Psa 43 | XteSC | STEP | Ne nai Allah, kan tep teka men tenekenung nesaladi, ne tep minina upu penenunga cadi, kandi yana melipnerume. Allah kanda ne tamna kepmemdi, ne tep ‘Poptepe,’ tenenenung nesala cap, tonda minin upu penenung nesala cap, mali kun keca weik kunge nesala cap yumada, ‘Allah kandi gum kupra deipkurume’ tenen, moropkene.

Psalms 43

1 Ne nai Allah, kan tep teka men tenekenung nesaladi, ne tep minina upu penenunga cadi, kandi yana melipnerume. Allah kanda ne tamna kepmemdi, ne tep ‘Poptepe,’ tenenenung nesala cap, tonda minin upu penenung nesala cap, mali kun keca weik kunge nesala cap yumada, ‘Allah kandi gum kupra deipkurume’ tenen, moropkene.
2 Ne nai Allah, kanda nimi melimna deiyo ngebo kurume. Ukupmantoda, ‘Yuk neng popsenung’ tenen, sepdara bengedi, ila gel beilya wiamenge damai inimbaramengtopu, ‘Lelipdongopkamner’ tenen, neda sepdaro kan damai inimyakanune.
Dinino, war keca deiyo tep tapnemum do? Ukupnemumpa, ne podan nengdi, sun yu ne deiki derinengepa, kange mun deikipu kunun do?
3 Ikin kununa tep nengeda, ne nai Allah kan puto dirine cap, kandi tek sisi upu penerumnge cap, karepnemempa, adeiki di, ‘Telep kun bisi ake’ tenen, kael keptene.
Kan dirine cap, kan tek sisi upu cap doproipnemempa, ne nonge kwa dipnerepa, dumsisipu kuramnyanen, kandi wepra deiamum mutu, ila telep mutu, Allah kan kundam yankamne.
4 Neda kan kundam yanyopda, Allah kan si eremna tep kareryakakenupai, yanedi si eremkamkene. Ne nai Allah, kan tep kange deipra pingping kange doukenune.
Ukunedi, bung-bung pena, er si kecapi deiki, kange lon mut pepnedi, ne nai Allah, kan sipu eremkamkene. Ne nai Allah, kanda ne nai bo sisa kurume.
5 Ukutaruda, ne dipru pu jenerepa, ‘War keca tep kunerur do?’ tenen, tenimtonune. Dinino, Nedi ne pe tep, utenedanune. Ware keca deiyo tep, ne tenimtonapu kunkamne do?
Tonda, ware keca deiyo tep, dipru engenapu kunkamne do? Atep nengeda, neda Allah nimi lyemdina deiyo ngebo tep, teka tenepnedi moronkamne. Moropnepa lyepneryopda, nedi ne nai bo Allah, kan sipu pio eremkamne. Atep nengeda, Allah kan tepapu teka tenenapu kunkamne. Dauddi pepu.