Psa 42 | XteSC | STEP | Daud mut deiki di, sun Korah yala neng tep pepu.

Psalms 42

Allah tep tenenkamep upu

1 Daud mut deiki di, sun Korah yala neng tep pepu.
2 Ukupmantoda, rusa bisam me putaprepa, kang-kang pepredi, me jen dam baramre utopu, ne nai bo Allah kan tep putanerure.
3 Ne nai Allah, kanda gam deiyo ngebo kuruma cadi, kan tep ila di putanerure. ‘Ware taru ne kan kun damai yatenedi epketene do?’ tenenune.
4 Tonda, ne ikin kunere taruda, nimi yuk teka tenena gum nengdi upenenunge. ‘Kan nai bo Allahda dan kukerur do?’ pepra asipnengepa, komuni lukunda yuma, dipru engena deikipu kunune.
5 Ne ikin kunere taruda, engena deiki di tupa tenenune. Uo, ne nai Allah, ne cap, nimi weik cap, kan si eremna ati damai bana tep, nedi deiyo kepra nimi dopra baramsi.
Kan si eremna ati damai baramepu taruda, ne cap anesala yuma cap, pingping kange doupra, mut deiki di kan tep, ‘Telepe,’ pepra, baramepu. Ukutaruda, ikin weik kunerur dinin, pumun taru kuramsi ngeda, tupa tenenune.
6 Nedi ne pe tep, tenedanune. Ware keca deiyo tep, ne tenimtonapu kunun do? Tonda, ware keca deiyo tep, dipru engenapu kunun do? Atep nengeda, neda Allah nimi lyemdina deiyo ngebo tep, teka tenepnedi moronkamne.
Moropnepa lyepneriopda, nedi ne nai bo Allah, er sipu pio eremkamne ja. Atep nengeda, Allah tepapu teka tenenapu kunkamne.
7 Ne dipru pu jepnerura tep, kandi pumun taru makuramnemum kecada, kange di ton cap tupa tenenkamne. Yordan me gisoai buku mutu, Hermon mutu di dipra, Misar mutu cap damai amutu neitamai yumada, pio telep kupra meliamnemum ngeda, tupa tenenkamne.
Ne nai Allah, kandi ne tep lyepramnemumnge tep, tupa tenepnedi, kange di ton cap kange deipkamne.
8 Ukupmantoda, me lum sakredi nimi deiki singiramretopu, tonda ila laut mokon longteng-longteng pepredi, nimi singiramretopu, ne kange mun kunere ngeda, atopu kunerure.
9 Ikin weik kunerur dinin, keteng komuni neitamai yumada, ne nai Allah kandi bicau tenepra melimnerume. Ukunememnge tep nengeda, lukunda neitamaida, Allah kan si eremna mut pekenune.
Ne nai Allah, kanda ne gam kuna deiyo ngebo kuruma tep, kange lon mut pepnedi, Allah kan tepapu morokenune.
10 Ikin weik kunerura tep, nedi ne nai Allah tep, penune. Kanda ila gel bungamra utopu ngebo melimnerume. Engena deiki di, ‘Uo, ne nai Allah, ware keca deiyo tep, lupronmanerum do?’ pepra morokenune.
Ware keca deiyo tep, kandi tapnemumpa, ne podan nengdi ikin keca ne damai derinenung do? ‘Sundi popmanto kunenunga cadi, pio kange mun kange doupra, tupa engena deikipu kunkamne do?’ tenen, morokenune.
11 Ada mesum tep men pepne. Ne podan nengdi, “Kan nai Allahda dan kurur do?” pepra, nalemnenunga cadi, ne yoda pun deiprepa, ila kange mun kuramre utopu kunerure.
12 Ange tep dipru pu jenerepa, ‘War keca tep kunenung do?’ tenen, tenimtonune. Dinino, nedi ne pe tep, utenedanune. Ware keca deiyo tep, ne tenimtonapu kunkamne do?
Tonda, ware keca deiyo tep, dipru engenapu kunkamne do? Atep nengeda, neda Allah nimi lyemdina deiyo ngebo tep, teka tenepnedi moronkamne. Moropnepa lyepneriopda, nedi ne nai bo Allah, er sipu pio eremkamne. Atep nengeda, Allah kan tepapu teka tenenapu kunkamne. Dauddi pepu.