mutmuta paramya neitamai di, kait-kait keca popmarepa, urasin pio telep kuramre.
Dinino, keteng bupu douprepa, yaredi menmena kolupra akait keca kamsangredi, gum kuramretopu, sun aneng peda, gum kupbankamenge. Ada, dakunmangane, uku jenmarya ket welepredi, gum kuramretopu, sun mali kunge nesalada, menmena gum kupbankamenge.
21 Mali kecapu talepra kunung nesaladi, yuk neng sun keca tep, ‘Ne kabo, kan keca ton kareamnemempa, amenda taru ne keca dopra yo punupkamkene,’ pepra, mok upu pertamnung dinin, tek sisi, sundi ke taru tep doronung keca yumada, tamupra men karenunge.
Dinino, sun dumsisipu kunung nengda, sun kayapu nengdi putapyopda, sun putan keca kange telepa di yamupra karenunge. Bicau tenepra karenung ngeda, yambula di men karenung dinin, weika di yamupra karenunge.
22 Allahdi telepepu kupra derinkamre nesalada, sundi amutu yuma talepra kunkamenge. Dinino, Allahdi, ‘Sun anengda malipu kununga cadi, ne songe,’ tenerur nengda, amutu neitamai men kunkamenge. Enepra yukai dopredi, amenda taru anesala yuma gum kupra deipkamre.
23 Ware nesala do yuma, dumsisi bisipu banung nesalada, Allahdi anesala tep melipra kalengrure. Allahdi anesala tep melimrepane, sun kunkameng keca yumada, teleppu kuprepa, nong kupkamre. Deiyoda, Allahdi anesala pio moupra taleredi teleppu kunkamenge.
24 Ukupmantoda, Allahdi melipra talenkamre nesalada, bankameng bisi neitamai di yan giso gel dukamre dinin, tuai saka dourbengepa men popkamre. Deiyoda, ‘Anesala saka poprur’ tenen, Allahdi aneng tep, sun buru moupra talerure.
25 Ada tali men pepne. Ne kaber kuramsi taru di dipdongopra wisi deipsi taru yuma kunedi dinunada, Allah er tep teka tenengedi, dumsisipu kunung nengda, sun aneng tep men tamrure. Pio moupra tupa kalengrure.
Tonda, sun aneng deipipa, dadeipdanen yakanung nyapu yumada, Allahdi taprepa, ‘Yuk nengdi karenkamseng’ tenen, tali lupra moropra jerameng neng utopu men kunkamenge. Allahdi anesala cap, sundi derinung nyape cap tep, akeca-keca yuma tali yamupra karerure.
26 Allah tepapu teka tenepra dumsisipu kunge nesaladi, sun yuk neng tep, “Ne keca keana tep doropmamemyane, tamupra karepkamnerume,” pepra, weika di karenunge. Tonda sundi yuk neng tep tali karenung kecada, meteka dipu men karenung dinin, akeca yuma yamupra karenunge. Atep nengeda, sundi derinkameng nyapuda, Allah melimredi, anyapu yumada, teleppu kunkamenge.
27 Atep nengeda, mali kungenge yala-yala yuma tapmumdi telepngepu talepra kunkamrume. Ukupmumnyopda, adeiki di sundi deipmumpa dadeipdanen bankameng nesaladi, akunup mutu yuma talepra kunkamenge.
28 Angeda tali tep men pepsene. Deiyoda ake. Sun dumsisipu kunung nesalada, Allah er si Yahwehdi sun anesala tep ila di bicau teneredi pio melimrure.
Tonda, ware nesala do yuma, nun nai bo Allah tep, ‘Erda ila mambul ngebo kurura cadi, er amutarapu kupedi, erdi perur upu moupra talepmepedi, dumsisipu kunkamepe,’ tenen, teleppu kunge nesala yumada, Allahdi pio men tamkamre.
Anesala cap, sundi deipmengepa dadeipdanen bankameng nesala peda, Allahdi anesala yuma tep pio kalekra melimkamre.
Dinino, sun mali kun kecapu talepra malipu kunge nesala cap, sundi deipmengepa, dadeipdanen bankameng nesala yuma peda, Allahdi anesala tep wenepra popyopda, sun yuma gum kupbankamenge.
29 Allah tep teka tenepra, dumsisipu kunge nesalada, pio tep amutu talepra kunkamenge. Tonda, sundi deipmengepa dadeipdanen bankameng nesala yuma peda, akunup mutu neitamai yuma talepra pio tep kunkamenge.
30 Dumsisipu kurur ngebodi upu perurada moupra tenepetepredi, ila kael upupu perure. Ange utopu, angebodi perur upu yumada telep upupu perure. Ada, nimidi kuramengtopu kupra, dumsisi kupra upu lepsisikra bongdirure. Tali upu cap, mawa di pen upu capda, pio men perure.
31 Er angeboda, Allahdi, “Angeda kunkamrume, angeda pio men kunkamrume,” pepra deiamseu upuda, pio moupra dipru neitamai deipudi kurure. Allah er tek sisi upupu tenepra kurura cadi, er kure keca yuma teleppu kurure.
Ukupmantoda, olapne di, olaproprepa men sangamengtopu, kurure. Mali kun keca talepra men kurura cadi, erda mangkau kange doupra mali men kurure.
32 Mali kun kecapu talepra kunung nesaladi, sun dumsisipu kunge nesala tep, ‘Uo, anengda nun song tep, go dan taru ton kutupa, anesala poptepe do?’ tenen, tupa kalengnunge. ‘Aneng poptepe’ tenen, putarepa, inimengedi, sun dumsisi kunge nesala tep, pio dinapu kununge.
33 ‘Dumsisi kunge nesala poptepe’ tenen, pio kalengnung dinino, Allah er si Yahwehdi, sun dumsisi kunge nesala tep, ‘Ada, ne mawa nesala kununge’ tenen, tupa-tupa melipra kalengrura tep, sun mali kecapu talepra kunge nesaladi yana men poptenge.
Tonda, mali kunge nesaladi, sun dumsisipu kunge nesala tep, tomopmengedi nimi upu lepsisikra bongdina deiyo neng damai dubenkameng dinin, ‘Aneng ateng koupra wenemna ati dongopmepepa, amenda taru sun deiyo nengdi poptapkameng’ tenen, kunkamenge.
Dinino, Allahdi sun dumsisi kunge nesala tep, pio melipra kalengrura cadi, sun upu bongdina deiyo nengdi anesala men poptapkamenge.
34 Atep nengeda, ‘Allah Yahweh er dipapu melimkamnere,’ tenepmumdi, er peiamseu upu tepapu moupra talemumdi pio pe deipra dukdongopra kunkamrume.
Ukupmumnyopda, Allahdi sun erepra deipserepa, sundi amutu yuma talepra kunkamrume. Tonda, amenda taru, Allahdi sun mali kun kecapu talepra kunung nesala tep, wenepredi poprepa, pio gum kupra deipkamre taruda, sun asuru di epkamrume.
35 Nedi ton diramsi keca pepkusene. Mali kun kecapu talepra kuramu ngeboda, pio yu weik kuramudi, yuk nesala yuma tep, bicau tenena gum dipapu, ikin keca weik sun nong deiki deriramupa diramsi. Ukupmantoda, nimidi co yal pio telepai koupmengepa, pakredi pio telep kupra tekredi, ila di neramretopu, amali kuramu ngebodi, mali weik kuramu dinin, erdi, ‘Ange kupkamne,’ teneamu keca yumada, nong kupupa isomka weik kuramu.
36 Dinino, er amali kecapu talepra kuramu ngebo menmena depupa, er ati damai ton embesidi epetepsi dinin, amali ngebo ton pio men kuramnga cadi, men epsi.
‘Angeboda tupa gam kurur do, gum do?’ tenen, er angebo tep epetepsi dinin, ton men antapdanemu. Erda konum depupa gum kupka tepa. Atep, ‘Uo, sun mali kunge nesalada pio akunkamenge,’ tenena gume.
37 Sun mali kunge nesala teppu tenena gume. Telep ngeda, sun dumsisipu kunge nesala teppu moupra dinkamrume. Sunda mali kun keca tenpunge peda men kununga cadi, yuk nesaladi, ‘E, sun mali kununge,’ men pepmanto kununge.
Ne tek sisi pepsene. Dipru bouna di kurur ngeboda, yuk nesala yuma tep, ‘E, kange deipdapedi, dipru dukdongopra telep kupra kikiman kutepe,’ tenerura cadi, Allahdi angebo utopu nesala yuma tep melimrepa, amenda taru sunda pio teleppu kunkamenge.
38 Dinino, sun mali kun kecapu talepra kunge nesala yumada, Allahdi wenepra popredi, gum kupra deipkamre.
Amenda taru sun telep kupra men kunkamenge. Tonda, sundi deipmengepa dadeipdanen bankameng nesala cap, sun yala nesala yuma capda, gum kupbankamenge. Amenda taru sun yuma gum kupkamenge.
39 ‘Nun nai Allahda, pio mambul ngebo kurure’ tenen, dumsisipu kunge nesala tep, Allah er si Yahweh dipapu lyemdorure. Tonda kange mun keca sun damai yankamre taruda, Allahdi sun tep, melipra lyepkamre.
Ukupmantoda, nimidi, ‘Nun podan nengdi popsenung’ tenen, gel ati pumbon inipra baramengtopu, sun dumsisipu kunge nesaladi, ikin keca sun damai yaryopda, ‘Allah dipapu melipra lyepkamser’ tenen, Allah er damaipu banunge. Er amutarapu kupmengopda, Allah Yahwehdi anesala tep pio melimrure.
40 Allah er si Yahweh dipapu sun dumsisipu kunge nesala yuma tep, pio melipra lyemdoserure. Tonda, mali kecapu talepra kunung nesaladi, sun dumsisipu kunge neng tep, ‘Ikin keca sun nong deiki depmepedi, popkamepe,’ tenesenga peda, Allahdi nun tep melipra lyemdonkamsere.
Ada tali tep gume. Deiyoda, sun dumsisi kunge nesaladi, ‘Gume, nun nai bo Allah Yahweh, er dipapu lyepkamser’ tenen, er damaipu bangedi, er amutarapu kununge. Atep nengeda, Allahdi anesala tep wepra lyepropkamre.
Raja Daud mut peramnga deiki di aupu yuma pepu.