Psa 39 | XteSC | STEP | Raja Dauddi aupu Mazmur mut seku. Ada, Allah upu mut pena deiyo ngebo karengkamenga tep seku. Angeda, Allah upu mut, er si Yedutun lelim peramretopu kupra penkamrume.

Psalms 39

Dauddi Allah tep, ‘Melipneo!’ pepra moropu upu

1 Raja Dauddi aupu Mazmur mut seku. Ada, Allah upu mut pena deiyo ngebo karengkamenga tep seku. Angeda, Allah upu mut, er si Yedutun lelim peramretopu kupra penkamrume.
2 Nedi upepsi. ‘Gume, ‘Mankau di mali kupnun’ tenen, nedi kunkamne keca yuma tep, ‘Angeda telep do, gum do?’ tenen, moupra tenerpetenkamne.
Ada tali tep gum dinin, deiyoda, ‘Mangkau di mali upu ton pepnun’ tenen, moupra tenimpetenkamne.
Atep, tali lupra tali-tali upu pio men penkamne. Menmena moupra tenipetepnedi, telepngepu penkamne. Ukupmantoda, kuda bisamdi, balila kupra sepdaro bendopserur’ tenen, er sipyal tapu koudongoramengtopu, nedi moupra tenipetepne dipapu, upu penkamne.
Ada, sun mali kun keca talepra kunge nesalada, ne damai kunkameng taru yumada, ne penkamne upuda, moupra tenipnedi, telepngepu penkamne.
3 Men taruda, upu yuma pena gum di, tali dim peprap kunmasi.
Ataru neitamaida, nedi telep kun keca peda, pel men doramsi. Tali dim peprappu kuramsidi, upu peda men peramsi.
Ukuramsa tep nengda, ikin kupneupa, kange mun kange doupra kunmasi.
4 Ukupra kunmasipanen, ne kange dipru neitamaida, kwar kupneupa, tupa tenenapu kunmasidi, ila ikin kange doupmasi.
Ukupmasanen, amenda taruda, nedi upu pepsidi, Allah tep moropsi.
5 Ada, ‘Uo, ne nai Allah Yahweh, ware kuprap taru ton gam kunkamne do? Ne gam kunkamnada, weikanun ton do, metekanunpu do?
Dinino, nun tuai nesalada, keteng tamun yambulanunpu gam kunupa cadi, kandi ange peterepnemempa, moupra tenepnedi teleppu kunkamne.
6 Ne kaele, kandi ne tep, ‘Angeboda, keteng tamun yambulanunpu gam kunkamre,’ konum tenepnemume.
Atep nengeda, ne gam kunkamne keteng tamun nuktereptenyopda, metekanunpu kupkamre. Tonda, kandi tenerum ngeda, ‘Nimi tuai nesala kunung taruda, pio meteka dipu gam kununge,’ teneserume.
Ukupmantoda, nimi tuai nesala yuma, gam kunup keteng tamunda, tenpu kurure. Nimi isinda, mo puru mutmuta deiki palepmarya kaladorurtopu kurure. Pio metek pua.
7 Tek sisi nun tuai nesala yumada, ue metekanunpu kunupe. Ukupmanto ngeda, kuki menmena gum kupbaramretopu, nunda gam kuramepyanen, adipapu menmena denupe.
Tek sisi nun tuai nesala yumada, ue metekanunpu kunupe. Ukupmanto ngeda, kuki menmena gum kupbaramretopu, nunda gam kuramepyanen, adipapu menmena denupe.
Nimi tuai nesala yumadi, ‘Akeca-keca weika di bulupra dopropnedi, akeca yuma talenkamne’ tenen, pel weika di donup dinin, tek sisi ngeda, ‘Amenda taru ware ngebodi, ne taleamsi keca yuma dopropkamre do?’ tenen, pio men tenepmanto kunupe. Angeda nun walwale.
8 Ange tep nengeda, ukutaruda ware keca tep, pio moupra tenenapu kunun do?
Gume, ukutaruda, nedi, ‘Ne nai bo Allah ^{▼▼Allah – Akayat neitamaida, Ibrani upu deiki di, Allah er si tep, ‘Adonay’ ton pepra seki. Aupu deiyoda ake. ‘Allah kanda akeca-keca yuma talememdi, ila puto weik ngebo kurume!’ tenena tep, ‘Adonay’ pepi.} tepapu moupra tenenune. Erda, akeca-keca yuma taleredi, ila puto weik ngebo kurura cadi, er dipapu, ne tep melipra lyemdonkamnere,’ tenenune.
9 Atep, ne nai Allah, nedi mali-mali kuramsinge yuma tep nengeda, kaukepnetumdi, gum kupra derinkamnerum’ tenen, moropkene naio.
Tonda, ‘Sun walwal kunge nengdi, ne tep, “E, angeboda, walwal ngebo, akeca-keca men kael keamu ngebo kuramu,” pepra, nyek-nyek pepnenung’ tenen, ‘Kandi sun upu sekamrume’ tenen, moropkene naio.
10 Ne nai Allah, kandi ikin keca karepnemuma cadi, nedi upu ton men pepkune. Tali dim peprappu kunkamne.
11 Dinino, ‘Kandi ne wenemna tep, ikin keca karenerum ngeda, dopropmemdi gum kupra deiptum’ tenen, moropkene naio.
Kandi ne wenemna tep ila ikin keca karepnemuma deiki di, ne dipru pu jeneredi, puto pio bounpu kunerure.
12 Nun tuai nesala yumada, mali kupmepepa, kandi, ‘Sun kael kepkameng’ tenen, wenepsememdi, ikin keca kareserume.
Ukupsemem taruda, nundi, ‘Uo, angeda pio telep keca,’ tenen, talenup ngeda, mali kupra deipmemdi, nun talenup keca yumada, menmena gum kupbaserure. Ukupmantoda, sinedi, opkal deipmengepa, jerepa, menmena mali kupbarurtopu kunupe.
Teka, nun tuai mutu kunup nesalada, isin dipapu kunupa cadi, nun adipapu denupe. Ukupmanto nimi isinda, mo puru mutmuta deiki palepmarya, kaladorurtopu kuserure.
13 Atep nengeda, ne nai bo Allah Yahweh, ne moropken upuda gekepneo. ‘Ikin kunerepa, engena deiki di morokenun upuda, gekepkunerem’ tenen, moropkene naio.
Tonda, ‘Engepnedi, ne asi me sangnerya deiki di morokenun kecada, men kaukepkamnerem dinin, menmena gekepkunerem’ tenen, moropkene naio.
Tonda, ‘Engepnedi, ne asi me sangnerya deiki di morokenun kecada, men kaukepkamnerem dinin, menmena gekepkunerem’ tenen, moropkene naio.
Tonda, neda, ne co puna neng cap, ne apu yapu cap, nimi bo neng utopu kupra, keteng tamun yambulanunpu mapnedi, adipapu deramitopu, ne peda, menmena di depkamne ja.
14 Ne nai Allah, ne wenemna tep, kandi tupa dinememdi, ikin keca karenerum ngeda, taptumdi kaukepnetumopda, kange di ton cap telep kuptenedi, kange deiptene.
Gum dingeda, ne ikin kunerya deiki di, menmena di depnyopda, dim pepkamne. Amutu neitamaida, depnedi bendopnyopda, dim pepredi gum kupkamre.