Psalms 40

Allah tep telepe pena cap morona cap tep upu

1Dauddi mut pena deiyo ngebo Kor tep, amut deiki di pepu.
2Ne nai Allah er si Yahweh, ‘Ne ikin kunerenge tep, melipkamner ja’ tenen, moropsidi, dinapu kuramsipane, ne moropsi upu gekepneu. Allah tepapu, ‘Melipneo,’ pepra moropsipa, gekepneudi konum melipneue.
3Neda, mali keca di bental wetepneto kuramneupane, Allahdi dopra lyepneudi, katuai deipneu. Tonda, ikin weik kuramneua cadi, ukupmantoda ila bental bonai wekamsipane, Allahdi dopra mutu yangne gel deiki deipneue. Melipra lyepneudi, telepai deipneua cadi, ukupmantoda, ukutaruda telep gat tu deikipu deipneupa embanune.
4Ukupneu dingeda, Allahdi ne dipru neitamai, ukupu mut karepra peterepneupa, amut deiki di nun nai bo Allah tepapu, “Kanda pio telepe,” pepra, mut deiki di er si eremnune. Ukunepa, nimi yuk neng yuma epmengedi, ‘Uo,’ tenepmengedi, kwar kuprepa, Allah er si Yahweh tepapu teka tenepmengedi, er sipu eremkamenge.
5Ware ngebo do, dipru eremna cap, mok upu pena cap, men kuredi, ‘Allah er si Yahweh, er dipapu lyemdonkamner’ tenen, Allah tepapu teka tenepra kurur ngeboda, Allahdi melimrepa, er kun keca yumada teleppu kunkamre. Pio kange derinkamre.
Ato ngeboda, erdi dipru eremna deiki, sal nong-nong kamnung nesala tep, ‘Melipkamnenge’ tenen, men mororure. Tonda, tali keca cap, isok si cap eremnung nesala, sun isok si eremnungtopu men kurure. Tonda, anesala cap kikiman men kuredi, ‘Sunda telep kununge’ tenen, men mororur dinin, Allah Yahweh tepapu, teka tenepra kurure.
6Nun nai Allah Yahweh, kandi nimi men kupmanto keca cap, ila mambul pel cap, yala-yala yuma konum doamum ngeda, nundi epra men nukmanto kunupe.
Tonda, kandi nun tep, ‘Anesala tep ukupra melimkamne,’ tenesememdi karenkamserem kecada, nundi men nukra kael keptepe. Kandi nun tep, telep kudinkamserem keca yumada, tek sisi men nuktene.
Kandi nun tep meliamsemumnge cap, amenda taru telep kudinkamsememnge capda, pio weik kurura cadi, nukpeteptenya peda, ange yumada men nukmanto kunune.
7Allah kandi tenemem ngeda, nimidi, ‘Uo, nun mali kun keca gum kupra deipsetudi, lyepsetu’ tenen, yapi keca popra, weika di dopra uku dongoryakankamnenge. ‘Akecapu ne kange derinune’ tenen, men kurume.
Tonda, kan gispal dona tep, ‘Telep karen keca weika di duyakankamnenge’ tenen, men putakerure. Kandi ne tep konum lap peiamnemumdi, melipnemumnya deiki di, moupra gekepsidi, konum kael kepsi. Ada, ‘Sun mali kun keca daemna tep, gam keca popmengedi, uku dongopra kareryakankamnenge,’ men tenerume.
Dinino, ila mambul ngeda, kandi nun tep, ‘Ne upu moupra gekepmengedi, ne domyakankamnenge’ tenen, putakerure.
8Nedi ange konum kael kepsa tep, ukutaruda, ne yanmandi, kan damai akunmane. Kandi peiamumpa, kan upu buku neitamai, ne tep konum sekeipnei ngeda, pepkukene.
9Ada, ne nai Allah kandi, ‘Ukunkamrume, angeda men kunkamrume,’ pepra deipsemum upu yumada, ne dipru neitamai konum deipsi. Atep nengeda, kandi, ‘Ukunkamre,’ teneramnemumtopu, angepu putanerepa, ‘Aupupu talepra dumsisipu kunkamne,’ tenenune.
10Ne nai Allah Yahweh, kan kaele. Kandi, ‘Dumsisi kun kecada ake,’ pepra, lap peipnemum upu yumada, tenpunge peda inipra men tamnune. Nimi yumadi kan si eremna tep, bulupra wengnung ati pumbon di, kandi pesemem upu yuma jenek kupra lap penune. Nimi yuma wekmengai lap penune. Tenpunge peda, men tamnune.
11Allah kandi nun tep, dumsisikra teleppu kunange cap, tamna pio gum di, tupa melimserumnge cap, tonda nimi tep bicau tenepra lyemna upu peiamsemumnge capda, ‘Nedi men penkamne’ tenen, ne dipru neitamaipu men inimtamnune. Yuk neng gekenmangai di, aupu yuma jenek kupra lap penune. Kandi, ‘Ukunkamne,’ peamsemum upu yumada, tek sisi kurume. Tenpunge peda men tamrume. Apel yuma gawal dangrume.
Tonda, ‘Nimi tuai nesala weik lyemkamne’ tenen, keteneiamsemumnge peda, aupu ton men tamnune. Kandi bicau tenesememdi, pio tek sisi upu pesememnge yumada, katuai dipu lap penepa, kan si eremna tep bulupra yange nesala, yuk nesala weika di gekenunge.
12Ange tep nengeda, ne nai Allah Yahweh, ne mali kun keca tep, adipapu tali wenepra poptapnetum dinin, ‘Bicau tenenememdi, lyemdonkamnerem’ tenen, moropkene.
Tonda, kan tek sisi pesemem upu cap, kandi bicau tenesememnge cap deiki di, ne tep kalengnemempa, ‘Ne damai ikin keca men yakankamnere’ tenen, moropkene. Kanda ila puto ngebodi melimkamnereme. Ne tamna gume.
13Naio, ‘Kandi melipra kalengkamnerume,’ pepra moropmaken ngeda, tali tep men pepkene naio. Ila ikin keca cap, mali kun keca cap, kange mun keca yala-yala yuma cap, pio weik kurya kan-kan kunune. Tonda, nedi mali kune keca tupa tenenunya deiki di, kange mun kunere. Ne mali kune keca di bisipnerepa, ‘Telep bisi ake’ tenen, moupra men kael kepmanto kunune. Ukupmantoda, ne giso potong men nukmanto kuneretopu, ne mali kun keca pio weik kunerur cadi, ne dipru pio ikin kunerure. Ne dipru kange neitamai puto boun kunerura cadi, men kupmanto kunune.
14Ange tep nengeda, ne nai Allah Yahweh, kange deipnetumdi, ‘Ne ikin kunerenge neitamai di, lyepnememdi, telepaipu deipkamnerum’ tenen, moropkene. Ne nai Allah Yahweh, ‘Kandi menmena ne damai yana melimkamnerum’ tenen, moropkene.
15Ukupnemempa, ‘Angebo popkupe,’ tenenenung neng, ne podan neng kael kepmengedi, kwar dakra bura sakmengedi, yuk-yuk bendopkamenge. Kandi melipnememnya deiki di, ‘Ne podan neng yuma ali dakameng’ tenen, moropkene.
Ware neng do yuma, ne tep, ‘Angebo er cap, er kure keca yuma cap mali kupkamre. Erdi talerur keca yuma, mali kuptupa, gum kupkamre,’ tenenenung nesala yuma, mali men deipnetengepa, ‘Ali dakra tapnengedi, tamupra bendopkameng’ tenen, morokene ne nai Allah.
16Ne ikin keca dopropne taru, nimi yuk nengdi, ‘Walito ikin keca dopropmare,’ pepra, nyek-nyek penenung nengda, ‘Ali weike dakameng’ tenen, moropkene ne nai Allah.
17Dinino, ware nesala do yuma, Allah kan tepapu, tupa teka tenepra kunung nesala yumada, ‘Kandi telep kupra deipmempa, sun yuma pingping kange doupra kunkameng’ tenen, moropkene.
Tonda, ‘Allah er dipapu lyemdonkamsere’ tenepra kunung nesala yumada, ‘Pingping kange doupra kunkameng’ tenen, moropkene. Tonda, anesaladi, ‘Nimi tuai nesala ban-ban yuma kunge nesala yuma tep, nun nai Allah, er si Yahweh pio eremkamenge’ tenen, lap penkamenge. Sundi, “Allah Yahweh, akeca-keca yuma deiki tara talepra, ila puto weik ngebo kurure,” pepra, er sipu pio eremkamenge.
18Neda, akeca-keca yuma talepra kuna ngebo, pio men kunune. Tali kankan ngebo kununa cadi, akeca-keca yuma tep, ila di putanerure. Atep nengeda, ‘Ne nai Allah, er si Yahwehdi, ne tep tenepnetudi, melipnetu’ tenen, moropkene.
Ne nai Allah, ne ikin kunerura neitamai di, melipra lyemdoneruma cadi, kan dipapu menmena yana melipnerume. ‘Yuk taru yana melipkamken ja, tenena gume’ tenen, moropkene. Ataru dipapu yana melipnerume, naio. Dauddi pepu.