Psalms 38

Ikin weik kure ngebodi, Allah tep, “Melipneo,” pepra moropu upu

1Raja Dauddi amazmur mut upu pena deiki di seku. Ada, ‘Allahdi ne tep men lupropkamner dinin, tupa tenenkamnere’ tenena tep seku.
2Uo, ne nai bo Allah Yahweh, ‘Kanda yu weik kukerur taruda, ne tep men wenemkamnerum’ tenen, moropkene.
Tonda, ne mali kunange tep, ‘Yu kupkerepa, puto di men wenemkamnerum’ tenen, moropkene.
3Deiyoda ake. Ada, kan wenemna kecada, ne deiki konum yana popneua tepa. Ukupmantoda, nimidi mar dopmengepa, popneredi, ne nong tu pumbon wengnerur utopu tep pepne.
Tonda, kan buru ila puto di ne wenepra popmanerpa, ikin weik kupnere.
4Tonda, kan yu weik kupkerepa, konum wenepra popmanerema tep, ne nong neitamai yumada, pio puto bounpu kunerure.
Tonda, ne mali kun keca talepra kuramsinge tep, ne nong pumbon yo peda, pio bounpu kunerure. Ukuneredi, tek sisi ila pu di jenerure.
5Ange pepmana deiyoda, tali tep gume. Deiyoda, ne mali-mali weik kuramsi ngeda, weik kurura cadi, ila ikin weik konum kunerure. Ukupmantoda, ne giso deiki tara konum dinikra welepka cadi, pio kange mun kange doupra kunune.
6Tonda ne walwal deiki di kuramsinge tep, ne susi dila peda, konum lyupra mali weik kupbanmanerepa, tong weik perure.
7Ukutaruda, pio dipru ikin weik kuneredi, ne nong genepdongopra kunune. Ukune taruda, ne urasinda tu deiki tarapu mapra konum kunune.
Tonda, keteng komuni neitamai yumada, pio mali kange doupra, engepra embanune.
8Deiyoda, ne pu weik jenerura cadi, ne nong bupu pio weik kunerure.
Tonda, ne nong pumbon yumada, konum pu weik jenerura deiki di, pio puto bounpu kunerure.
9Ukupnerepa, ne puto bounpu kununa cadi, ne men kupmanto kunune. Tonda, ne kange dipru yumada, men tenipmanto kunune.
Tonda, ne kange dipru neitamaida, pio kange mun kange doupra kununa cadi, ikin weik kunerya tep, ‘Uo, ware kuptene do?’ tenen, pio ngolongnapu kunune.
10Uo ne nai Allah, kan ila puto deiki di, akeca-keca yuma talepra kuruma tep, ne putapnere keca yumada, kan konum kael keamume.
Tonda, neda, ‘Uo,’ pepra, ngolokra engenuna yumada, kan konum kaele. Akeca yumada, men inipmanto cadi, ange yuma kandi epra kael kemrume.
11Tonda, ne dipru neitamaida, ila di pedanapu kunerure. Ukuneredi, isina welepneredi, ne nong putoda, konum gum kupmanere.
Tonda, ne asuru peda konum pupmanera cadi, men epmanto kunune.
12Ikin weik kunerur taruda, ne kayapu neng cap, ne cap kikiman kuramupu neng cap yumada, ne tapra, ne damai tupa men kununge. Sun yumadi, ne tapra yukai gopra, bena kununge.
Tonda, ne kunun ati damai kurami nesala peda, gopra yukai bena, teka dinapu kunenunge. Ne damai ton men yakanunge.
13Ataru neitamai yumada, yu nengdi, ‘Angebo konum poptaptepe’ tenen, putarepa, kunge nengda, ne tep, nimi pona tep keca ketenepra, derinunge.
Tonda, sun yu nengdi, ‘Angebo Daudda, nundi poptepe,’ pepra penenung nengda, yuk neng tep, “Angebo Daudda, er poptapra sikke buktapkamepe,” pepra, upu talenunge.
Sun anengdi, keteng konumi neitamai yumada, ‘Angebo poptepe’ tenen, yuk neng tep, “Sun peda yana melipseso! Nun cap, sun cap kikiman bepedi, angebo popmeko,” pepra, upu talenunge.
14Dinino, neda upu men gekepmanto neng utopu kununa cadi, sun ayu nengdi penge upu men gekenune.
Tonda, upu men pepmanto neng, sun lup neng kungetopu, ne peda utopu kunune. Upu tenpunge peda, men penune.
Yu nengdi, anesala tep, mali upu pepmenga peda, sun lup nengdi upu tenpunge peda men peptenge. Ukununga utopu, ne peda ataru neitamai peda ukunune.
15Dinino, ukutaruda, ne nai bo Allah, er si Yahweh, ‘Er dipapu lyepkamnera cadi, dan taru di yana lyepkamner do?’ tenen, er tepapu dinapu kunune.
Ne kaele. Yuk neng yumadi men melipnetenga cadi, ne kaele. Kanda Allah, akeca-keca yuma deiki tara erepra, ila puto weik ngebo kuruma cadi, kan dipapu yana lyepropnetume.
16Ange tep nengeda, nedi kan Allah tep, morokenune. Ada, ne ikin kupnerepa, yu nengdi popnengopda, neda men kupmanto kunerur taruda, ton yu nengdi ange epra, autupra nyek-nyek penengedi, kange derinunge. Atep nedi, uo, ne nai Allah, ‘Ato nengdi, ne yana popnengedi, sikke buktapnenung’ tenen, nedi kan tep “Melipneo,” pepra, morokenune ne naio!
17Nedi morokenuna deiyoda, tali tep gume. Deiyoda, ukutaruda, neda sakmanto kunune.
Tonda, kange dipru neitamai ikin weik kunerurnge cap, pu weik jenerurnge cap, tupa-tupa kunerure. Atep, pio men kupmanto kunune.
18Uo ne nai Allah. Nedi pio mali kun keca talepra, mali-mali weik kuramsinge tep, katuai di pepkenedi, akeca tapne.
Tonda, ne konum mali kuramsinge tep, pio mali kange dounune. Ne mali kuramsinge tep, ne kange dipru neitamai yumada, pu jenerure.
19Deiyonge ton men kwapmarepapu, ne pona tep nengda, pio puto weik kungedi ne tep, ‘Angeboda poptepe’ tenen, pio tupa tenenenunge.
Tonda, yuk tali dakunge nesala peda, ne tep, ‘Angeboda nun dabale,’ tenenenunge. Dinino, nedi ton mali men kupsa tep, deiyonge men kwapmarepapu, ‘Nun songe’ tenenunge.
20Nedi sun aneng tep, teleppu kupra derinun dinin, sundi tamupra mali kunangepu kupra derinenunge.
Teka, nedi ‘Telep kunangepu talepra kunkamne,’ tenepnedi, angepu talepra kunun dinin, ne tep, ‘Angeboda nun songe’ tenen, ne pona tep nengdi, ‘Angebo tep, mali kweipmepepa, ikin weik kunkamre,’ tenenapu kunenunge.
21Uo, ne nai bo Allah Yahweh, ‘Kandi men tapkamnerum’ tenen, morokenune.
Teka, ne nai Allah, ‘Kandi ne tapnememdi, gopra, yuk karenai mutuda, bena men kunkamrume. Ne damaipu pio kikiman kuteneme’ tenen, morokenune.
22Atep nengeda, ‘Menmena bukromemdi, ne damai yana, melipkamnerum’ tenen, morokenune.
Uo, kanda pio deiki tara erepra kumemdi, akeca-keca yuma talepra, ila puto deiyo ngebo kuruma cadi, kan puda ne Lyemna Deiyo ngebo kurume.