Psa 4 | XteSC | STEP | Allah er si eremna tep mut pena neng karenkamenga tep seku. Amut peramu taruda, gitar urasin utopu keca, er sida kecapi doupnedi, mut upu penkamrume peramu. Raja Dauddi amut upu seku.

Psalms 4

Lukunda taru di Allah tep moronkamrume pepu upu

1 Allah er si eremna tep mut pena neng karenkamenga tep seku. Amut peramu taruda, gitar urasin utopu keca, er sida kecapi doupnedi, mut upu penkamrume peramu. Raja Dauddi amut upu seku.
2 Ne nai bo Allah, nedi kan tep, ‘Naio, melipneo’ pepra, morokene taru yumada, ‘Kandi upu peipkamnerum’ tenen, morokenune.
Allah kan dipapu ne tep, ‘Angeboda, mali kunange men talepra kurure,’ pepra melimnerume. Ware taru do yuma, ikin kunere taru yumada, kan dipapu melimnememdi, go ton karenerume.
Atep, naio, ‘Kandi bicau tenepnememdi, kan kange dipapu, ne morokenun upu gekepra melimkamnerum’ tenen, moropkene.
3 Uo sun ila puto weik kurum nengo, ware kupra taru ton cap, ne nai Allah tep nyek-nyek pepra, nalemkamrum do? Ukupmumpa, yuk nengdi ton gekepmengedi, mali upu pengepa, ali weik dangnune.
Sun ila deiyo kurum nengda, ware kupra taru ton cap, nong men kupkamre upu pengepa, kanda, pio kange deipra gekenkamrum do?
Tonda, ware kupra taru ton cap, mok upupu gekepmumdi, dombankamrum do?
4 Ukuprum dinino, sun lumdongona gume. Allah Yahwehdi, er upuda, pio moupra gekepmengedi, angepu talepra, dumsisipu kunge nesala tep, ‘Ne mawa nesala kunkamneng’ tenen, konum wepra deipseue.
Ange tep nengeda, nedi nun nai bo Allah Yahweh tep, “Naio, melipneo,” pepra morone taru yumada, erdi gekenerure.
5 Atep sun yuk nesala yumada, ne pepkusen upu moupra gekepneso! Kwar daknedi, moropsemna gume. Sunda, yu kupsere taruda, mali kange doupra kunkamrum dinin, mali kuna ngeda, men talepra kunkamrume.
Mali kange doupra kumum taruda, sun pe ason deiki mapmumdi, sun pe dipru kange neitamaipu tenenapu kunkamrume. Ukumumdi, dim peprappu kunkamrume. Upu pena gume!
6 Tonda, sundi sun nai bo Allah tep, er telep karen kecada, erdi, “Ukupra-ukupra gam keca popra karenkamnerume,” pepra, deipseutopu, akecapu ketenepra deipmumdi, er gispal dona tep karenkamrume!
Ukupmum dingeda, Allah er si Yahweh tep, ‘Teka’ tenepra, sun kange dipru yumada, er deikipu derinkamrume.
7 Ataruda, nimi weika di upenunge. “Uo, Allahdi ton cap pio telep kweipsetupa, teleppu kutepe do?” pepra, mali kange doupra moronunge.
Uo nun nai bo Yahweh, kandi moupra epsetumdi, ‘Nun tep kange di tamupra telep kweipsetumpa, nunda teleppu kunkamepe’ tenen, morokenupe.
8 Kan dipapu, melimneruma deiki di, neda pingping kangepu dounedi, kange deipra kunune.
Tali dakunge nimidi, sun wa kin li neitamai, kin keca gandum do, anggur me jen nge do, akeca-keca weika di kipmengopda, pio kange deipra kununge.
Dinino, sunda yambulanunpu, nedi kan tep ila di pingping kange doupra kunune.
9 Ange tep nengeda, neda lukunda taru yumada, kange mun kange douna gum dipapu, tali kange deipnedi, lukunda taru telep kupra manune.
Ada, kan Allah dipapu, pio melipra kalengneruma cadi, ikin keca ne damai men yanmanto tep, neda kange tenimtona cap, kware kuna cap gum dipapu, tali kange deipra teleppu kunune.