Psalms 44

Israel yala nesala yumada, ikin weik kuramipa, mazmur upu seku ngebodi, ‘Allahda, nun Israel yala nesala yuma tep melipra lyepkamsere’ tenen, moropu upu

1Israel yala nesala peteremna tep, Korah yala ngebo tenpudi, aMazmur upu mut seku. Seku dingeda, Allah upu mut pena deiyo ngebo tep karepu. Angebodi pepu upuda ake.
2Uo, nun nai bo Allahda, nun pe amul deiki di konum gekeramepu.
Ada, nun apu yapudi, peramseipa, gekeramepu. Aupu peraminge deiyoda, ake.
Sundi, “Gume, menop taru neitamaida, nun nai Allahdi, ila puto weik mambul pel weika di doramseupa, telep kuramepu,” pepsei.
3Ada, nun tep kareamsemum mutu neitamaida, kan Allah tep men kael keami nesala konum kuramidi, amutu yuma talerami dinin, ayuk-yuk yala nesala yumada, Allah kan pe buru dipapu, anesala enepra dokotemumpa, sun yuma bendopnapu kuami.
Dinino, nun Israel nesala yala-yala yumada, nun apu yapudi dopra, amutu neitamai di puto keprapmumdi, aceipu deiamume.
Amutu neitamaida, Allah kandi nun apu yapu telep kupra aceipu deiamum dinin, sun yuk-yuk yala nesala yumada, sun nong deiki ila kange mun keca deriramumpa, sunda, ‘Uo’ tenen, amutu tapra bendopi.
Ukuramum dinin, nun Israel yala nesala yumada, loptapsemumdi, lyepropsemume.
4Angeda, tali tep men pepne. Deiyoda, Allah er puto deiki di, amutu-amutu yuma poptapidi, dalupra dopropi. Ukurami dinin, sun pe buru puto dipapu, amutu yuma men dopromi.
Ange utopu, nun apu yapu, sun pe puto cap, sun pe buru cap di amutu-mutu yuma neitamai kurami nesalada, men popra gawal dangamidi, amutu yuma men dalupra dopromi.
Ange gum dinin, Allah kan pe puto buru deiki di, nun apu yapu meliamumpa, amutu yuma popra dalupra dorami.
Tonda, kan pedi, nun apu yapu damai kuramrumdi, sun tep kange deriramuma deiki di, Israel nesala meliamumpa, amutu yuma dalupra dopromi. Ukupmantoda, kan pe dirin weik, sun deiki deiamumdi, sun tep pio telep kupra deriramrume.
Ada tali tep gume. Kan Allahdi nun apu yapu tep, kange deriramruma deiki di, sun tep meliamrumpa, amutu doprami.
5Uo, ne nai bo Allah, kan dipu taleneruma cadi, ne ila nimi deiyo ngebo, Raja utopu kunerume.
Allah, kan dipapu, “Yuk-yuk mutu nesala yuma tep, Israel nesala sun damai bena popmengedi, sun mutu yuma dopra talenkamenge,” pepra, pedina upu di peipsemumtopu, kunupe. Ange yumada kan dia!
6Ukupmantoda, jem sapi bisamdi, er giso deiki beleramre takke keca, er sida tanduk di, yuk jem sapi bisam tep, poprepa, tu deiki sangamretopu kupra, deipsemume. Ada, kan pe puto deiki di, nun pona tep neng yumada, popmupupa amutu tapra, yukai bendopi.
Ange utopu, Allah kan puto si deiki di, nun pona tep nengda, popmepedi, yaniptapkamepe. Ukupra sunda, popra gawal dangkamepe.
7Ange pepmanada, tali tep gume. Deiyoda, ake. Ada, ne pe buru cap, ne jen cap tep, ‘Ange deiki dipu lyepropkamnere. Ne dipapu lyepdatene,’ tenen, teka men tenenune.
Ange utopu, ‘Ne pe nimi pon parang ya di, yu neng popnedi, lyepdankamne,’ pio men tenenune.
8Ange yuma gum dinin, ne kaele, “Allah kan dipapu, nun pona tep nengda, konum popra bisbisa kamruma tep, konum lyepropsemume.
Teka, nun tep, ‘Anesalada, nun pio songe,’ tenesenung neng tep nengeda, kan Allah dipapu, kange wang-wang peramre keca karepmem pangeda, aneng sun kange men tenipmanto kungedi, kware kuprepa, nun damaida tapra, dana-dana tarupu sepdara banunge.
9Teka yuk puto kurur ngebo tep, pio gum dinin, kanda Allah tepapu, “Nun nai Allahda, er dipapu lyemdoserure,” pepra, kan sipu pio eremkenupe.
Atep nengeda, nun Israel yala nesaladi, kan cap, kan si cap tep “Kanda pio telepe,” pepra, kan sipu pio eremkamkepe nun nai Allah.
10Dinino, nun nai Allah, ukutaruda, konum tapsemumdi, kaukemnapu kuserum ngeda, dan do? Allah kandi kau kepra tamsemuma cadi, ukutaruda nun Israel nesala jen talena nengdi, ‘Yuk mali nesala porbenkamep,’ tenepmengedi, porbanung taruda, kan cap kikiman men barume.
11Konum kaukepra tamsememnya deiki di, nun pona tep nengdi, poryasenge taruda, kware weik kuserepa, nunda amutu tapra, bura saka sepdaro banupe.
Kware kupserepa, ben dopnapu kupmepyopda, nun pona tep nengdi, nundi taleramepu keca yumada, tali lupra upula doronunge.
12Uo, nun nai Allah, kandi mali kweipsemuma tep, sun yuk karen mutu nengdi, tali lupra portamsenunge. Ukupmantoda, domba bisam peina deiyo nengdi, ‘Adomba popra jepkupe’ tenen, sun domba wepra, domba pona deiyo neng damai dokotemamengtopu, kandi konum ukupra tenesememdi, tamsemempa, yu neng yangedi, tali lupra posenunge.
Tonda, kandi nun wenemna tep, konum enepra dokotepsemumpa, sun yuk-yuk mutu kunge nesaladi, nun tep tomopseidi, sun pe mutu dubena deipseipa, sun mutu kankan neitamai konum kunupe.
13Ukupmanto ngeda, nimidi kunumna weik bung keca akapmar dinin, ‘Angeda nun songe,’ tenepmengedi, yuk neng tep, “Kunumna keca metekanunpu karepnerumudi, akeca tali lupra doproptume,” pepra, abung keca tapmengedi, kunumameng utopu konum kupsemume, nun nai Allah.
Sun yuk mutu nengdi, kunumna weik keca men kareamkei dinin, kandi nun tep adipapu tapsemumpa, sundi poptapseidi, tali lupra dubenamsei.
14Sundi ukupseia tep, nun dana-dana tara kunge nesala yuma epsengedi, nyek-nyek pepra autusengedi, mali upu weik pesenunge.
Teka, nun dana-dana tara kunge nesaladi, ‘Israel yala nesalada dakwapye,’ pepra, nun tep autupra nyek-nyek pesenunge.
15Tonda nun nai Allah, kandi tapsemumpa, yuk mutu yu neng, poptapseia tep, sun yuk-yuk karen mutu nesala, kan tep men kael keami neng peda, ‘Uo, sun Israel nesalada, ila kange mun keca dopramitopu, nun peda utopu kupserur’ tenen, kware kunupe,’ penunge.
Ada, kanda Allah tep, men kael keamidi, kan si men eremnung nesala peda, nun Israel yala nesala tep tenepsengedi, ‘Uo, uo, Allahdi anesala tep ila di wenepu,’ tenen, kware kununge.
16Atep nengda, tumi-tumi yumada, ipna taru di dipra keteng komuni neitamai yumada, ali weik dangnune. Ada, yuk yala nesaladi, nun tep, mali-malipu pesengepa, gekenune.
Sundi, mali pesenunga cadi, neda ali weik dangnune. Ukunedi ne urasinda, sun damai tep inimdongonune.
17Ada tali tep gum dinin, sun nyek-nyek penge neng cap, sun mali-mali pesenge neng capdi, mali weik pepmengopda, gekepnedi, ali dangnuna tepa.
Tonda, nun pona tep nengdi, nun damai mar poryange taru do, tonda, ‘Israel nesaladi mali kweipseiya tep, kwangdangkupe,’ tenenge nengdi nun damai yange taru do, neda ali weik daknedi, ikin kangepu doupra kunune.
18Dinino nun nai Allah, kandi aikin keca yumada, nun deiki konum yanamseupa, kange mun kange doupra kunupe.
Dinino, nundi nun nai Allah kan tep, men lumdongonupe. Kan tep tupa tenekenupe.
Tonda, kan Allahdi nun tep, “Angeda kunkamrume, angeda pio men kunkamrume, Tonda, ukupra telep kuprumnyopda, nedi telep kudinkamsene,” pepra, pedina upu deiki peiamsemumnge yumada, nun Israel nesalada, ange men lumdongonupe.
19Tonda, nun kange dipru neitamaida, kan tep tapkepedi, nun amnyo karikra, yuk tara men embanupe. Kan tepapu tupa teka tenekenupe.
Tonda, kan Allahdi, “Ange kunkamrume, angeda pio men kunkamrume. Telep dumsisi kunada ake, mali kuna ngeda ake,” pepra deiamsemum upuda, nundi men tamdongonupe. Kan bisida tapra, yuk tali bisi lupra men embanupe.
20Nundi, kanda Allah tep men tapkepu dinino, kandi go kareamumpa, nun podan nengdi konum yana poramseipa, kange mun kange doupra kunupe. Nun pona tep nengda, bura tara gam kuramre yu kam utopu kununge.
Kandi go karepmumpa, nun podan nengdi, nun yala neng weika di poramsei. Atep, ukupmantoda, kandi ila kunungna keca dopra, nun deiki konum deipsemumpa, nunda pio men kupmanto kunupe.
21Dinino, nun kange tenenmapada ake. Nun si eremnup Allah, er tep konum tapmupudi, er si lupronmatepepa, Allahdi ange men kael keptu do?
Tonda, nundi Allah tapra, yuk tali keca tep, isok si eremamtepe teptoda, Allahdi ange men kael keptu do?
22Gume, Allahda, tek sisi akeca-keca yumada diredi, kael kemrure. Tuai nesala, sun kange neitamai tenenange do, sun dipru neitamai do, tenengedi pio moupra inimnung keca peda, er konum kael kemrura cadi, nundi mali kupmatepe keca yuma peda, tek sisi kael kemrure.
23Gume naio, nun Israel nesaladi kan tepapu, tupa teka tenekenupa cadi, sun yuk-yuk mutu nesaladi, nun tep, ‘Anesalada porbenkamepe’ tenen, tupa tenesengedi, nun damai mar poryakasengedi, nun tara neng weika di portamnunge.
Uo, nun nai Allah, kandi konum tapsemuma tep, sun yuk karen mutu nengdi, tali lupra yana portamsenunge. Ukupmantoda, domba bisam peina deiyo nengdi, ‘Adomba popra jepkupe’ tenen, sun dombada popmantonge tep wepra, domba pona deiyo neng damai dokotemamengtopu, kandi konum ukupra tenesememdi, tamsemempa, yu nengdi tali lupra posenunge.
24Ange tep nengeda, ‘Nun nai Allah, kanda akeca-keca yuma talememdi, ila puto weik ngebo kuruma cadi, kan bukromemdi, menmena nun damai yana melipra lyepropkamserum’ tenen, moropkepe.
‘Naio, kanda nun tep, pio men tamkamserum’ tenen, moropkepe. Atep, menmena di nun damai yana melipra lyepropseo naio!
25Tonda, ware keca deiyo tep, kandi, ‘Anesala men melipkamne’ tenen, kaukepsememdi, nun ikin kusere keca yumada, ton cap men diserum do?
Yuk mutu nengdi, tomopsengedi, ikin pel dimsenge nge cap, ikin keca karesengepa, kange mun kange doupra kunupnge capda, ware keca deiyo tep, ange tupa lumdongomemdi, tupa men teneserum do?
26Ange pepmanada, tali tep gum dinin, deiyoda ake. Ada, nun Israel nesala yumada, ikin weik kuserura cadi, puto bounpu kupseua tep, tu deiki sakmupudi, men bukronmanto kunmape.
Nunda pio men kupmanto konum kunmapa cadi, tu but deikipu mapra tupa acapu kunmapa tep, pio men bukronmanto kunmape.
27Ange tep nengeda, ‘Nun nai Allah, kanda menmena bukromemdi, nun damai yana melipra lyepkamserum’ tenen, moropkepe.
Nun ila ikin keca neitamai kunmapa cadi, kan dipapu yana, nun tep kunupra loptapkamserume. Lyepropsememdi, kange di telep kweipkamserum’ tenen, moropkepe. Ange yumada tali tep gum dinin, deiyoda, ake.
Ada, menop taru di nun Israel yala nesala tep, kandi, peipmume. “Sun Israel yala nesala tep nengeda, ila di bicau tenesenedi, pio telep kudinkamsene,” pepra, pedina upu deiki peiamsemuma cadi, nun cap, yuk mutu nesala yuma capda, ange lumdongona gum di, moupra tenepmepedi, tupa tenenkamep’ tenen, moropkepe nun nai Allah.